Read Iloko 2 Corinthians 11 Bible Online

2 Corinthians 11 - Iloko bible

2 Corinthians 11

¹Anusandak koma uray no adda bassit mamaagko. Wen, anusandak!

²Agimonak kadakayo, kas iti panagimon ti Dios. Mayarigkayo iti natarnaw a balasang nga intulagko a mayasawa laeng ken ni Cristo.

³Maamakak amangan no masabidongan ti panunotyo ket laksidenyo ti naan-anay ken nasin-aw a panagtulnogyo ken ni Cristo—kas iti pannakaallilaw ni Eva babaen iti nasikap nga uleg.

⁴Ngamin, awatenyo a siraragsak iti siasinoman nga umay mangikasaba kadakayo iti sabali a Jesus, saan a ti inkaskasabami. Ket bigbigenyo ti maysa nga espiritu ken maysa nga ebanghelio a maigiddiat iti Espiritu ken ebanghelio nga inawatyo kadakami.

⁵Ammok a saanak a nababbaba ngem dagitoy naisangsangayan nga “apostolesyo.”

⁶Nalabit a saanak a nalaing nga agsao, ngem saanak nga agkurang iti ammo. Inlawlawagmin daytoy kadakayo iti amin a tiempo ken gundaway.

⁷Awan uray sentimo a siningirko idi inkasabak kadakayo ti Naimbag a Damag. Nagpakumbabaak tapno maitan-okkayo. Basol kadi ti inaramidko?

⁸Bayat ti panagtrabahok iti arpadyo, tinangdanandak dagiti dadduma nga iglesia ket kas tay kunadan, tinakawak ida, tapno matulongankayo.

⁹Kabayatan ti kaaddak kadakayo, dikay rinengrengreng no masapulko ti kuarta. Intugot dagiti kakabsat a naggapu idiay Macedonia ti amin a masapulko. Kas iti napalabas, kastanto met iti masakbayan: Diakto agbalin a pakadagsenanyo!

¹⁰Babaen iti kinapudno ni Cristo nga adda kaniak, ikarik nga awan ti siasinoman iti entero nga Acaya ti mabalin a mangpasardeng kaniak iti daytoy a panagpasindayagko.

¹¹Apay a kunak daytoy? Gapu kadi ta dikay ay-ayaten? Ammo ti Dios nga ay-ayatenkayo!

¹²Ituloyko latta ti ar-aramidek iti agdama tapno awan panggapuan dagita nga “apostoles” nga agpaspasindayag ken agkunkuna nga agtrabahoda a kas iti panagtrabahomi.

¹³Saan a pudno nga apostoles dagitoy a tattao. Sinan-apostolesda, manangallilawda iti amin nga aramidda, ket agpammarangda a pudno nga apostoles ni Cristo.

¹⁴Saan a nakaskasdaaw daytoy! Uray ni Satanas, kabaelanna ti agparang a kasla anghel ti lawag!

¹⁵Isu a saan a nakaskasdaaw no dagiti adipenna agpammarangda nga adipen ti kinalinteg. Ngem iti kamaudiananna, madusadanto kas mayannurot kadagiti aramidda.

¹⁶Ulitek: Awan koma ti mangipagarup a maagak. Ngem no ipagarupyo a maagak, awatendak ngarud a kas maysa a maag tapno adda met sangkabassit a pagpannakkelko.

¹⁷Kinapudnona, saan a kayat ti Apo ti banag a sasawek ita. Iti daytoy a panagpasindayag, pudno nga agsasaoak a kasla maag.

¹⁸Yantangay ta adu unay ti mangipasindayag iti nailubongan nga aramidda, agpasindayagak met.

¹⁹Masiribkayo la unay isut' gapuna a siraragsakak a mangan-anus iti maag!

²⁰Ibturanyo ti pannakaadipenyo, ti pannakagundawayyo, ti pannakaumsiyo wenno ti pannakatungpayo.

²¹Mabainak a mangannugot, ngem dimi naitured nga inaramid dagita! Ngem no adda makaitured nga agpasindayag iti maysa a banag—agsasaoak a kaslaak la maysa a maag—maituredko met.

²²Hebreoda kadi? Uray siak met. Israelitada kadi? Kastaak met. Kaputotan kadi ida ni Abraham? Uray siak.

²³Adipen kadi ida ni Cristo? Kaslaak la agsasao a mauyong—ngem nalalaingak nga adipen ngem isuda! Narigrigat ti panagtrabahok. Naibalbaludak. Ad-adu ti pannakasaplitko. Ad-adu ngem isuda ti kaaddak iti ngarab ti tanem.

²⁴Naminlima a sinaplitdak dagiti Judio iti sagtatallopulo ket siam.

²⁵Namitlo a sinaplitdak dagiti Romano, ket naminsan a nauborak. Namitlo a narba ti barko a nagluganak, ket iti naminsan, maysa nga aldawko a nagpatpataw iti taaw.

²⁶Iti namin-adu a panagbiahek, nagpeggadak kadagiti layus ken tulisan. Nagpeggadak kadagiti kadaraak a Judio ken kadagiti Hentil. Adu ti peggad kadagiti siudad. Peggad kadagiti let-ang. Peggad kadagiti tengnga ti taaw. Peggad kadagiti manglimlimo a gagayyem.

²⁷Nabambannog ken narigrigatanak. Masansan a mapuyatanak. Nabisinan ken nawawak. Masansan nga awan kanek, awan balay a pagturogak wenno pagan-anayko.

²⁸Malaksid kadagiti sabali pay a banag, inaldaw a madandanaganak gapu kadagiti amin nga iglesia.

²⁹No adda kumapsut, kumapsutak met. No adda matnag iti basol, maladingitanak.

³⁰No masapul nga agpasindayagak, ipasindayagko dagiti bambanag a mangipakita iti kinakapuyko.

³¹Ti Dios ken Ama ni Apo Jesus—madaydayaw koma ti naganna iti agnanayon—ammona a saanak nga agul-ulbod.

³²Idi addaak idiay Damasco, pinaguardiaan ti gobernador nga adda iti babaen ni ari Aretas dagiti ruangan ti siudad tapno patiliwnak.

³³Ngem inkabildak iti kuribot sadak impababa iti maysa a tawa ti bakud, ket nakalibasak kenkuana.