Read Iloko Galatians 4 Bible Online

Galatians 4 - Iloko bible

Galatians 4

¹Kastoy ti kayatko a sawen: No ubing pay laeng ti agtawid, maibilang a tagabu nupay isu ti akinkukua iti amin.

²Adda dagiti mangaywan kenkuana ken manarawidwid kadagiti sanikua a tagikuaennanto agingga a dumanon ti tiempo nga inkeddeng ni amana.

³Tagabunatayo met idi dagiti nainlubongan a pannakabalin sakbay a nataengantayo iti espiritu.

⁴Ngem idi dimtengen ti tumutop a tiempo, imbaon ti Dios ti mismo nga Anakna. Immay a nayanak iti babai; nagbiag iti babaen ti Linteg dagiti Judio

⁵tapno subbotenna dagiti adda iti babaen ti Linteg, ket agbalintayo nga annak ti Dios.

⁶Tapno maipakita nga annaknakayo ti Dios, imbaonna ti Espiritu ti Anakna iti puspusotayo. Daytoy ti Espiritu nga umawag iti “Ama! Tatangko!”

⁷Ngarud, saankan a tagabu no di ket maysakan nga anak. Ket gapu ta anaknaka ti Dios, itedna kenka dagiti amin nga adda kenkuana nga ipatawidna kadagiti annakna.

⁸Idi saanyo pay nga ammo ti Dios, tagabunakayo dagiti parsua a sinan-dios.

⁹Ngem ita ta ammoyon ti Dios—wenno, kunak ketdi, ita ta ammonakayon ti Dios—apay a tarigagayanyo ti agsubli kadagiti nakapuy ken nakaay-ay-ay nga agturay nga espiritu? Apay a kayatyo manen ti patagabu kadakuada?

¹⁰Ngilinenyo pay ketdin dagiti ibilangyo a naisangsangayan nga aldaw, bulan, panawen ken tawen!

¹¹Yam-amakkayo, amangan no awan serserbi ti nagbannogak kadakayo.

¹²Kakabsatko, yunay-unayko nga agbalinkayo a kas kaniak yantangay ta nagbalinakon a kas kadakayo. Awan dakes nga inaramidyo kaniak.

¹³Ammoyo no apay nga inkasabak kadakayo ti ebanghelio iti umuna a gundaway; gapu ta masakitak idi.

¹⁴Nupay dakkel a nakasuotanyo ti salun-atko, didak inumsi wenno tinallikudan. Inawatdak ketdi a kas iti panangawatyo iti anghel ti Dios. Wen, inawatdak a kas iti panangawatyo ken ni Cristo Jesus.

¹⁵Kasta unay ti ragsakyo idi! Ania kadi ti napasamaken? Makunak daytoy maipapan kadakayo: No mabalin la koma, uray suatenyo pay idi dagiti matayo ket itedyo kaniak.

¹⁶Ita, nagbalinak kadin a kabusoryo gapu ta imbagak ti pudno?

¹⁷Napigsa unay ti kalikagum dagita sabali a tattao a manggun-od iti panagtalekyo, ngem saan a nasayaat ti panggepda. Kayatda laeng a maisinakayo kaniak tapno sumurotkayo kadakuada.

¹⁸Ita, nasayaat met ti kaadda iti kasta a panagkalikagum no la ket naimbag ti panggep—pudno daytoy a kankanayon, saan la a no addaak kadakayo.

¹⁹Ingungotek nga annak! Mariknak manen nga agrigatak a kas iti panagpasikal ti maysa nga ina, agingga nga agbalinkayo a pudpudno a pasurot ni Cristo.

²⁰Addaak la koma iti dennayo ita tapno agbaliw daytoy riknak. Madanaganak unay kadakayo!

²¹Saludsodek man kadakayo nga agtarigagay a paiturayan iti Linteg: Ammoyo kadi ti pudno a kaipapanan ti Linteg?

²²Naisurat nga adda dua a lallaki nga annak ni Abraham. Maysa ti anakna iti tagabu ket ti maysa, iti siwawayawaya a babai.

²³Naipasngay ti anak ti tagabu a kas iti kadawyan a pannakayanak, ngem ti anak ti siwawayawaya, naipasngay a pakatungpalan ti kari ti Dios.

²⁴Mabalin a maawatan a kas pangarigan dagitoy a bambanag. Dagiti dua a babbai, iladawanda ti dua a tulag. Ti babai a nagipasngay kadagiti tagabu nga annak isu ni Agar; iladawanna ti tulag a naaramid iti Bantay Sinai.

²⁵Iladawan ni Agar ti Bantay Sinai idiay Arabia, ket kayariganna ti agdama a siudad ti Jerusalem a natagabu agraman dagiti amin nga umili sadiay.

²⁶Ngem siwawayawaya ti nailangitan a Jerusalem, ket isu ti inatayo.

²⁷Ta kuna ti Nasantoan a Surat: “Agragsakka, babai nga awanan anak! Agpukkaw ken agdir-ika iti rag-o, Sika a di pay nakarikna iti rigat ti agpasikal! Ta ad-adunto ti anak ti babai a nabaybay-an Ngem ti babai nga adda iti denna ti asawana.”

²⁸Ita, kakabsatko, kas ken ni Isaac, annaknakayo ti Dios. Dakayo ti pakatungpalan ti karina.

²⁹Kadagidi a panawen, ti lalaki a naipasngay a kas kadagiti ubbing a kadawyan a mainaw ken mayanak, indadanesna ti naipasngay babaen iti Espiritu ti Dios. Kasta pay la ti mapaspasamak agpapan ita.

³⁰Ngem ania ti kuna ti Nasantoan a Surat? Kunana, “Pagtalawem daytoy a tagabu ken ti anakna a lalaki. Ta ti anak daytoy a tagabu saan a makipagtawid iti sanikua ni amana a kas iti panagtawid ti anak ti siwawayawaya a babai.”

³¹Ngarud, kakabsatko, saan a ti tagabu a babai ti inatayo, no di ket ti siwawaya.