Read Iloko Galatians 2 Bible Online

Galatians 2 - Iloko bible

Galatians 2

¹Nagsubliak idiay Jerusalem kalpasan ti sangapulo ket uppat a tawen. Kaduak ni Bernabe. Inkuyogko met ni Tito.

²Napanak ta impaltiing ti Dios a masapul a mapanak. Iti pannakisangok kadagiti panguloen ti iglesia, impalawagko kadakuada ti ebanghelio nga ikaskasabak kadagiti Hentil. Diak kayat nga awan ibunga ti nagbambannogak iti napalabas ken ti pagbambannogak iti agdama.

³Uray no Griego ni Tito a kaduak, saan a napilit a makugit,

⁴nupay kayat idi a kugiten ti sumagmamano a lallaki a nakitipon iti grupomi a nagpammarang a kas kakabsat. Simrek a sililimed dagitoy a tattao a kas espia tapno ammoenda ti wayawayami a nagtaud iti pannakikaysami ken ni Cristo Jesus. Kayatdakami a tagabuen,

⁵ngem pulos a dikam immannugot iti kayatda tapno masalimetmetan a sitatalged kadakayo ti kinapudno ti ebanghelio.

⁶Ngem dagiti kasla pangulo—kunak daytoy ta saan a nasken kaniak ti kinasiasinoda agsipud ta saan a kitaen ti Dios ti akinruar a langa—kunak nga awan baro a banag a naisingasingda kaniak.

⁷Nabigbigda ketdi nga inted ti Dios kaniak ti trabaho a mangikasaba iti ebanghelio kadagiti Hentil, kas met iti panangitedna iti trabaho ken ni Pedro a mangikasaba iti ebanghelio kadagiti Judio.

⁸Ta nagbalinak nga apostol kadagiti Hentil babaen iti pannakabalin ti Dios, a kas met iti panagbalin ni Pedro nga apostol kadagiti Judio.

⁹Binigbig da Santiago, Pedro ken Juan a maibilang a papangulo nga intalek ti Dios kaniak daytoy naisangsangayan a trabaho. Daytoy ti gapuna a linamanodakami ken ni Bernabe kas pakakitaan iti panagkakaduami. Nagaanamonganmi nga agtrabahokami kadagiti Hentil ket agtrabahoda met kadagiti Judio.

¹⁰Ti laeng dinawatda isu ti pananglaglagipmi kadagiti napanglaw kadakuada. Isu met ti inkagkagumaak nga ar-aramiden.

¹¹Idi immay ni Pedro idiay Antiokia, sinuppiatko iti imatang dagiti tattao agsipud ta nalawag a nagbiddut.

¹²Ngamin ta masansan idi a makilanglang kadagiti Hentil a mamati. Napasamak daytoy sakbay ti idadateng ti sumagmamano a lallaki nga imbaon ni Santiago. Ngem idi nakasangpetda sadiay, nagin-inut ni Pedro nga immadayo kadagiti Hentil ket dinan kayat ti makisango kadakuada iti panganan gapu ta kabutengna dagiti mangipapilit iti pannakakugit dagiti Hentil.

¹³Nagbuteng metten dagiti dadduma a kakabsat a Judio a kas kenkuana ket naisursurot pay ni Bernabe.

¹⁴Idi nakitak a saan a nalinteg ti ar-aramidenda ket saan a mayannurot iti kinapudno ti ebanghelio, kinunak ken ni Pedro iti sangoananda amin: “Maysaka a Judio, ngem agbibiagka a kas maysa a Hentil, saan a kas Judio. Apay a pilitem dagiti Hentil nga agbiag a kas Judio?”

¹⁵Pudno a nayanakkami a Judio, ket saankami a kas kadagiti kunkunada a Hentil a managbasol.

¹⁶Nupay kasta, ammomi a mapalinteg ti tao iti sangoanan ti Dios babaen iti panamatina ken ni Jesu-Cristo, a saan ketdi a babaen iti panangtungpalna iti ipaannurot ti Linteg. Namatikami met ken ni Cristo Jesus tapno agbalinkami a nalinteg iti sangoanan ti Dios babaen iti pammatimi ken Cristo, saan a babaen iti panagtungpal iti ipaannurot ti Linteg. Ta awan ti tao a mapalinteg iti sangoanan ti Dios babaen iti panangtungpalna iti ipaannurot ti Linteg.

¹⁷Ngarud, no maibilangkami a managbasol gapu ta ikagumaanmi ti agbalin a nalinteg iti sangoanan ti Dios babaen iti pannakikaysami ken ni Cristo, kayatna kadi a sawen a ni Cristo ti nangisungsong iti panagbasol? Saan!

¹⁸No bangonek manen ti nalpaskon a rinakrak, mapaneknekan a salsalungasingek ti Linteg.

¹⁹Ngem no maipapan iti Linteg, natayakon—ti met laeng Linteg ti nangpatay kaniak—ket iti kasta, agbiagak tapno agserbiak iti Dios. Natayakon a nairaman ken ni Cristo iti krusna.

²⁰Iti kasta, saanen a siak ti agbibiag, no di ket ni Cristo ti agbibiag kaniak. No kasano ti panagbiagko itan, agbiagak a maipaay iti pammati iti Anak ti Dios a nagayat kaniak ken nangted iti biagna gapu kaniak.

²¹Diak iwaksi ti parabur ti Dios. No mapalinteg ti tao iti sangoanan ti Dios babaen iti Linteg, awan ngarud ti serserbi ti ipapatay ni Cristo.