Read Iloko 1 Corinthians 9 Bible Online

1 Corinthians 9 - Iloko bible

1 Corinthians 9

¹Saanak kadi a siwayawaya? Saanak kadi a maysa nga apostol? Saanko kadi a nakita ni Jesus nga Apotayo? Saan kadi a dakayo ti bunga ti trabahok iti Apo?

²Uray no di bigbigen dagiti dadduma a maysaak nga apostol, awan duadua a dakayo, bigbigendak, ta ti kaaddayo iti sidong ti Apo ipaneknekna ti kinaapostolko.

³Daytoy ti sungbatko kadagiti mangbabalaw kaniak:

⁴Awan kadi ti kalintegak a maikkan iti taraon ken inumen a kas supapak iti trabahok?

⁵Awan kadi ti kalintegak a mangikuyog iti asawa iti panagbiahek, kas ar-aramiden dagiti dadduma nga apostoles, dagiti kakabsat ti Apo ken ni Pedro?

⁶Wenno dakami kadi laeng ken ni Bernabe ti mangged iti pagbiagmi?

⁷Adda aya soldado a gastoenna ti bukodna a kuarta iti panagserbina iti armada? Adda aya mannalon a di mangan iti bunga ti immulana iti kaubasanna? Adda aya agpaspastor a di uminum iti gatas ti karnerona?

⁸Saanen a nasken nga alaek dagitoy inaldaw a pangarigan ta kasta met ti kuna ti Linteg.

⁹Mabasatayo daytoy iti Linteg ni Moises, “Dimo busalan ti baka nga agir-irik.” Saan a dagiti baka ti pakaseknan ti Dios.

¹⁰Datayo ti kayatna a sawen idi insuratna daytoy. Wen, inturongna daytoy kadatayo. Agtrabaho ti agarado ken ti agapit ta adda namnamaenda a bingayda.

¹¹Naimulamin kadakayo ti naespirituan a bukel. Dakkel aya a banag no agapitkami kadakayo kadagiti namaterialan a gunggona?

¹²No adda kalintegan dagiti dadduma a matulongan, saan kadi a dakdakkel ti kalinteganmi? Ngem dimi inusar daytoy a kalintegan. Inibturanmi ketdi ti amin tapno awan ti uray ania a lapped iti pannakaiwaragawag ti Naimbag a Damag maipapan ken ni Cristo.

¹³Diyo kadi ammo nga agtaud iti Templo ti taraon dagiti agserserbi iti Templo ket dagiti agserserbi iti altar, makibingayda met kadagiti daton?

¹⁴Kasta met nga imbilin ti Apo a ti pagbiag dagiti mangikasaba iti ebanghelio agtaud iti daytoy a trabaho.

¹⁵Ngem diak inaramat ti uray ania kadagitoy a kalintegan. Diak met nagsurat tapno maited kaniak dagitoy. Naim-imbag pay a matayak ngem ti adda mangikkat iti panggapuak nga agpasindayag!

¹⁶Uray no ikaskasabak ti ebanghelio, awan ti kalintegak nga agparammag. Naipabaklay kaniak daytoy nga aramid, ket asiak pay no diak ikasaba ti ebanghelio!

¹⁷No bukodko a nakem ti panangaramidko iti trabahok, namnamaek a matangdananak. Ngem aramidek a kas pagrebbengak agsipud ta inted kaniak ti Dios daytoy a trabaho.

¹⁸Ania ngarud ti tangdanko? Isu daytoy: ti gundawayko a mangikasaba iti Naimbag a Damag a diak patangdanan. Iti sabali a pannao, diak kalikaguman ti kalintegak a kas agserserbi iti ebanghelio.

¹⁹Siwayawayaak. Saanak a tagabu ti uray siasinoman. Ngem patagabuak iti amin a tao tapno ad-adu pay ti maawisko.

²⁰Iti panagtrabahok kadagiti Judio, agbiagak a kas Judio tapno maawisko ida. Ket uray no dinak iturayan ti Linteg ni Moises, agbiagak a kasla paiturayan iti daytoy a linteg no agtrabahoak iti arpad dagiti tattao nga adda iti babaen daytoy a linteg tapno maawisko ida.

²¹Kasta met a no addaak kadagiti Hentil, agbiagak a kasla Hentil, iti laksid ti Linteg dagiti Judio, tapno maawisko ida. Saanna a kayat a sawen a diak agtungpal iti linteg ti Dios. Kinapudnona, addaak iti babaen ti linteg ni Cristo.

²²Iti sidong dagiti nakapuy ti pammatina, agbalinak a nakapuy a kas kadakuada tapno maawisko ida. Iti kasta, iti aniaman a pamuspusan, agbalinak a kas kadagiti amin a tattao iti amin a kasasaadda tapno adda maisalakanko kadakuada.

²³Aramidek amin dagitoy gapu iti ebanghelio tapno mairamanak iti paraburna.

²⁴Ammoyo nga agtaray dagiti amin a makilumba ngem maymaysa laeng ti mangabak. Agtaraykayo ngarud tapno magun-odyo ti gunggona.

²⁵Nainget ti disiplina ti tunggal makisalisal a mangsansanay iti bagina. Aramidenna daytoy tapno umawat iti korona a di agpaut. Ngem agtaraytayo tapno magun-odtayo ti korona nga agpaut iti agnanayon.

²⁶Isut' gapuna nga agtarayak a sipipinget agingga iti pagpatinggaan ti lumba. Saanak a nakibokboksing a kasla dumandanog iti angin.

²⁷Iruamko ti bagik iti danog ket iturayak a naan-anay tapno diak mapagtalaw kalpasan ti panangawisko kadagiti dadduma a makisalisal.