Read Iloko Galatians 5 Bible Online

Galatians 5 - Iloko bible

Galatians 5

¹Winayawayaannatayo ni Cristo! Kayatna a sawen a pudno a siwawayatayo. Agtalinaedkayo ngarud a kas nawayawayaan a tattao, ket diyo ipalubos nga agbalinkayo manen a tagabu.

²Dumngegkayo. Siak ni Pablo. Ibagak kadakayo a no ipalubosyo a makugitkayo, kayatna a sawen nga awan serserbi ni Cristo kadakayo.

³Ballaagak manen ti siasinoman nga agpakugit: rebbengna a tungpalen ti entero a Linteg.

⁴No tarigagayanyo ti mapalinteg iti sangoanan ti Dios babaen iti panagtungpalyo iti Linteg, naisinakayo ken ni Cristo ket nailaksidkayo iti parabur ti Dios.

⁵Iti biangmi, namnamaenmi nga agbalinkami a nalinteg iti imatang ti Dios babaen iti pannakabalin ti Espiritu gapu iti pammatimi.

⁶Ta iti pannakikaysami ken ni Cristo Jesus, awan paggiddiatan ti pannakakugit wenno saan a pannakakugit. Ti nasken ketdi, isu ti pammati nga agtrabaho babaen iti ayat.

⁷Naimbag unay ti inrugiyo nga aramid! Siasino kadi ti nangpasardeng kadakayo nga agtulnog iti pudno? Kasano ti panangallukoyna kadakayo?

⁸Saan nga aramid daytoy ti Dios a nangayab kadakayo.

⁹Kas tay kunadan, “Ti bassit a lebadura, pabussogenna ti entero a masa.”

¹⁰Ngem gapu iti pannakikaysatayo iti Apo, agtalekak a saanyo a suroten ti sabali a kapanunotan. Dusaento ti Dios ti siasinoman a tao a mangrirriribuk kadakayo.

¹¹Iti biangko, kakabsat, no ikaskasabak a nasken ti pannakakugit, apay a maidaddadanesak pay laeng? No pudno nga ikaskasabak daytoy, awanen ti riribuk a patauden ti panangikaskasabak iti krus ni Cristo.

¹²Nayonan pay koma dagiti mangrirriribuk kadakayo ti ar-aramidenda, uray no sugatsugatenda dagiti bagbagida!

¹³Iti biangyo, kakabsatko, naayabankayo nga agwayawaya. Ngem saan a daytoy a wayawaya ti panggapuanyo a mangipalubos nga iturayannakayo ti tarigagayyo a kas tao. Agtitinnulongkayo ketdi gapu iti ayat.

¹⁴Ta madagup ti amin a Linteg iti maymaysa a bilin: “Ayatem ti padam a tao a kas iti bagim.”

¹⁵Ngem no kaskayo la kadagiti animal nga agkikinnagat ken agdidinnangran, agannadkayo amangan no agiinnibuskayo.

¹⁶Daytoy ti kayatko a sawen: ituloyyo ti paidalan iti Espiritu, ket diyo pagustoan ti tarigagay ti kinataoyo.

¹⁷Ta maibusor ti tarigagay ti Espiritu iti tarigagay ti kinatao. Maibusor met ti tarigagay ti kinatao iti tarigagay ti Espiritu. Agbinnusor dagitoy, kayatna a sawen, diyo maaramid ti kayatyo nga aramiden.

¹⁸No idalannakayo ti Espiritu, saannakayo nga iturayan ti Linteg.

¹⁹Nalawag a makita ti aramid ti kinatao. Isuda dagitoy: pannakikamalala, kinarugit, kinaderrep,

²⁰panagrukbab kadagiti didiosen, panagan-anito, panaggiginnura, panagaapa, panagiinnimon, panagpungpungtot, kinaagum,

²¹panagiinnapal, panagbarbartek, nalabes a panagragragsak ken dadduma pay a kas kadagitoy. Ballaagankayo ita a kas panangballaagko kadakayo idi a dagiti agaramid kadagitoy didanto mairaman a makipagyan iti Pagarian ti Dios.

²²Ngem ti Espiritu pataudenna ti ayat, rag-o, talna, anus, kinamanangngaasi, kinaimbag, kinamatalek,

²³kinapakumbaba ken kinamanagteppel. Awan ti linteg a maibusor kadagitoy.

²⁴Ket dagiti pasurot ni Cristo Jesus, inlansada ti daan a kinataoda agraman ti amin a gartem ken naindagaan a tarigagay.

²⁵Inikkannatayo ti Espiritu iti biag; masapul nga iturayanna met ti biagtayo.

²⁶Ditay koma agpalangguad, wenno agpipinnasakit wenno agiinnapal.