Read Iloko 1 Corinthians 15 Bible Online

1 Corinthians 15 - Iloko bible

1 Corinthians 15

¹Kakabsat, kayatko nga ipalagip kadakayo ti Naimbag a Damag nga inkasabak kadakayo, nga inawatyo ket pagbatayan a sititibker ti pammatiyo.

²Dayta ti ebanghelio nga inkaskasabak kadakayo. Isalakannakayo no salimetmetanyo—malaksid no barengbareng ti panamatiyo.

³Inyawatko kadakayo ti kangrunaan nga inawatko: a natay ni Cristo gapu kadagiti basoltayo, kas nailanad iti Nasantoan a Surat;

⁴a naitanem ket napagungar iti maikatlo nga aldaw, kas nailanad iti Nasantoan a Surat;

⁵a nagparang ken ni Pedro sa kadagiti sangapulo ket dua nga apostoles.

⁶Kalpasanna, nagparang iti naminsan kadagiti nasurok a limagasut a pasurotna a kaaduanna kadakuada ti sibibiag pay laeng ita, nupay natayen ti dadduma.

⁷Kalpasanna, nagparang ken ni Santiago sa kadagiti amin nga apostoles.

⁸Kamaudiananna, nagparang met kaniak, nupay arigna a nayanakak a saan a naitiempo.

⁹Ta siak ti kanunumoan kadagiti apostoles. Saan pay ketdi a rumbeng a maawaganak iti apostol ta indadanesko ti iglesia ti Dios.

¹⁰Ngem gapu iti parabur ti Dios, nagbalinak nga apostol ket natulongannak ti paraburna. Saan la a dayta, napingpingetak a nagtrabaho ngem dagiti amin nga apostoles, nupay iti kinapudnona, saan a siak ti akin-aramid no di ket ti parabur ti Dios nga adda kaniak.

¹¹Ngarud, naggapu man kaniak wenno naggapu kadakuada, daytoy ti ikasabami ket daytoy ti patienyo.

¹²Ita, yantangay ta ikaskasabami ti pannakapagungar ni Cristo, apay a kuna ti sumagmamano kadakayo a saan a mapagungar dagiti natay?

¹³No saan a mapagungar dagiti natay, saan ngarud a napagungar ni Cristo.

¹⁴Ket no saan a napagungar, awan ngarud ti serserbi ti ikasabami, kasta met ti pammatiyo.

¹⁵Maipakita pay nga ulbodkami a saksi ti Dios, ta imbagami a pinagungarna ni Cristo—ngem dina met gayam pinagungar, no pudno a di mapagungar dagiti natay.

¹⁶Ta no saan a mapagungar dagiti natay, saan met ngarud a napagungar ni Cristo.

¹⁷No di napagungar ni Cristo, awan serserbi ti pammatiyo ket agturay pay laeng ti basol iti biagyo.

¹⁸Kaipapananna pay a sawen a napukawen dagiti natay a nagtalinaed iti pammatida ken ni Cristo.

¹⁹No agpaay laeng iti daytoy a biag ti namnamatayo ken Cristo, ket awanen sabali, datayo dagiti nakakakaasi unay kadagiti amin a tao ditoy lubong.

²⁰Ngem iti kinapudnona, napagungar ni Cristo kas umuna a bunga ken pammatalged a mapagungarto met dagiti matmaturog iti tanem.

²¹Ta kas iti yaay idi ti patay gapu iti maysa a tao, kastoyto met ti pannakapagungar dagiti natay.

²²Kas iti ipapatay ti amin a tao gapu iti pannakipagmaymaysada ken ni Adan, kasta met ti panagungarto ti amin a tao gapu iti pannakipagmaymaysada ken ni Cristo.

²³Ngem tunggal maysa iti batangna: umuna, ni Cristo; kalpasanna, dagiti tattaona, inton tiempo a yaayna.

²⁴Ket umayto ti panungpalan. Pukawento ni Cristo ti amin a turay, amin a pannakabalin ken bileg, ket yawatnanto ti Pagarian iti Dios Ama.

²⁵Ta masapul nga agturay ni Cristo agingga a maparmek ti Dios ti amin a kabusorna.

²⁶Ni patay ti maudinto a kabusor a maparmek.

²⁷Ta kuna ti Nasantoan a Surat: “Amin a banag ikabil ti Dios iti babaen dagiti sakana.” Ngem nalawag a ti balikas “amin a banag,” dina iraman ti Dios a nangikabil kadagiti amin a banag iti babaen ni Cristo.

²⁸Ngem inton maikabil ti amin a banag iti babaen ti turay ni Cristo, paiturayanto ti Anak iti Dios a nangikabil iti amin iti babaenna. Ket naan-anayto ti panangituray ti Dios iti amin.

²⁹Ita, anianto ti gunggona dagiti tattao a nabuniagan a maigapu kadagiti natay? Anianto ti namnamaenda a magun-od? No pudno ti kunada a di mapagungar dagiti natay, apay ngarud a mabuniagan dagitoy a tattao maigapu kadagiti natay?

