Read Iloko 2 Corinthians 5 Bible Online

2 Corinthians 5 - Iloko bible

2 Corinthians 5

¹Ammomi nga inton marakrak daytoy kalapaw a pagnaedantayo, nga isu ti bagitayo ditoy daga, addanto balay nga ited ti Dios a pagnaedantayo idiay langit, balay nga isu a mismo ti nangaramid ken agpaut iti agnanayon.

²Ita, agsennaaytayo ta dakkel ti tarigagaytayo a sumrek iti bukod a balay nga aggapu sadi langit.

³Iti kasta a pannakakawestayo, saantayton a lamolamo.

⁴Bayat ti panagtaengtayo iti daytoy naindagaan a kalapaw, agsennaaytayo gapu iti rigattayo; saan a gapu ta kayattayo nga iwaksi ti naindagaan a bagi, no di ket kayattayo ti makawesan iti nailangitan tapno ti matay a bagitayo makawesan iti biag.

⁵Ti Dios ti nangisagana kadatayo iti daytoy a panagbalbaliw, ket intedna ti Espirituna a kas talged ti amin nga insaganana kadatayo.

⁶Isut' gapuna a kanayon a natalgedkami. Ammomi a bayat ti panagtaengmi iti daytoy a bagi, adayokami iti Apo.

⁷Ta maidalankami babaen iti pammati, saan a babaen iti banag a makita.

⁸Natalgedkam unay ket adayo a kaykayatmi ti pumanaw iti balaymi tapno makipagnaedkami iti Apo.

⁹Nupay kasta, uray agtaengkami iti biag ditoy wenno iti sabali a biag, ikagumaanmi ti pannakaay-ayona.

¹⁰Ta masapul a dumatagtay amin iti pangukoman ni Cristo tapno awatentayo ti rumbeng nga agpaay kadatayo, segun ti inaramidtayo, naimbag man wenno dakes, bayat ti panagbiagtayo.

¹¹Ammomi ti kaipapanan ti panagbuteng iti Dios, isu nga ikagumaanmi a guyugoyen dagiti tattao. Naan-anay ti pannakaammo ti Dios kadakami. Namnamaek a kastoy met ti pannakaammoyo kaniak.

¹²Saanmi a panggep ti mangidaydayaw manen iti bagimi kadakayo. Panggepmi ketdi ti mangted iti panggapuanyo a mangipannakkel kadakami tapno masungbatanyo dagiti agpasindayag gapu iti langa a saan ketdi a ti kababalin ti tao.

¹³No agmauyongkami a kas kunada, gapu iti Dios daytoy; no manakemkami, gapu kadakayo.

¹⁴Iturayannakami ti ayat ni Cristo, ta mabigbigmi a natay ti maysa a tao nga agpaay iti amin, kayatna a sawen, nairaman ti amin a tattao iti ipapatay ni Cristo.

¹⁵Wen, natay gapu iti amin a tao tapno dagiti sibibiag dida agbiagen para iti bukodda a pagimbagan, no di ket para kenkuana a natay ken napagungar gapu kadakuada.

¹⁶Ngarud, dimi bigbigenen ti siasinoman babaen iti pagrukodan ti tao. Uray no binigbigmi idi ni Cristo babaen iti daytoy a pagrukodan, dimi aramiden itan.

¹⁷Maysa a baro a parsua ti siasinoman a mainaig ken ni Cristo. Naglabasen dagiti daan a banag ket dimtengen dagiti baro.

¹⁸Inaramid amin ti Dios daytoy. Babaen ken Cristo, inkappianakami kenkuana met laeng. Intedna kadakami ti trabaho a mangikappia kadagiti tattao kenkuana.

¹⁹Daytoy ti mensahemi: Nakikappia ti Dios iti amin a tattao babaen ken ni Cristo. Saan nga imbilang ti Dios dagiti basolda a maibusor kadakuada ket intalekna kadakami ti mensahe a mangibaga no kasano ti pannakikappiana kadakuada.

²⁰Ngarud, adtoykami a pannakangiwat ni Cristo. Kasla ti Dios a mismo ti agdawdawat kadakayo. Iti nagan ni Cristo, yunay-unaymi a makikappiakayo iti Dios!

²¹Awan basol ni Cristo. Ngem gapu kadatayo, imbaklayna dagiti basoltayo tapno iti pannakikaysatayo kenkuana, mairanudtayo iti kinalinteg ti Dios.