Read Iloko 2 Corinthians 2 Bible Online

2 Corinthians 2 - Iloko bible

2 Corinthians 2

¹Daytoy ti gapuna nga inkeddengko a saanto a makapaladingit ti isasarungkarko manen kadakayo.

²Ta no pagladingitenkayo, siasinonto pay ti mangparagsak kaniak no di dakayo met laeng a pinagleddaangko?

³Imbes nga umayak, nagsuratak laengen amangan no pagladingitendak dagiti tattao a mangparagsak koma ketdi kaniak. Kapkapnekak ngamin a no naragsakak, naragsakkayo met amin.

⁴Kasta unay ti pannakariribuk ken panagdanagko idi nagsuratak kadakayo; adu a lua ti nagarubos! Ngem awan a pulos ti panggepko a mamagladingit kadakayo. Kayatko laeng a maammoanyo no kasano ti kadakkel ti ayatko kadakayo.

⁵Ita, no adda nangpaladingit iti siasinoman, saan a siak ti pinaladingitna no di dakay amin wenno nalabit ti sumagmamano kadakayo. (Kunak daytoy ta diak kayat a nagubsang ti panagsaok kenkuana.)

⁶Umdasen ti dusa nga impatay ti kaaduan kadakayo iti kasta a tao.

⁷Nupay kasta, nasken a pakawanen ken liwliwaenyo amangan no malmes iti napalalo a ladingit.

⁸Yunay-unayko ngarud nga ipatalgedyo kenkuana a pudno nga ay-ayatenyo.

⁹Daytoy ti gapuna nga insuratko dayta a surat ta kayatko a maammoan no kasano ti panaglasatyo iti pannakasuot ken no sisasaganakayo a mangtungpal kadagiti pammagbagak.

¹⁰No pakawanenyo ti siasinoman gapu iti inaramidna, pakawanek met. Ta no mamakawanak—no pudno a masapul a pakawanek ti siasinoman—aramidek gapu kadakayo iti sangoanan ni Cristo

¹¹tapno dinatayo gundawayan ni Satanas. Ammotayo dagiti panggepna.

¹²Idi dumtengak idiay Troas tapno ikasabak ti Naimbag a Damag maipapan ken ni Cristo, natakuatak a linuktan ti Apo ti dalan nga agpaay iti trabaho sadiay.

¹³Ngem nagdanagak unay ta diak nasarakan ni kabsattayo a Tito. Isu a nagpakadaak kadagiti kakabsat sadiay, ket napanak idiay Macedonia.

¹⁴Ngem yaman pay iti Dios, ta gapu iti pannakikaysami ken ni Cristo, kanayon nga ikuyognakam iti parada ti panagballigi ni Cristo. Aramatennakami ti Dios a mangisaknap iti nabanglo nga ayamuom ti pannakaammo ken Cristo kadagiti amin a tattao.

¹⁵Mayarigkami iti nabanglo nga insenso a puoran ni Cristo a maidaton iti Dios ket agwaras kadagiti maisalakan ken kadagiti mapukaw.

¹⁶Kadagiti mayaw-awan, makapatay daytoy nga ayamuom. Kadagiti maisalsalakan, maysa nga ayamuom a mangted iti biag. Siasino ngarud ti makabael iti daytoy a trabaho?

¹⁷Saankami a mayarig kadagiti kaaduan a mangipakpakaammo iti sao ti Dios a kasla ket tay tagilakon ti mensahena. Ngem gapu ta imbaonnakami ti Dios, sipupudnokami nga agsao iti sangoananna, kas adipen ni Cristo.