Read Iloko 1 Corinthians 6 Bible Online

1 Corinthians 6 - Iloko bible

1 Corinthians 6

¹No adda panggapuan ti maysa kadakayo a mangidarum iti padana a Kristiano, di ngata mabain a mangisaklang iti pangukoman dagiti saan a mamati, a saan ketdi nga iti pangukoman dagiti tattao ti Dios?

²Diyo aya ammo a dagiti tattao ti Dios ti mangukomto iti lubong? Ket no dakayto ti mangukom iti lubong, diyo kadi kabaelan nga ukomen dagiti babassit a bambanag?

³Diyo kadi ammo a datayto ti mangukom kadagiti angheles? Anianto ketdin kadagiti bambanag a maipapan iti agdama a biag!

⁴Ngarud, no tumaud dagiti kakasta a banag, idatagyo kadi kadagiti tattao nga awan pannakaibiangda iti iglesia, ket ipalubosyo nga isuda ti mangukom?

⁵Nagawan ket a bainyon! Awan aya kadakayo ti masirib a makarisut iti riri dagiti kakabsat?

⁶Nasken kadi nga agdidinnarumkayo—Kristiano kontra Kristiano—ket dagiti saan a mamati ti mangukom?

⁷Maysa a banag ti ipamatmat ti panagdidinnarumyo: Ipakitana ti pagkuranganyo. Saan kadi a nasaysayaat no maranggasan wenno masaurkayo?

⁸Ngem dakayo met laeng ti agririnnanggas ken agsisinnaur ket iramanyo pay dagiti mismo a kakabsatyo!

⁹Saanyo aya nga ammo a dinto tagikuaen dagiti managdakdakes ti Pagarian ti Dios? Dikayo paallilaw. Dagiti tattao nga immoral, dagiti agrukbab kadagiti didiosen, dagiti mannakikamalala, dagiti aggartem iti padada a lalaki wenno padada a babai

¹⁰wenno dagiti agag-agaw, naagum, mammartek, mamadpadakes wenno dagiti mannanakaw—awanto kadakuada ti makipagtagikua iti Pagarian ti Dios.

¹¹Kasta ti sumagmamano kadakayo idi. Ngem naugasankayon iti basol, naidatonkayon iti Dios, napalintegkayon iti imatang ti Dios babaen iti nagan ni Apotayo a Jesu-Cristo ken babaen iti Espiritu ti Diostayo.

¹²Adda agkuna: “Maipalubos kaniak ti amin a kayatko nga aramiden.” Wen, ngem dimo a pagimbagan ti amin a pagayatam. Mabalinko a kuna: “Maipalubos kaniak ti aniaman a banag. Nupay kasta, saanak a patagabu iti aniaman a banag.”

¹³Kuna met ti sabali: “Agpaay ti taraon iti tian, ket ti tian, para iti taraon.” Pudno dayta. Ngem agpadpadadanto a gibusan ti Dios. Ta saan nga agpaay ti bagi iti immoralidad, no di ket iti Apo. Ket ti Apo agpaay met iti bagi.

¹⁴Pinagungar ti Dios ti Apo, ket pagungarennatayto met babaen iti pannakabalinna.

¹⁵Ammoyo kadi a pasetnakayo ti bagi ni Cristo? Maisinak kadi ti maysa a paset ti bagi ni Cristo ket ikamangko iti bagi ti balangkantis? Saan a mabalin!

¹⁶No kaiddaen ti lalaki ti balangkantis a babai, diyo kadi ammo a maymaysanto ti bagida? Nalawag ti nailanad iti Nasantoan a Surat: “Maymaysanto ti bagi dagiti dua.”

¹⁷Ngem ti siasinoman a mangikamang iti bagina iti Apo, maymaysadanton iti espiritu.

¹⁸Adaywanyo ti immoralidad. Ta malaksid daytoy, uray ania ti pagbasolan ti tao, adda iti ruar ti bagina. Ngem no makikamalala, makabasol metten iti mismo a bagina.

¹⁹Diyo kadi ammo a ti bagiyo ket templo ti Espiritu Santo? Diyo kadi ammo nga agtaeng kadakayo daytoy nga Espiritu nga inted ti Dios? Saanyo a kukua ti bagiyo, no di ket kukua ti Dios.

²⁰Nangina ti inggatangna kadakayo. Ngarud, aramatenyo ti bagiyo a pakaidayawan ti Dios.