Read Iloko Galatians 6 Bible Online

Galatians 6 - Iloko bible

Galatians 6

¹Kakabsatko, no adda maduktalan nga agaramid iti aniaman a kita ti kinadakes, dakayo nga agtungtungpal iti Espiritu iturongna koma iti nasayaat a dalan. Ngem masapul a sayaatenyo a bagbagaan. Annadanyo dagiti bagbagiyo, amangan la ketdi no masulisogkayo met.

²Agtitinnulongkayo iti pakadagsenan ti tunggal maysa tapno matungpalyo ti linteg ni Cristo.

³No pagarupen ti maysa a tao nga adda kabaelanna, idinto nga awan met, al-allilawenna laeng ti bagina.

⁴Masapul nga usigen ti tunggal maysa ti bukodna nga aramid. No naimbag, mabalinna a pagpannakkel ti gapuananna. Saan a masapul nga idiligna ti gapuananna iti gapuanan ti sabali a tao.

⁵Masapul a baklayen ti tunggal maysa ti bukodna nga awit.

⁶Ti tao a masursuroan iti nakristianoan a mensahe, rebbengna nga ibingayan ti maestrona kadagiti amin nga adda kenkuana a naimbag.

⁷Diyo allilawen dagiti bagbagiyo; saan a marabrabak ti Dios. Apitento ti tao ti aniaman nga imulana.

⁸No agmula nga agpaay iti bukodna a naindagaan a tarigagay, apitennanto ti patay. No agmula nga agpaay iti Espiritu, apitennanto ti biag nga agnanayon.

⁹Isut' gapuna a ditayo koma mauma nga agaramid iti naimbag; ta dumtengto ti tiempo nga agapittayo no ditay maupay.

¹⁰Ngarud, no adda gundawaytayo, agaramidtayo iti naimbag a maipaay kadagiti amin a tattao, nangruna kadagiti kakabsatyo iti pammati.

¹¹Kitaenyo ti kadadakkel dagiti letra nga isursuratko kadakayo babaen iti mismo nga imak!

¹²Dagiti tattao a mangipapilit a makugitkayo isuda dagiti agpabuya tapno aglatakda ken mangipangas kadagiti banag a makita. Nupay kasta, aramidenda daytoy tapno malisianda ti panagsagaba a maipatay kadakuada gapu iti krus ni Cristo.

¹³Ta uray dagiti nakugit, dida met tungpalen ti Linteg; kayatda a makugitkayo tapno mabalinda nga ipasindayag nga anamonganyo daytoy a seremonia.

¹⁴Ngem iti biangko, ti laeng krus ni Apotayo a Jesu-Cristo ti pagpasindayagko; ta babaen iti krusna, natay ti lubong kaniak, ket natayak met iti lubong.

¹⁵Saan a nasken no kugit man wenno saan ti tao; ti nasken ket ti panagbalin a baro a parsua.

¹⁶No maipapan kadagiti agtungpal iti daytoy a pagalagadan iti biagda, sapay koma ta agturay ti talna ken kinaimbag—kadakuada ken kadagiti tattao ti Dios!

¹⁷Kas panggibus, kunak ti kastoy: awanen koma ti mangted kaniak iti riribuk ta ipakita dagiti piglat iti bagik a tagabunak ni Jesus.

¹⁸Kakabsatko, sapay koma ta maaddaankayo amin iti parabur ni Apotayo a Jesu-Cristo. Amen.