Read Iloko Philippians 2 Bible Online

Philippians 2 - Iloko bible

Philippians 2

¹Mapapigsakayo iti panagbiagyo ken ni Cristo ken maliwliwakayo gapu iti ayatna. Adda pannakikadkaduayo iti Espiritu ket agdidinnungngo ken makipagriknakayo iti tunggal maysa.

²Dawatek ngarud kadakayo nga itedyo ti naan-anay a ragsakko babaen iti panagmaymaysayo iti panunot, ayat, kararua ken nakem.

³Dikay agaramid iti aniaman gapu iti kinaagum wenno kinapalangguad. Agpakumbabakayo ketdi iti maysa ken maysa ket diyo ipagarup a naim-imbagkayo ngem dagiti dadduma.

⁴Saan la a ti pagimbaganyo ti kitaenyo. Kitaenyo met ti pagimbagan ti tunggal maysa.

⁵Adda koma kadakayo ti kababalin a kas iti kababalin ni Cristo Jesus:

⁶Nupay addaan iti galad ti Dios, Dina inkankano ti pannakipadana kenkuana.

⁷Siaayat ketdi a nangibaba iti bagina Ket innalana ti kasasaad ti maysa nga adipen. Nagbalin a tao, nagparang iti nataoan a langa.

⁸Nagpakumbaba ket nagtulnog agingga ken ni patay, wen, uray iti ipapatayna iti krus.

⁹Gapu iti daytoy, intan-ok ti Dios iti kangatoan a saad, Ket intedna kenkuana ti nagan a natantan-ok ngem ti amin a nagan.

¹⁰Iti kasta, kas pammadayaw iti nagan ni Jesus, Agparintumeng dagiti amin a parsua sadi langit, ditoy daga ken iti uneg ti daga.

¹¹Ket silalatak nga ipablaak ti amin a tao a ni Jesu-Cristo isu ti Apo, a pakaidaydayawan ti Dios Ama.

¹²Isut' gapuna, ingungotek a gagayyem, a no kasano ti kanayon a panagtulnogyo idi addaak kadakayo, ad-adda pay koma ita ta awanak iti dennayo. Agtrabahokayo a sipapasnek ken naan-anay ti panagraem ken panagdayawyo iti Dios agingga nga awan pagkurangan ti pannakaisalakanyo.

¹³Kankanayon ngamin nga agtrabaho ti Dios kadakayo tapno pagbalinennakayo a siaayat ken madadaan nga agtungpal iti panggepna.

¹⁴Iti uray ania nga aramidenyo, dikay agtantanabutob wenno agsusuppiat,

¹⁵tapno awan pakababalawanyo ket nadaluskayo, kas awan mulitna nga annak ti Dios nga agnaed iti lubong a napno iti agkakadakes ken managbasol a tattao. Bayat ti panangipaayyo kadakuada iti mensahe a mangted iti biag, agraniagkayo kadakuada a kas silaw tapno addanto panggapuak a mangitangsit kadakayo inton Aldaw a panagsubli ni Cristo. Ta maipakitanto a nasayaat ti nagbanagan ti amin a nagbambannogak.

¹⁷Agragsakak uray no masapul a maibuyat ti darak a mainayon iti sakrifisio nga idaton ti pammatiyo iti Dios.

¹⁸Kasta met a masapul nga agragsakkayo ket makipagrag-okayo kaniak.

¹⁹Iti mabiit, no ipalubos ni Apo Jesus, ibaonkonto kadakayo ni Timoteo tapno ammoenna ti kasasaadyo ket maparegtaak no maammoak ti maipapan kadakayo.

²⁰Isu laeng ti makipagrikna kaniak. Isu laeng ti napaypayso a mangisakit kadakayo.

²¹Awan ti sabali a birbiroken dagiti dadduma a tattao no saan la a ti bukodda a pagsayaatan. Dida pampanunoten no kasano a maaramidda ti pagayatan ni Jesu-Cristo.

²²Ammoyo ti kabaelan ni Timoteo, ta kaskami la agama a nagtrabaho maipuon iti ebanghelio.

²³Namnamaek ngarud nga ibaon ni Timoteo kadakayo apaman a maammoak ti pagbanagak.

²⁴Agtalekak iti Apo a makaumayak met laengen kadakayo iti saanen a mabayag.

²⁵Napanunotko a masapul a pagsubliekon kadakayo ni kabsattayo nga Epafrodito, maysa a katrabahoak ken kaduak a nakidangadang. Isu ti dinutokanyo nga agserbi a kas pannakabagiyo a tumulong kaniak.

²⁶Mailiw a kumita kadakayo amin, ket madanagan unay agsipud ta naammoanna a nadamagyo kano a nagsakit.

²⁷Agpayso a nagsakit ket nagistayan natay, ngem kinaasian ti Dios. Saan laeng nga isu ti kinaasian ti Dios, ngem uray pay siak, ta inlisinak iti dakdakkel a ladingit.

²⁸Ad-adda ngarud ti gagarko a mangibaon ken ni Epafrodito, tapno maragsakankayo a makakita manen kenkuana, ket mapukaw metten ti ladingitko.

²⁹Awatenyo ngarud a sirarag-o a kas maysa a kabsat iti Apo. Ipakitayo ti pammadayawyo kadagiti amin a kas kenkuana,

³⁰ta impustana ti biagna ket nagistayan natay gapu iti trabaho ni Cristo tapno maitedna kaniak ti tulong a saanyo a mabalin nga ited.