Read Iloko 1 Corinthians 11 Bible Online

1 Corinthians 11 - Iloko bible

1 Corinthians 11

¹Tuladendak ngarud a kas iti panangtuladko ken ni Cristo.

²Dayawenkayo gapu ta kanayon a malaglagipdak ken sursurotenyo dagiti pannursuro nga inyawatko kadakayo.

³Ngem kayatko a maawatanyo a ni Cristo ti pannakaulo ti tunggal tao. Ti lalaki ti pannakaulo ti babai, ket ti Dios ti pannakaulo ni Cristo.

⁴Isut' gapuna a no nakadalungdong ti lalaki no agkararag wenno mangasaba, ibabainna ni Cristo.

⁵Ti babai a saan nga agdalungdong no agkararag wenno mangasaba, ibabainna ti asawana. Awan dumana iti babai a nakuskosan ti ulona.

⁶Kinapudnona, no saan nga agdalungdong ti babai, nasaysayaat laengen no agpakuskos. Ngem gapu ta nakababain nga agpakuskos ti babai, agdalungdong ngarud.

⁷Saan a rumbeng nga agdalungdong ti lalaki, ta isu ti pakakitaan iti ladawan ken dayag ti Dios. Ti babai ti mangiladawan iti dayag ti lalaki.

⁸Ta saan a nagtaud ti lalaki iti babai, no di ket ti babai ti nagtaud iti lalaki.

⁹Ken saan a naparsua ti lalaki gapu iti babai, no di ket naparsua ti babai gapu iti lalaki.

¹⁰Ngarud, gapu kadagiti angheles, agdalungdong koma ti babai tapno maipakita nga iturayan ti lalaki.

¹¹Nupay kasta, iti panagbiagtayo iti Apo, ti babai napateg iti lalaki ket ti lalaki napateg iti babai.

¹²Ta idinto a nagtaud ti babai iti lalaki, mayanak met ti lalaki iti babai; ngem agtaud amin a banag iti Dios.

¹³Dakayo ti mangeddeng: Rumbeng kadi nga awan dalungdong ti babai no agkararag iti Dios iti publiko?

¹⁴Saan kadi nga isuro ti nakaisigudan nga ugali a naalas nga atiddog ti buok ti lalaki

¹⁵ngem napintas a banag iti babai? Naited kenkuana ti atiddog a buok a pannakadalungdongna.

¹⁶Ngem no adda sumuppiat iti daytoy, ibagak kadakayo nga awan kasta nga ugalitayo, uray pay kadagiti iglesia ti Dios.

¹⁷Ngem iti panangibagak kadakayo kadagitoy sumaganad, saankayo a dayawen. Awan ngamin ti pagimbagan nga ited ti panaggigimongyo, no di ket pagdaksan.

¹⁸Umuna, naipadamag kaniak a mabingaybingaykayo kano no aggigimongkayo, ket mamatiak bassit iti daytoy. (

¹⁹Nasken a masinasinakayo tapno maiparangarang dagiti pudno a mapagtalkan.)

²⁰Iti kastoy a panagtataripnongyo, saanen a ti Pangrabii ti Apo ti kanenyo.

²¹Ta no mangankayo, agiinnunakayo a mangan iti bukodyo a pangrabii. Iti kasta, adda mabisinan, adda pay mabartek.

²²Apay, awan kadi ti balayyo a panganan ken paginumanyo? Wenno laisenyo kadi ti iglesia ti Dios ket ibabainyo dagiti napanglaw? Ania ti namnamaenyo a sawek kadakayo maipapan iti daytoy? Dayawenkayo? Saan a mabalin!

²³Ta inawatko iti Apo ti pannursuro nga inyawatko met kadakayo: Iti rabii a pannakaliput ni Apo Jesus, innalana ti tinapay.

²⁴Kalpasan ti panagyamanna iti Dios, pinispisina ti tinapay ket kinunana, “Daytoy ti bagik nga agpaay kadakayo. Aramidenyo daytoy a panglaglagipyo kaniak.”

²⁵Kasta met a kalpasan ti pangrabii, innala ni Jesus ti kopa ket kinunana, “Daytoy ti kopa ti baro a tulag a napatalgedan babaen iti darak. Tunggal uminumkayo iti daytoy, aramidenyo a panglagip kaniak.”

²⁶Kaipapananna daytoy a tunggal mangankayo iti daytoy a tinapay ken uminumkayo iti daytoy a kopa, ipakaammoyo ti ipapatay ti Apo agingga iti panagsublina.

²⁷Isut' gapuna a ti siasinoman a mangan iti tinapay wenno uminum iti kopa ti Apo iti wagas a nakababain, makabasolto iti bagi ken dara ti Apo.

²⁸Ngarud, masapul nga umuna nga usigen ti tunggal tao ti bagina sakbay a mangan iti tinapay ken inumanna ti kopa.

²⁹Ta ti siasinoman a mangan iti tinapay ken uminum iti kopa a dina ammoen ti kaipapanan ti bagi ti Apo, yegna ti pannakaukom iti bagina.

³⁰Daytoy ti gapuna nga adu kadakayo ti nakapsut ken masakit ket adun ti natay.

³¹No usigentayo koma nga umuna ti bagitayo, dinatay ukomen ti Dios.

³²Ngem ukomen ken dusaennatayo ti Apo tapno ditayo mairaman iti pannakadusa ti lubong.

³³Ngarud, kakabsatko, agiinnuraykayo no aguummongkayo a mangan iti Pangrabii ti Apo.

³⁴Ket no adda mabisin kadakayo, mangan idiay balayna tapno dikayto maukom inton agtataripnongkayo. No maipapan kadagiti dadduma a parikut, risutekto ida inton umayak.