Read Iloko Philippians 1 Bible Online

Philippians 1 - Iloko bible

Philippians 1

¹Kadagiti amin a tattao ti Dios nga agnaed dita Filipos, isuda a makipagkaykaysa ken ni Cristo Jesus, kasta met kadagiti panglakayen ken nadutokan a katulongan iti iglesia, Sapay koma ta parabur ken talna ti ited kadakayo ti Dios nga Amatayo ken ni Apo Jesu-Cristo. Naggapu kadakami daytoy a surat—da Pablo ken Timoteo—nga adipen ni Cristo Jesus.

³Agyamanak iti Diosko tunggal malagipkayo. Tunggal idawdawatankayo, agkararagak a sirarag-o gapu iti panangtulongyo kaniak iti pannakaisaknap ti ebanghelio manipud idi damo a naikasaba kadakayo agingga ita.

⁶Kapkapnekak a ti Dios a nangirugi iti daytoy naimbag nga aramid kadakayo, ileppasna agingga iti Aldaw a panagsubli ni Cristo Jesus.

⁷Kanayon nga addakayo iti pusok. Maiparbeng a kastoy ti riknak kadakayo ta nakiramankay amin iti daytoy a parabur nga impangruna nga inted ti Dios kaniak, uray idi siwayawayaak pay a mangsalaknib ken mangpatalged iti ebanghelio, ken uray pay ita nga addaak iti pagbaludan.

⁸Ammo ti Dios a pudno ti kunak a kasla kadakkel ti ayat ni Cristo Jesus daytoy nga iliwko kadakayo.

⁹Ikararagko a dumakkel koma a dumakkel ti ayatyo agraman pudno a pannakaammo ken naan-anay a pannakaawat

¹⁰tapno mabalinyo a pilien ti kasayaatan. Iti kasta, awanto ti aniaman a kinarugit ken pakababalawanyo inton Aldaw a panagsubli ni Cristo.

¹¹Mapnonto ti biagyo iti pudno a kinaimbag a ni laeng Jesu-Cristo ti makaaramid ket daytoy ti pakaitan-okan ken pakaidaydayawan ti Dios.

¹²Kakabsatko iti pammati, kayatko a maammoanyo a pudno a nakatulong iti pannakaisaknap ti ebanghelio dagiti napasamak kaniak.

¹³Kas bungana, ammo dagiti amin a guardia iti palasio ken amin nga adda ditoy a naibaludak gapu ta adipennak ni Cristo.

¹⁴Ket gapu iti pannakaibaludko, immad-adda ti panagtalek ti kaaduan kadagiti kakabsat iti Apo. Iti kasta, timmuredda a mangikaskasaba iti mensahe nga awan pagbutnganda.

¹⁵Agpayso nga ikasaba ti sumagmamano kadakuada ti naimbag a damag maipapan ken ni Cristo gapu ta naapal ken mannakiapada. Ikasaba met ti dadduma ta nadalus ti panggepda.

¹⁶Aramidenda ti kasta gapu iti ayat, ta ammoda nga inted ti Dios kaniak ti trabaho a mangsalaknib iti ebanghelio.

¹⁷Aginkukuna dagiti dadduma a mangikasaba iti maipapan ken ni Cristo, ta mangasabada gapu iti agum. Ipagarupda a manayonanda ti rigatko iti kaaddak iti pagbaludan.

¹⁸Ngem ania ngarud ti mabalinko? Maragsakanak ketdi iti napasamak—ti nasken ket maikasaba ni Cristo iti uray ania a pamuspusan, naimbag man ti panggepda wenno agpaay laeng iti pagimbaganda. Wen, agragsakakto latta,

¹⁹ta ammok a mawayawayaanakto babaen kadagiti kararagyo ken iti tulong ti Espiritu ni Jesu-Cristo.

²⁰Nasged ti tarigagay ken namnamak a diak koma agliway iti pagrebbengak uray kaanoman, no di ket kankanayon koma, nangruna ita, a mapnoak iti tured, tapno babaen iti bagik, maidayaw ni Cristo, agbiagak man wenno matayak.

²¹Ta ania ngamin ti biag? Kaniak la a biang, ti biag isu ti panagserbi ken ni Cristo ket ti ipapatay ibilangko a gunggona, saan a pannakapukaw.

²²Ngem no babaen iti panagbiagko, ad-adu ti maaramidko a napateg, diak maibaga no ania ti piliek

²³ta agin-innagaw kaniak dagitoy dua. Tarigagayak unay ti sumina iti daytoy a biag ket tumiponak ken ni Cristo—nasaysayaat daytoy para kaniak.

²⁴Ngem nasken unay nga agbiagak pay gapu kadakayo.

²⁵Awan duaduak iti daytoy; isut' gapuna nga ammok nga agbiagak pay. Makipagbiagak pay kadakayo amin tapno nayonak ti panagrang-ay ken panagrag-oyo iti pammati.

²⁶Isut' gapuna nga inton addaak manen iti dennayo, ad-addanto pay ti panggapuanyo a mangipannakkel kaniak iti panagbiagyo ken ni Cristo Jesus.

²⁷Mayannurot koma ngarud ti panagbiagyo iti ebanghelio ni Cristo, ta sarungkarankayo man wenno saan, madamagko koma a natibkerkayo iti maymaysa a panggep, ken sangsangkamaysakayo a makidangadang gapu iti pammati a naibatay iti ebanghelio.

²⁸Dikay agbuteng kadagiti kabusoryo. Agturedkayo a kankanayon. Daytoy ti mangipakita kadakuada a maabakdanto, ngem agballigikayto ta pagballigiennakayo ti Dios!

²⁹Ta naited kadakayo ti gundaway nga agserbi ken ni Cristo, saan laeng a babaen iti panamatiyo kenkuana, no di pay ket iti panagsagabayo gapu kenkuana.

³⁰Ita, kaduakayon a makiranget iti dangadang a nakitayo a nakirangrangetak iti napalabas ken, kas madamdamagyo, pakirangrangetak pay laeng.