Read Iloko Galatians 1 Bible Online

Galatians 1 - Iloko bible

Galatians 1

¹Kadakayo a kamkameng dagiti iglesia iti Galacia, Awatenyo ti kablaawmi kadakayo, siak ken dagiti amin a kakabsat ditoy. Sapay koma ta parabur ken talna ti ited kadakayo ti Dios nga Amatayo kasta met ni Apo Jesu-Cristo. Inted ni Cristo ti biagna gapu kadagiti basbasoltayo, kas mayannurot iti pagayatan ti Dios ken Amatayo, tapno wayawayaannakayo iti daytoy agdama a lubong a napnoan iti kinadakes. Madaydayaw koma ti Dios iti agnanayon! Amen. Siak, ni Pablo, ti naggapuan daytoy a surat. Ti pannakaayabko a kas apostol ket saan a nagtaud iti tao wenno babaen iti tao no di ket nagtaud ken ni Jesu-Cristo ken iti Dios Ama a namagungar kenkuana.

⁶Masdaawak kadakayo! Naglakakayo ketdin a mangtallikud iti nangayab kadakayo babaen iti parabur ni Cristo, ket sumurotkay iti sabali nga ebanghelio!

⁷Kinaagpaysona, awan “sabali nga ebanghelio.” Kunak daytoy agsipud ta adda tattao a mangrirriribuk kadakayo ket kayatda a ballikugen ti ebanghelio ni Cristo.

⁸Ngem uray no dakami wenno maysa nga anghel nga aggapu sadi langit ti mangikasaba kadakayo iti ebanghelio a maisupadi iti inkasabamin kadakayo, mailunod koma!

⁹Nasaomi idin, ket ulitek manen, a no adda mangikasaba kadakayo iti ebanghelio a maisuppiat iti inawatyon, mailunod koma!

¹⁰Iti kastoy a panagsaok, saanko a sapsapulen ti yaanamong dagiti tattao iti sasawek. Ti pananganamong ti Dios ti sapsapulek. Panggepko kadi ti agbalin a nalatak kadagiti tattao? No kasta ti panggepko, saan a rumbeng nga adipennak ni Cristo.

¹¹Kakabsat, ibagak daytoy kadakayo: Saan nga aramid ti tao ti ebanghelio nga ikaskasabak.

¹²Saan nga inted wenno insuro daytoy iti siasinoman a tao no di ket impaltiing a mismo ni Jesu-Cristo.

¹³Nadamagyon no kasano ti panagbiagko idi napasnekak a pasurot ti Judaismo, no kasano ti nakaro a panangidadanesko ken panangipakatko iti amin a kabaelak a mangdadael iti iglesia ti Dios.

¹⁴Inartapak ti kaaduan kadagiti kasadarak ken kailiak a Judio iti panangannurot kadagiti annongen ti Judaismo. Napaspasnekak ngem isuda a nangannurot kadagiti pannursuro dagiti kapuonak.

¹⁵Ngem uray idi saanak pay a nayanak, pinilinak ti Dios babaen iti paraburna, ket inayabannak nga agserbi kenkuana.

¹⁶Idi inkeddeng ti Dios nga ipakaammo kaniak ti Anakna tapno ikasabak kadagiti Hentil ti Naimbag a Damag maipapan ken Jesu-Cristo, diak nakiuman iti uray siasinoman.

¹⁷Diak met napan idiay Jerusalem a nakiuman kadagiti apostoles nga immun-una ngem siak. Napanak ketdi a dagus idiay Arabia, ket kalpasanna, nagsubliak idiay Damasco.

¹⁸Napanak laeng idiay Jerusalem kalpasan ti tallo a tawen tapno sarungkarak ni Pedro. Nakipagtaengak kenkuana iti 15 nga aldaw.

¹⁹Awan nakitak kadagiti apostoles no di la ni Santiago a kabsat ti Apo.

²⁰Pudno daytoy nga isursuratko. Ammo ti Dios a saanak nga agul-ulbod!

²¹Kalpasanna, napanak kadagiti luglugar iti Siria ken Cilicia.

²²Kadagidi a tiempo, didak pay nakitkita dagiti Kristiano idiay Judea.

²³Ti laeng ammoda isu dagiti mangmangngegda: “Ti nangidadanes kadatayo idi, maysa itan a mangikaskasaba iti dayta met la a pammati a ginandatna a pukawen!”

²⁴Ket dinaydayawda ti Dios gapu kaniak.