Read Iloko 1 Corinthians 14 Bible Online

1 Corinthians 14 - Iloko bible

1 Corinthians 14

¹Ti ayat ngarud ti ipangrunayo a gun-oden. Tarigagayanyo dagiti naespirituan a sagut, nangruna ti saguday a mangasaba.

²Ti agsao iti sabali a pagsasao, saan a dagiti tattao ti kasaona no di ket ti Dios agsipud ta awan makaawat kenkuana. Ar-aramatenna ti pannakabalin ti Espiritu nga agsao maipapan kadagiti bambanag a narigat a maawatan.

³Ngem ti mangipakaammo iti mensahe ti Dios, kasaona dagiti tattao ket tulongan, bagbagaan ken liwliwaenna ida.

⁴Ti tao nga agsao iti sabali a pagsasao, ti la bagina ti tulonganna. Ngem ti agsao iti mensahe ti Dios, tulonganna ti entero nga iglesia.

⁵Kayatko a makasaokayo amin iti karkarna a pagsasao, ngem kaykayatko a maaddaankayo iti pannakabalin a mangipakaammo iti mensahe ti Dios. Ad-adda a makatulong ti tao nga agsao iti mensahe ti Dios ngem ti agsao iti karkarna a pagsasao—malaksid no adda naitallaong a makailawlawag iti kayatna a sawen tapno matulongan ti entero nga iglesia.

⁶Kas pangarigan no umayak kadakayo, kakabsatko, ania ti pagimbagan a maitedko kadakayo no agsaoak iti sabali a pagsasao? Awan! Wen, awan, malaksid no ipakaammok kadakayo ti maysa a mensahe nga impaltiing ti Dios wenno adda ibagak a sirmata wenno naipaltiing a kaskasaba wenno pannursuro.

⁷Uray dagiti awan biagna a pagtokaran, a kas iti fluta ken iti arpa, kasano nga adda makaammo iti matoktokar a musika no di nalawag ti pannakatokarna?

⁸No di nalawag ti pannakapuyot ti trumpeta, siasino ti agsagana a makigubat?

⁹Kasta met kadakayo, kasano nga adda makaawat iti sasawenyo no saan a matarusan ti sarsaritaenyo iti karkarna a pagsasao? Agpukaw a kas asuk dagiti balikasyo.

¹⁰Agduduma dagiti pagsasao iti lubong, ngem adda kaipapanan ti tunggal maysa.

¹¹Ngem no diak ammo ti pagsasao a maar-aramat, ganggannaet kaniak ti agsasao ken ganggannaetak met kenkuana.

¹²Gapu ta aggagarkayo a maaddaan kadagiti sagut ti Espiritu, ipangpangrunayo ngarud nga aramaten dagiti sagut a makatulong iti panagdur-as ti iglesia.

¹³Ngarud, ti tao nga agsao iti karkarna a pagsasao, nasken nga agdawat iti pannakabalin a mangilawlawag iti kayatna a sawen.

¹⁴Ta no agkararagak iti sabali a pagsasao, pudno nga agkararag met ti espirituk, ngem saan a maitunos ti panunotko.

¹⁵Ania ngarud ti aramidek? Agkararagak a buyogan ti espirituk ken ti panunotko. Agkantaak a danggayan ti espirituk ken ti panunotko.

¹⁶No agyamanka iti Dios babaen iti espiritu laeng, kasano a sumungbat iti “Amen” ti kadawyan a tao a makigimgimong kadakayo iti kararag ti panagyaman no dina maawatan ti sasawem?

¹⁷Uray no napintas ti kararagmo nga agyaman iti Dios, pulos a saan a matulongan dayta a tao.

¹⁸Agyamanak iti Dios ta ad-adda a naparaburanak iti pannakabalin nga agsao kadagiti karkarna a pagsasao ngem ti uray siasino kadakayo.

¹⁹Ngem iti iglesia, kaykayatko ti agsao iti lima a balikas a maawatan tapno masursuroan dagiti karkarna, ngem iti agsao iti rinibribu a balikas iti sabali a pagsasao.

