Read Iloko 2 Corinthians 6 Bible Online

2 Corinthians 6 - Iloko bible

2 Corinthians 6

¹Ngarud, iti pannakipagtrabahomi iti Dios, ipakpakaasimi daytoy kadakayo: Naawatyon ti parabur ti Dios ket diyo ipalubos nga awan kapaypay-anna.

²Ta kuna ti Dios, “Impangagka idi dumteng ti tiempo a pannakaipaayna, Tinulonganka idi dumteng ti aldaw nga isalakanka.” Dumngegkayo! Adtoyen ti tiempo a maiparbeng. Itan ti aldaw a pannakaisalakan!

³Dimi kayat nga adda pakababalawan ti panagserbimi. Isut' gapuna nga ikagumaanmi a lapdan ti panagbasol ti siasinoman.

⁴Ipakitami ketdi nga adipennakami ti Dios iti amin nga aramidmi. Ituredmi a siaanus dagiti sagabaen, pakarigatan ken pakariribukan.

⁵Napangpang-or, naibalbalud ken naluglugobankami. Nabambannogkamin, ket napadasanmin ti napuypuyatan ken nabisbisinan.

⁶Babaen iti kinadalus, pannakaammo iti pudno, kinaanus ken kinamanangngaasi, naipamatmatmin nga adipennakami ti Dios; babaen iti Espiritu Santo, babaen iti napudno nga ayatmi,

⁷babaen iti panangipakaammomi iti mensahe ti kinapudno ken babaen iti pannakabalin ti Dios. Kinalinteg ti igammi a dumarup ken mangsalaknib iti bagimi.

⁸Mapadpadayawan ken mapabpabainankami. Mairurrurumen ken maitantan-okkami. Kunada nga ulbodkami, ngem pudno met ti sawenmi.

⁹Kunada nga awan makaam-ammo kadakami, ngem agdindinamagkami. Kasla nataykamin, ngem kas makitayo, sibibiagkami. Uray no maparparigatkami, saankami a matay.

¹⁰Uray no mapaladingitankami, naragsakkami latta. Kasla napanglawkami, ngem pabaknangenmi ti adu a tattao. Kasla awanankami, ngem iti kinaagpaysona, addaankami.

¹¹Tattao iti Corinto, pulos nga awan inlemmengmi iti panagsaomi. Inlukatmi ti pusomi kadakayo.

¹²Dimi rinikpan ti pusomi kadakayo. Dakayo ti nangrikep iti pusoyo kadakami.

¹³Ita, kasaokayo a kas pudno nga annakko: ipakitayo met ti isu met laeng a rikna a mariknami kadakayo. Luktanyo ti pusoyo!

¹⁴Saankayo a makikadua kadagiti saan a mamati a kasla ket tay kapadayo ida, ta saan a rumbeng dayta. Kasano nga agkadua ti nalinteg ken ti nakillo? Kasano nga agtipon ti lawag ken ti sipnget?

¹⁵Kasano nga agtunos ni Cristo ken ti Diablo? Ania kadi ti pagkaysaan ti mamati ken ti saan a mamati?

¹⁶Kasano nga agkappia ti templo ti Dios ken dagiti didiosen? Ta datayo ti templo ti sibibiag a Dios. Kas kuna ti mismo a Dios: “Agyanakto iti sidongda ket makipagnaedakto kadakuada, Siakto ti Diosda ket isudanto dagiti tattaok.”

¹⁷Isut' gapuna a kuna ti Apo: “Panawanyo ida ket suminakayo kadakuada. Diyo sagiden dagiti makatulaw a banag, Ket awatenkayto.

¹⁸Siakto ti amayo, Ket dakayto ti annakko, Kuna ti Mannakabalin-amin nga Apo.”