Read Iloko Ephesians 5 Bible Online

Ephesians 5 - Iloko bible

Ephesians 5

¹Gapu ta dakayo ti annak a patpatgen ti Dios, masapul a tumuladkayo kenkuana.

²Ti koma ayat ti mangiturong iti panagbiagyo, kas iti ayat nga impaay ni Cristo kadatayo babaen iti pannangtedna iti biagna gapu kadatayo, kas nabanglo a sagut ken daton a makaparagsak iti Dios.

³Tattaonakayo ti Dios. Saan ngarud a rumbeng nga adda pakasarsaritaanyo maipapan iti pannakikamalala wenno kinarugit wenno kinaagum.

⁴Di met tumutop nga agisawangkayo kadagiti naalas, minamaag wenno narugit a balikas. Agyamankayo ketdi iti Dios.

⁵Dikay agduadua iti daytoy: Awanto ti lugar ti mannakikamalala, narugit wenno naagum iti pagarian ni Cristo ken ti Dios. (Ta ti kinaagum ket maysa a kita ti panagrukbab iti didiosen.)

⁶Dikay paallilaw iti siasinoman babaen kadagiti ulbod a sarsarita. Dagitoy ti pakaigapuan ti panagdissuor ti pungtot ti Dios kadagiti saan nga agtulnog kenkuana.

⁷Ngarud, dikayo makikadua kadagiti kasta a tattao.

⁸Addakay idi iti sipnget, ngem gapu ta nagbalinkayon a tattao ti Apo, addakayon iti lawag. Isut' gapuna a masapul nga agbiagkayo a kas tattao a naruam nga agtaeng iti lawag.

⁹Ta ti lawag ti mangyeg iti nawadwad a bunga ti amin a kita ti kinaimbag, kinalinteg ken kinapudno.

¹⁰Birokenyo no ania ti pakaragsakan ti Apo.

¹¹Adaywanyo dagiti tattao nga agaramid kadagiti awan serserbina a banag nga agtaud iti sipnget. Ibutaktakyo ketdi ida. (

¹²Kinapudnona, nakababain uray ti panangsarita laeng kadagiti ar-aramidenda iti nalimed.)

¹³Ket inton maiparangarang ti amin a banag iti lawag, makitanto a silalatak ti pudno a kababalinda.

¹⁴Ta ti aniaman a maipalgak a silalawag agbalin a lawag. Daytoy ti gapuna a makunkuna, “Agriingka, sika a matmaturog, Bumangonka ken ni patay! Ket lawagannakanto ni Cristo.”

¹⁵Ngarud, annadanyo ti panagbiagyo. Dikay agbiag a kas nakuneng a tattao, no di ket kas mamasirib.

¹⁶Usarenyo ti amin a gundawayyo nga agaramid iti naimbag agsipud ta dakes dagitoy nga aldaw.

¹⁷Dikay ngarud agkunkuneng. Ammoenyo ketdi ti kayat ti Apo nga aramidenyo.

¹⁸Dikay agbarbartek ta isut' pakadadaelanyo. Ikagumaanyo koma ketdi nga agtaeng kadakayo ti Espiritu.

¹⁹Iti panagsasaritayo, usarenyo dagiti balikas dagiti salmo, himno ken naespirituan a kankanta. Kantaanyo ti Apo kadagiti himno ken salmo a buyogan ti naimpusoan a panagdaydayaw.

²⁰Kanayon nga agyamankayo iti Dios Ama gapu kadagiti amin a banag, iti nagan ni Apotayo a Jesu-Cristo.

²¹Paiturayankay iti maysa ken maysa kas pakakitaan iti panagraemyo ken ni Cristo.

²²Babbai, paiturayankayo kadagiti assawayo, kas iti panangituray ti Apo kadakayo.

²³Ta adda kalintegan ti lalaki a mangibaga no ania ti aramiden ti asawana, a kas met iti kaadda ti kalintegan ni Cristo a mangibaga iti aramiden ti iglesia. Ket ni Cristo a mismo ti Mangisalakan iti iglesia a bagina.

²⁴Iti kasta, masapul a paiturayan dagiti babbai kadagiti assawada iti amin a banag, a kas met iti iglesia a paiturayan ken ni Cristo.

²⁵Lallaki, ayatenyo dagiti assawayo a kas iti panagayat ni Cristo iti iglesia. Indatonna ti biagna gapu kenkuana.

²⁶Inaramidna daytoy tapno pasantoenna ti iglesia iti Dios babaen iti panangugasna iti danum ken saona,

²⁷tapno idatagna iti sangoananna met laeng: ti iglesia a kasla babai a nakapimpintas—nadalus, awan mansa wenno kuretret wenno aniaman a pakapilawanna.

²⁸Rebbeng ngarud nga ayaten ti lalaki ti asawana a kas iti panagayatna iti bagina. Ti lalaki nga agayat iti asawana, ayatenna met ti bagina. (

²⁹Ta awan ti tao a manggura iti bukodna a bagi. Taraonanna ketdi ken taripatoenna a kas iti panangtaraon ken panangtaripato ni Cristo iti iglesia.

³⁰Ta kamkamengnatayo ti bagina.)

³¹Kas kuna ti Nasantoan a Surat, “Daytoy ti gapuna a panawanto ti lalaki dagiti nagannak kenkuana. Makitiponto iti asawana ket agbalindanto a maymaysa.”

³²Adda dakkel a kinapudno nga iparangarang daytoy a paset ti Nasantoan a Surat, ket maawatak a mayaplikar daytoy ken ni Cristo ken iti iglesia.

³³Mayaplikar met daytoy kadakayo. Masapul nga ayaten ti tunggal lalaki ti asawana a kas iti bagina. Masapul met a raemen ti tunggal babai ti asawana.