²⁰Saan koma nga inuubing ti panagpampanunotyo, kakabsatko. Agbalinkayo laeng nga ubbing nga awan ammona no maipapan iti kinadakes, ngem nataengan koma ti panagpampanunotyo.

²¹Nailanad daytoy iti Nasantoan a Surat: “Kasaokto dagitoy a tattaok, kuna ti Apo, babaen kadagiti tattao a sabali ti pagsasaona, Ken babaen kadagiti bibig dagiti ganggannaet. Ngem uray no kasta, saandakto nga ipangag.”

²²Ngarud, ti panagaramat iti karkarna a pagsasao, saan a pagilasinan kadagiti mamati, no di ket kadagiti saan a mamati. Ti pannakabalin a mangipakaammo iti mensahe ti Dios, pagilasinan kadagiti mamati, saan a kadagiti di mamati.

²³No ngarud aggigimong ti entero nga iglesia ket agsao amin iti karkarna a pagsasao, ipagarup dagiti awan pammatina a makigimong nga agmauyongkayo.

²⁴Ngem no ti mensahe ti Dios ti sarsaritaen ti amin, ket maitallaong ti awan pammatina, maallukoyto nga isu ket maysa a managbasol. Maukomto babaen kadagiti amin a mangngegna.

²⁵Maiparangarangto dagiti palimed ti pusona ket agtamedto nga agdaydayaw iti Dios a kunana, “Pudno nga adda kadakayo ti Dios!”

²⁶Ania ti kayatko a sawen, kakabsatko? No aggigimongkayo, adda koma ited ti tunggal maysa: himno, pannursuro, paltiing ti Dios, mensahe iti sabali a pagsasao wenno panangilawlawag iti naisao. Masapul a maaramid amin dagitoy a pangtulong iti iglesia.

²⁷No adda agsao iti sabali a pagsasao, saan koma a nasursurok ngem dua wenno tallo ti agsisinnublat, ket adda sabali a mangipatarus.

²⁸No awan ti makaipatarus, ti agsao iti sabali a pagsasao, agulimek laengen. Ti la koma bagina ken ti Dios ti kasaona.

²⁹Dua wenno tallo a naikkan iti mensahe ti Dios ti agsao koma, ket utoben dagiti dadduma ti sawenda.

³⁰Ngem no umawat iti paltiing ti Dios ti maysa nga agtugtugaw iti gimong, masapul nga agulimek ti madama nga agsarsarita.

³¹Mabalinyo ti agsasaruno a mangipakaammo iti mensahe ti Dios tapno masursuroan ken mapapigsa ti amin.

³²Ti naikkan iti parabur a mangipakaammo iti mensahe adda kenkuana ti kinaparbeng,

³³agsipud ta ti Dios saan a Dios ti riribuk no di ket panagtutunos. Kas maar-aramid kadagiti amin nga iglesia dagiti tattao ti Dios,

³⁴agulimek koma dagiti babbai kadagiti panaggigimong iti iglesia. Saanda a mapalubosan nga agsao. Segun ti Linteg, saanda koma a mangipangulo.

³⁵No adda kayatda nga ammoen, damagenda koma kadagiti assawada no addada iti balayda. Naalas nga agsao ti babai no adda iti paggigimongan.

³⁶Dakayo kadi ti nagtaudan ti sao ti Dios? Dakayo kadi laeng ti dimmanonanna?

³⁷No adda mangipagarup nga isu ket profeta ti Dios wenno addaan iti naespirituan a sagut, masapul a bigbigenna a ti bilin ti Apo ti isursuratko kadakayo.

³⁸Ngem no dina bigbigen daytoy, diyo ikaskaso dayta a tao.

³⁹Isut' gapuna, kakabsatko, a tarigagayanyo koma a sipapasnek ti mangipakaammo iti mensahe ti Dios, ngem diyo lapdan ti panagsao iti sabali a pagsasao.

⁴⁰Masapul a maaramid nga umno ken naurnos ti amin a banag.