Read Iloko 1 Corinthians 4 Bible Online

1 Corinthians 4 - Iloko bible

1 Corinthians 4

¹Masapul nga ibilangdakami a kas adipen ni Cristo ken nadutokan nga agaywan kadagiti palimed ti Dios.

²Ngem masapul a napudno ti adipen iti apona.

³Awan aniamanna kaniak no ukomendak wenno mausigak iti pangukoman ti tao. Kinapudnona, diak ukomen ti bagik.

⁴Nadalus ti konsensiak ngem saan a dayta ti mangipaneknek nga awan a pulos ti basolko. Ti Apo ti mangukom kaniak.

⁵Ngarud, saankay a mangukom agingga iti dumteng ti naituding a tiempo. Wen, urayenyo ti yaay ti Apo ta isunto ti mangilatak kadagiti palimed ken mangibutaktak kadagiti panggep a naitalimeng iti puso ti tao. Ket awatento ti tunggal tao ti kaikarianna a pammadayaw nga aggapu iti Dios.

⁶Kakabsatko, para iti pagimbaganyo, inusarko a pagarigan ti kasasaadmi ken ni Apolos tapno masursuroyo ti kaipapanan daytoy a pagsasao, “Dikayo lumbes iti adda a naisurat.” Iti ababa a pannao, tapno awan kadakayo ti mangitangsit iti maysa a tao ket umsienna ti sabali.

⁷Siasino ti namagbalin kadakayo a nangatngato ngem dagiti dadduma? Saan kadi a ti Dios ti nangted iti amin nga adda kadakayo? Ngarud, apay nga agpasindayagkayo a kasla ketdin saan a sagut dagiti adda kadakayo?

⁸Adda aminen a kasapulanyo? Babaknangkayon? Nagbalinkayo kadin nga ari, idinto a dakami, saan? Sapay koma ta pudno nga arikayon tapno makipagturaykami met kadakayo.

⁹Ta pagarupek a ti kababaan a saad ti inted ti Dios kadakami nga apostoles. Mayarigkami kadagiti tattao a nakedngan a matay iti imatang ti publiko, kas naisangsangayan a buyaen ti lubong dagiti angheles ken dagiti tattao.

¹⁰Gapu ken ni Cristo, maagkami. Ngem adu ti ammoyo maipapan kenkuana. Nakapsutkami, ngem napigsakayo. Maum-umsikami, ngem maitantan-okkayo!

¹¹Agpapan ita, kanayon nga awan umanay a kanen ken inumenmi; rutayrutay dagiti pagan-anaymi; makabkabilkami; agalla-allakami.

¹²Igaedmi ti agtrabaho tapno agbiagkami. No mailunodkami, mangbendisionkami ketdi. No maidadaneskami, ibturanmi.

¹³No padpadaksendakami dagiti tattao, nasayaat ti saomi kadakuada. Maibilangkami a basura iti lubong. Agpapan ita, mayarigkami iti rugit ti daga.

¹⁴Saanko nga isurat daytoy kadakayo tapno pabainankayo ngem bagbagaankayo a kas ay-ayatek nga annak.

¹⁵Ta uray no adda sangapulo ribu a mangaywan iti biagyo ken ni Cristo, maymaysa ti amayo. Ta iti panagbiagyo ken Cristo Jesus, nagbalinak nga amayo babaen iti panangyegko kadakayo iti Naimbag a Damag.

¹⁶Ngarud, ipakpakaasik kadakayo a tuladendak.

¹⁷Daytoy ti gapuna nga ibaonko dita ni Timoteo nga ay-ayatek ken napudno nga anakko iti Apo. Ipalagipnanto kadakayo dagiti pagulidanan a sursurotek iti baro a biag ken ni Cristo Jesus. Dagitoy met ti isursurok iti amin nga iglesia iti sadinoman a lugar.

¹⁸Timmangsiten ti sumagmamano kadakayo dita a kasla saankayo a sarungkaranen.

¹⁹Ngem no ipalubos ti Apo, umayak iti mabiit ket siakto a mismo ti mangtakuat no ania ti kabaelan nga aramiden dagitoy natangsit a tattao a ti laeng agsao ti paglainganda.

²⁰Ta ti Pagarian ti Dios saan a maipapan iti panagsao no di ket pannakabalin.

²¹Ania ti kaykayatyo: Umayak kadakayo a nakaiggem iti saplit wenno napnoan iti ayat ken kinaanus?