³⁰Ket iti biangmi, apay a sarangtenmi ti peggad?

³¹Kakabsat, gapu iti panangitangsitko kadakayo iti biagtayo ken ni Cristo Jesus nga Apotayo, inaldaw a sarangtek ni patay.

³²Ania ti magunggonak, no kas iti pagsasaoda, “Nakirangetak kadagiti narungsot nga ayup” idiay Efeso? Ngem no di mapagungar dagiti natay, “Mangan ken uminumtayo, ta inton bigat, mataytayo,” kas kunada.

³³Dikayo paallilaw: “Madadael ti nasayaat a kababalin gapu iti pannakikadua kadagiti dakes a tattao.”

³⁴Agsublikay iti nasayaat a panunotyo ket dikay agbasolen. Ibagak nga agbain koma ti sumagmamano kadakayo a di makaammo iti Dios.

³⁵Ngem adda dagiti agkuna, “Kasano a mapagungar dagiti natay? Anianto a kita ti bagida?”

³⁶Maag! No mangimulaka iti bukel, saan nga agtubo malaksid no matay.

³⁷Ket ti immulam, saan a ti dakkelen a mula, no di ket bukel latta, nalabit a bukel ti trigo wenno sabali a kita.

³⁸Kas pagayatan ti Dios, ikkanna ti bagi dayta a bukel. Itedna iti tunggal bukel ti tumutop a bagina.

³⁹Ket saan nga agpapada ti lasag dagiti amin a sibibiag. Maysa a kita ti lasag ti tao, sabali kadagiti ayup, sabali kadagiti tumatayab, ken sabali pay kadagiti ikan.

⁴⁰Adda dagiti bagi a nailangitan, adda met dagiti naidagaan. Adda dayag dagiti bagi a nailangitan. Sabali met ti dayag dagiti naidagaan.

⁴¹Adda kabukbukodan a dayag ti init; sabali met ti bulan. Naigiddiat met ti dayag dagiti bituen, ket uray kadakuada, agduduma ti dayagda.

⁴²Kastoyto met inton mapagungar dagiti natay. Agrupsa ti bagi no maikali. Saanen nga agrupsa no mapagungar.

⁴³Nalaad ken nakapsut no maikali. Napintas ken napigsa no mapagungar.

⁴⁴Maysa a nailasagan a bagi no maitanem. Maysa a naespirituan no mapagungar. Adda nailasagan a bagi, adda met naespirituan.

⁴⁵Ta kuna ti Nasantoan a Surat: “Ni Adan a kaunaan a tao, naparsua a naikkan iti biag.” Ngem ti maudi nga Adan, isu ti Espiritu a mangted iti biag.

⁴⁶Saan nga umuna ti naespirituan no di ket nailasagan. Sumaruno ti naespirituan.

⁴⁷Naaramid iti tapok ti umuna nga Adan. Naggapu sadi langit ti maikadua.

⁴⁸Mayarig dagiti naidagaan a bagi iti tao a naparsua iti daga. Mayasping met dagiti nailangitan a bagi iti tao a naggapu sadi langit.

⁴⁹No kasano nga immalatayo iti langa ti tao a naidagaan, umalatayto met iti langa ti Tao a nailangitan.

⁵⁰Daytoy ti kayatko a sawen, kakabsatko: Ti bagi nga adda lasag ken darana, saan a makipagtagikua iti Pagarian ti Dios. Ti agrupsa, saanna a tagikuaen ti di panagrupsa.

⁵¹Ibagak kadakayo daytoy a palimed: saantayto a matay amin, ngem mabalbaliwantayto amin iti apagdarikmat,

⁵²kas iti kapardas ti kirem, iti maudi nga aweng ti trumpeta. Ta inton agaweng ti trumpeta, mapagungarto dagiti natay. Didanto matayen ket mabalbaliwantayto amin.

⁵³Ti agrupsa a bagi, makawesanto iti saan a panagrupsa. Ti bagi a matay, makawesanto iti saan nga ipapatay.

⁵⁴Isut' gapuna nga inton makawesan ti agrupsa iti saanen a panagrupsa, ken inton makawesan ti bagi a matay iti saanen nga ipapatay, matungpalto ti Nasantoan a Surat: “Naparmeken ni Patay; naan-anayen ti balligi!”

⁵⁵“O Patay, sadino ti yan ti balligim? O Patay, sadino ti yan ti panniludmo?”

⁵⁶Ti basol ti pangalaan ni patay iti panniludna. Ti Linteg ti pangalaan met ti basol iti bilegna.

⁵⁷Ngem agyamantayo koma iti Dios a mangted iti balligi kadatayo babaen ken ni Apotayo a Jesu-Cristo.

⁵⁸Ngarud, patpatgek a kakabsat, agtalinaedkayo a natibker ken di magaraw. Kanayon a sangoenyo ti trabahoyo a maipaay iti Apo, ta ammoyo nga adda bunga ti amin nga aramidenyo iti panagserbi iti Apo.