Read Iloko 2 Corinthians 1 Bible Online

2 Corinthians 1 - Iloko bible

2 Corinthians 1

¹Iti iglesia ti Dios idiay Corinto ken kadagiti amin a tattao ti Dios iti entero nga Acaya: Sapay koma ta parabur ken talna ti ited ti Dios nga Amatayo, kasta met ni Apo Jesu-Cristo. Naggapu kadakami daytoy a surat—ni Pablo nga apostol ni Cristo Jesus babaen iti pagayatan ti Dios, ken ni kabsattayo a Timoteo.

³Agyamantay iti Dios, ti Ama ni Apotayo a Jesu-Cristo; wen, ti manangngaasi nga Ama, ti Dios a pagtaudan ti pigsatayo!

⁴Tulongannatayo iti amin a sagsagabaentayo tapno matulongantayo dagiti addaan iti aniaman a pakarikutan babaen iti tulong met laeng nga inawattayo iti Dios.

⁵Ta idinto a nagsagaba ni Cristo, agsagabakami met a kas kenkuana idi ket mairamankami met iti nawadwad a tulongna babaen iti kaaddami kenkuana.

⁶Tunggal agsagabakami, agpaay daytoy iti pannakatulong ken pannakaisalakanyo. Tunggal matulongankami, matulongankayo met, ket maikkankay iti pigsa tapno maibturanyo met a siaanus ti sagsagabaenmi.

⁷Isu a dakkel ti namnamami kadakayo. Ammomi nga idinto a makipagsagabakayo kadakami, mairamankayo met iti tulong nga awatenmi.

⁸Kayatmi nga ipalagip kadakayo, kakabsat, ti parikut a naglasatanmi idiay probinsia ti Asia. Saanmin a madaeran ti kadagsen ken kaadu ti parikut a naipabaklay kadakami, ket napukawmi ti namnamami nga agbiag.

⁹Kasla nasentensiaankami a matay. Ngem napasamak daytoy tapno saankami nga agpannuray iti bagimi, no di laeng iti Dios a mamagungar kadagiti natay.

¹⁰Insalakannakami iti nakabutbuteng nga ipapatay, ket isalakannakaminto pay. Mangnamnamakami kenkuana nga isalakannakaminto manen.

¹¹Isut' gapuna a tulongandakami met babaen iti panangikararagyo kadakami. Ngarud, kayatna a sawen a masungbatanto dagiti adu a kararag nga agpaay kadakami ket bendisionannakaminto ti Dios. Adunto ti agyaman kenkuana gapu kadagiti parabur a maited kadakami.

¹²Daytoy ti pagpasindayagmi: Paneknekan ti konsensiami a ti panagbiagmi ditoy lubong, nangruna ti pannakipulapolmi kadakayo, ket inturayan ti nadalus a panggep ken nadiosan a kinapudno, babaen iti pannakabalin ti parabur ti Dios, a saan a ti sirib ti tao.

¹³Ti la maawatanyo ti isuratmi kadakayo. Saan a naan-anay ti pannakaawatyo kadakam ita, ngem namnamaek a naan-anayton a maawatandakami tapno mabalindakami nga itangsit a kas met iti panangitangsitmi kadakayo, inton Aldaw ni Apo Jesus.

¹⁵Gapu ta kapkapnekak daytoy, pinanggepko a sarungkarankayo nga umuna tapno maminduakayo a mabisita.

¹⁶Planok ngamin a sarungkarankayo inton mapanak idiay Macedonia, kasta met inton aggapuak sadiay tapno agpatulongak kadakayo iti biahek nga agpa-Judea.

¹⁷Agbaliwbaliw aya ti panunotko iti daytoy a panggepko? No adda panggepko, aramidek kadi segun ti nainlubongan a gandat, ket paggiddanek nga ibaga ti “Wen” ken “Saan”?

¹⁸Ngem kas iti kinapudno ti Dios, saan nga agbalbaliw a “Wen” ken “Saan” ti karimi kadakayo.

¹⁹Ta saan a “Wen” ken “Saan” ni Jesu-Cristo nga Anak ti Dios nga inkaskasaba kadakayo da Silas, Timoteo ken siak. Ngem isu ti “Wen” ti Dios,

²⁰ta isu ti pakatungpalan ti amin a kari ti Dios. Daytoy ti gapuna a no idaydayawtayo ti Dios, kunatayo iti “Amen” iti nagan ni Jesu-Cristo.

²¹Ti Dios ti mamagkaykaysa kadatayo ken ni Cristo. Ti Dios met laeng ti nangpili kadakami.

²²Isu ti nangikabil iti marka a kukuanakami ken isu ti nangted iti Espiritu Santo iti pusomi a kas talged ti amin nga ipaayna kadakami.

²³Awagak ti Dios a kas saksik a gapu ta diak kayat a masaktan ti riknayo, intantanko ti yaayko dita Corinto.

²⁴Dimi panggep nga ibaga kadakayo no ania ti masapul a patienyo; natibkerkayon iti pammati. Agtartrabahokami ketdi kadakayo para iti bukodyo a pagragsakan.