Read Iloko Ephesians 6 Bible Online

Ephesians 6 - Iloko bible

Ephesians 6

¹Dakayo nga annak, agtulnogkayo kadagiti nagannak kadakayo, ta daytoy ti maiparbeng nga aramidenyo.

²“Dayawem da amam ken inam,” kuna ti umuna a bilin a napakuyogan iti kari,

³“tapno aglak-amka iti amin nga imbag ket atiddog ti biagmo ditoy daga.”

⁴Dakay a nagannak, dikay agsao wenno agaramid kadagiti banag a mamataud iti panagpungtot dagiti annakyo kadakayo. Padakkelenyo ketdi ida iti nakristianoan a pannakadisiplina ken pammagbaga.

⁵Dakay a tagabu, agtulnogkayo a sipapasnek kadagiti appoyo ket agraemkayo kadakuada. Aramidenyo daytoy a naimpusoan a kasla ni Cristo ti pagserserbianyo.

⁶Aramidenyo daytoy saan la a no kumitkitada kadakayo tapno maay-ayoda kadakayo. Ngem kas tagabu ni Cristo, aramidenyo ketdi ti pagayatan ti Dios iti amin a pusoyo.

⁷Ngarud, kas tagabu, aramidenyo a siraragsak dagiti trabahoyo a kasla ti Apo ti pagserserbianyo, a saan ket a dagiti appoyo.

⁸Tagabuka man wenno siwawaya, masiguradom a gunggonaanto ti Apo ti tunggal tao iti naimbag nga aramidna.

⁹Dakayo nga appo, kasta met koma ti umno a pannakilangenyo kadagiti tagabuyo. Isardengyon a butbutngen ida. Laglagipenyo a dakayo ken dagiti tagabuyo, agpapadakayo nga agserserbi iti maymaysa nga Apo sadi langit nga awan ti idumdumana.

¹⁰Kamaudiananna, agbalinkay a natibker iti pannakikaysayo iti Apo ken iti nabileg a pannakabalinna.

¹¹Ikawesyo ti amin a kabal nga ited ti Dios tapno mabalinyo a sarangten dagiti pangallilaw ti Diablo.

¹²Saan a dagiti tattao ti kagubgubattayo, no di ket ti armada dagiti demonio iti tangatang, dagiti agturay, dagiti pannakabalin ken dagiti didiosen wenno espiritu a pagdaydayawan dagiti tattao iti daytoy dakes a panawen.

¹³Ngarud, ikabilyo ti salaknib nga inted kadakayo ti Dios! Iti kasta, inton dumteng ti dakes nga aldaw, mabalinyonto a sarangten ti kabusor, ket kalpasan ti pannakigubatyo, addakayto pay laeng a nakatakder a sisasagana iti irarautna ma-nen.

¹⁴Ngarud, sisasaganakayo koma latta. Aramatenyo a pannakabarikesyo ti kinapudno, ti kinalinteg a kas kabal a salaknibyo

¹⁵ken ti gagaryo a mangipakaammo iti Naimbag a Damag ti talna a pannakasapatosyo.

¹⁶Mainayon kadagitoy, alaenyo pay ti pammati a pannakakalasagyo, ta iti daytoy, maiddepyonto ti amin a dumardarang a pana nga ibiat kadakayo ti Managdakdakes.

¹⁷Awatenyo met ti pannakaisalakan a pannakahelmetyo ken ti sao ti Dios nga ited ti Espiritu a pannakakampilanyo.

¹⁸Agkararagkayo bayat ti panangaramidyo kadagitoy ket iti panagkararagyo, dawatenyo a tulongannakayo ti Dios. Aniaman nga aramidenyo, agkararagkayo kas idalan ti Espiritu. Gapu iti daytoy, agsalukagkayo ket dikayo maupay. Kanayon nga idawdawatanyo dagiti amin a tattao ti Dios.

¹⁹Idawdawatandak met nga ikkannak ti Dios iti mensahe inton nakasaganaak nga agsao tapno naturedak a mangipakaammo iti palimed ti ebanghelio.

²⁰Maipuon iti daytoy nga ebanghelio, maysaak a pannakabagi ni Jesu-Cristo nupay sibabaludak. Idawdawatyo a naturedak a mangipakaammo iti daytoy, kas rebbengko nga aramiden.

²¹Ipakaammonto kadakayo ni Tikico ti amin a damag maipapan kaniak tapno maammoanyo ti kasasaadko. Napateg a kabsattayo ni Tikico ken mapagtalkan nga adipen iti trabaho ti Apo.

²²Daytoy ti gapuna nga ibaonko nga umay kadakayo—tapno ibagana kadakayo ti kasasaadmi amin, ket iti kasta, pumigsa ti pakinakemyo.

²³Sapay koma ta ited ti Dios Ama, kasta met ni Apo Jesu-Cristo, ti talna ken ayat a buyogen ti pammati kadagiti amin a kakabsat.

²⁴Sapay koma ta adda ti parabur ti Dios kadagiti amin a di agressat ti panagayatna ken ni Apotayo a Jesu-Cristo.