Read Iloko 2 Corinthians 8 Bible Online

2 Corinthians 8 - Iloko bible

2 Corinthians 8

¹Kakabsat, kayatmi a maammoanyo no ania ti gapuanan ti parabur ti Dios kadagiti iglesia idiay Macedonia.

²Nakaro ti pannakasuotda kadagiti rigat a naglasatanda. Ngem kasta unay ti ragsakda ket nabulos ti panagitedda uray no nakapangpanglawda.

³Paneknekak kadakayo a nangtedda kas kabaelanda ngem sinursurokanda pay. Iti agtaud iti nakemda,

⁴sipapasnekda a nangipakpakaasi kadakami a makitimpuyogda nga agserbi kadagiti nasantoan a tattao ti Dios idiay Judea.

⁵Nasursurok pay ngem ti ninamnamami! Indatonda nga immuna ti bagida iti Apo. Kalpasanna, nagserbida met kadakami, babaen iti pagayatan ti Dios.

⁶Ni Tito ti nangirugi iti daytoy nga aramid. Isut' gapuna a dinawatmi kenkuana, idinto nga isut' nangrugi, nga ituloyna koma daytoy ket tulongannakayo koma a mangileppas iti daytoy naisangsangayan a panagserbi gapu iti ayat.

⁷Nabaknangkayo unay iti amin nga adda kadakayo: iti pammati, iti sao, iti ammo, iti gagaryo a tumulong ken iti ayatyo kadakami. Iti kasta, kayatmi a managparaburkayo met koma.

⁸Saanko nga ibilin daytoy. Ngem iti panangipakaammok iti gagar dagiti dadduma a tumulong, kayatko a mapaneknekan no pudno met laeng ti ayatyo.

⁹Ammoyo ti parabur ni Apotayo a Jesu-Cristo: Idinto a nabaknang, nagbalin a napanglaw gapu kadakayo tapno pabaknangennakayo babaen iti kinapanglawna.

¹⁰Daytoy ti ibalakadko maipapan iti daytoy a banag: Nasaysayaat no ileppasyon ti inrugiyo itay napan a tawen. Saan la a dakayo ti nangirugi, no di ket tinarigagayanyo pay daytoy a siaayat a nagtignay.

¹¹Ituloyyo ngarud ket ileppasyo ti trabahoyo! Aggagarkayo a mangileppas iti planoyo. Aramidenyo kas maibatay iti kabaelanyo nga ited.

¹²No sigagagarkayo a mangted, awatento ti Dios ti sagut a maitedyo, saan a ti awan kadakayo.

¹³Diak panggep a mapalag-anan dagiti sabali ket dakayo ti mapadagsenan. Ngem gapu ta aduankayo ita, rumbeng a tulonganyo met dagiti makasapul. Ta no dakayto met ti makasapul ket isudanto ti aduan tumulongdanto met kadakayo. Iti kasta, addanto panagpapada.

¹⁵Kas kuna ti Nasantoan a Surat: “Ti tao nga adu ti inurnongna, saan a nagsobsobraan, Ket ti bassit ti inurnongna, saan a maawanan.”

¹⁶Anian a yamanmi iti Dios gapu ta pinaggagarna ni Tito a kas kadakami a tumulong kadakayo.

¹⁷Saanna la a pinatgan ti dawatmi, no di pay ket sireregget a tumulong a naknakemna ket inkeddengna nga umayen kadakayo.

¹⁸Kadua ni Tito nga ibaonmi ti kabsat a madaydayaw iti amin nga iglesia gapu iti panangikaskasabana iti ebanghelio.

¹⁹Saan la a dayta, pinili ken dinutokan dagiti iglesia tapno makikuyog kadakami bayat ti pannakaipatungpal daytoy a panagserbi gapu iti ayat a pakaidayawan ti Apo ken tapno maipakita ti ayatmi a tumulong.

²⁰Agannadkami tapno awan ti pakababalawanmi iti pannakaimaton daytoy nabuslon a sagut.

²¹Natakneng ti panggepmi, saan la nga iti imatang ti Apo, ngem uray pay iti imatang ti tao.

²²Ipakuyogmi daytoy a kabsat kadakuada. Namin-adun a napadasmi ket napaneknekanmi a kanayon a sigagagar a tumulong. Ita ta agtalek unayen kadakayo, ad-adda manen ti gagarna a tumulong.

²³No maipapan ken ni Tito, isu ti kaduak a tumulong kadakayo. No maipapan kadagiti dadduma a kakabsat a kumuyog kenkuana, isuda ti pannakabagi dagiti iglesia ket itan-okda ni Cristo.

²⁴Ipakitayo ti ayatyo kadakuada tapno mapaneknekan ti amin nga iglesia a saankam a nagbiddut iti panangipasindayagmi kadakayo.