Read Iloko Galatians 3 Bible Online

Galatians 3 - Iloko bible

Galatians 3

¹Nagnengnengkayo ketdin a taga-Galacia! Siasino aya ti nangallilaw kadakayo? Nalawag la ngaruden a naipakita kadakayo a nailansa ni Jesu-Cristo iti krus!

²Saludsodek man daytoy: Inawatyo kadi ti Espiritu ti Dios babaen iti panangtungpalyo iti ipaannurot ti Linteg wenno babaen iti panagdengngeg ken panamatiyo iti ebanghelio?

³Nagmaagkayon! Nangrugikay iti baro a biagyo babaen iti Espiritu ti Dios. Ita, kayatyo kadin ti agpatingga babaen iti nainlasagan a wagas?

⁴Pulos kadi nga awan serserbi dagiti amin a padasyo? Kunak nga adda!

⁵Ited ti Dios ti Espirituna ken agaramid kadagiti milagro kadakayo. Aramidenna kadi dagitoy gapu ta tungtungpalenyo ti ipaannurot ti Linteg wenno gapu ta dumngeg ken mamatikayo iti ebanghelio?

⁶Ket ita, masapul nga amirisentayo ti padas ni Abraham. Kuna ti Nasantoan a Surat, “Namati ni Abraham iti Dios ket gapu iti pammatina, imbilang ti Dios a nalinteg.”

⁷Ngarud, masapul a bigbigenyo a dagiti addaan pammati isuda ti napaypayso a kaputotan ni Abraham.

⁸Impakpakauna ti Nasantoan a Surat a palintegen ti Dios dagiti Hentil babaen iti pammati. Ket naipakaammo ti Naimbag a Damag ken ni Abraham, “Sikanto ti aramaten ti Dios iti panangbendisionna iti amin a sangkataoan.”

⁹Namati ni Abraham ket nabendisionan. Mabendisionan met ngarud dagiti amin a mamati a kas kenkuana.

¹⁰Nailunod dagiti mangipagarup nga awatento ida ti Dios gapu iti panagtungpalda iti Linteg. Ta kuna ti Nasantoan a Surat, “Mailunod ti siasinoman a saan nga agtungpal iti amin a naisurat iti libro ti Linteg!”

¹¹Ita, nalawag nga awan ti agbalin a nalinteg iti sangoanan ti Dios babaen iti Linteg. Ta kuna ti Nasantoan a Surat, “Agbiagto ti pinalinteg ti Dios babaen iti pammati.”

¹²Ngem saan nga agbatay ti Linteg iti pammati, no di ket kas kuna ti Nasantoan a Surat, “Agbiagto babaen iti Linteg ti siasinoman a mangannurot iti amin nga ipaannong ti Linteg.”

¹³Ngem idi nagsagaba ni Cristo gapu kadatayo, nawayawayaannatayo iti panangukom ti Linteg. Kas kuna ti Nasantoan a Surat, “Naukom ti siasinoman a maibitin iti kayo.”

¹⁴Inaramid ni Cristo daytoy tapno maited kadagiti Hentil ti bendision nga inkari ti Dios ken ni Abraham babaen ken ni Cristo Jesus, ket awatentayo koma ti Espiritu nga inkari ti Dios babaen iti pammati.

¹⁵Kakabsat iti pammati, aramatek ti inaldaw a pangarigan: No agtulag ti dua a tao ket firmaanda ti pagtulaganda, awan ti makabalin a mangwaswas wenno mangbalbaliw iti nailanad.

¹⁶Ita, adda inkari ti Dios ken ni Abraham ken iti kaputotanna. Saan a kuna ti kari, “ken kadagiti kaputotam,” kayatna a sawen, adu a tattao; ngem kunana, “ken iti kaputotam,” kayatna a sawen, maymaysa laeng a tao nga isu ni Cristo.

¹⁷Daytoy ti kayatko a sawen: Nakitulag ti Dios ket inkarina a tungpalen dayta a tulag. Ti Linteg a naited kalpasan ti 430 a tawen dina mawaswas dayta a tulag ket dina met maukas ti kari ti Dios.

¹⁸No agbatay iti Linteg ti sagut ti Dios, saanen a maibatay iti karina. Nupay kasta, inted ti Dios ti sagutna ken ni Abraham agsipud ta inkarina kenkuana.

¹⁹Ania ngarud ti panggep ti Linteg? Naited tapno ipakitana no ania ti panagsalungasing. Nairanta nga agpatingga inton umay ti kaputotan ni Abraham a nakaitedan daytoy a kari. Dagiti angheles ti nangted iti Linteg babaen iti maysa a tao a kas mangibabaet.

²⁰Ngem saan a masapul ti mangibabaet no maymaysa laeng ti makitulag; ket maymaysa ti Dios.

²¹Kayat kadi a sawen daytoy a ti Linteg maibusor kadagiti karkari ti Dios? Saan! Ta no adda koma linteg a naituyang a mangted iti biag, mapalinteg ngarud ti tunggal maysa iti sangoanan ti Dios babaen iti panangtungpalna iti dayta a linteg.

²²Ngem kuna ti Nasantoan a Surat nga adda ti entero a lubong iti babaen iti pannakabalin ti basol tapno maited kadagiti mamati ti naikari a sagut babaen ti pammati ken ni Jesu-Cristo.

²³Ngem sakbay nga immay ti tiempo a mabalin dagiti tattao ti mamati, kaslatayo balud nga impupok ti Linteg, agingga a maiparangarang daytoy a pammati.

²⁴Ngarud, inaywanannatayo ti Linteg agingga iti yaay ni Cristo tapno agbalintayo a nalinteg iti sangoanan ti Dios babaen iti pammati.

²⁵Ita ta panawenen a mamati dagiti tattao, agpatingga metten ti panangaywan ti Linteg kadatayo.

²⁶Annaknakayo amin ti Dios babaen iti pammati gapu iti pannakipagmaymaysayo ken ni Cristo Jesus.

²⁷Nabuniagankayo iti pannakipagmaymaysayo ken ni Cristo ket iti kasta, inkawesyo a mismo ni Cristo.

²⁸Ngarud, awan ti pagdumaan ti Judio ken Hentil, ti tagabu ken ti siwawaya, ti lalaki ken ti babai: maymaysakayo amin ken ni Cristo Jesus.

²⁹No taonakayo ni Cristo, kaputotannakayo ngarud ni Abraham, ket awatenyonto ti inkari ti Dios.