Read Iloko Philippians 3 Bible Online

Philippians 3 - Iloko bible

Philippians 3

¹Kamaudiananna, kakabsatko, agragsakkayo koma gapu iti pannakikaysayo iti Apo. Diak rigaten nga ulit-uliten kadakayo dagitoy a bambanag nga insuratkon, ket mayadayokayo iti peggad.

²Agannadkayo kadagiti aso. Agannadkayo kadagiti tattao nga agaramid iti dakes. Agannadkayo kadagiti tattao a mangipapilit iti pannakakugit.

³Datayo, saan nga isuda, ti pudno a nakugit ta agdaydayawtayo iti Dios babaen iti Espirituna. Agrag-otayo ta ti biagtayo adda ken Cristo Jesus ket saantayo nga agtalek kadagiti seremonia.

⁴Mabalinko met ketdi ti agtalek kadagiti kakasta a bambanag. No adda mangipagarup a mabalinna ti agtalek kadagiti seremonia, dakdakkel pay ti panagtalekko.

⁵Nakugitak iti maikawalo nga aldaw kalpasan ti pannakayanakko. Nayanakak nga Israelita iti tribu ti Benjamin. Maysaak a puro a Hebreo. Kas maysa a Fariseo, inannurotko idi ti Linteg dagiti Judio.

⁶Napasnekak unay idi nga agaramid kadagiti impagarupko a pagayatan ti Dios, ket urayko la indadanes dagiti tattao ti iglesia. No maipapan iti panagtungpal iti Linteg, awan idi ti pakababalawak.

⁷Ngem dagiti amin nga imbilangko a gunggona, mabigbigko itan nga awan pategda, gapu ken Cristo.

⁸Wen, ibilangko amin a pukaw tapno magun-odko ti napatpateg nga isu ti pannakaammo ken ni Cristo Jesus nga Apok. Gapu kenkuana, binaybay-akon ti amin a masansan idi nga aramidek. Imbellengko aminen ida a kas rugit tapno, kas kunadan, magun-odko ni Cristo,

⁹ket awan ti pagkurangan ti pannakikaysak kenkuana. Awanen ti bukodko a kinalinteg, wen, ti kinalinteg a magun-od babaen iti panagtungpal iti Linteg. Adda kaniakon ti kinalinteg a magun-od babaen iti pammati ken ni Cristo; wen, ti kinalinteg nga agtaud iti Dios, ken maibatay iti pammati.

¹⁰Ti la tarigagayak isu ti pannakaammok ken ni Cristo, ti pannakapadasko iti pannakabalin ti panagungarna, ti pannakipagsagabak kenkuana ken ti panagbalinko a kas kenkuana iti ipapatayna,

¹¹iti namnamak a mapagungarakto met.

¹²Diak kunaen a nagballigiakon wenno awanen ti pagkurangak. Ngem itultuloyko nga ikabil ti amin a kabaelak a manggun-od iti gunggona. Daytoy ti panggep nga adda iti panunot ni Cristo Jesus idi inawisnak a sumurot kenkuana.

¹³Kinapudnona, kakabsat, diak ibaga a naragpatkon daytoy. Aramidek ketdi ti maysa a banag: Lipatek amin a napalabas ket ipakatko ti amin a kabaelak a manggun-od iti adda iti masangoanan.

¹⁴Iti kasta, sipipingetak nga agtaray nga agturong iti pagtungpalan tapno magun-odko ti gunggona a yaw-awis ti Dios kadatayo babaen ken Cristo Jesus.

¹⁵Ngarud, kastoy met la koma ti riknatay amin a nataengan iti pammati. No adda sumagmamano kadakayo a maigiddiat ti riknana, ilawlawagto ti Dios daytoy.

¹⁶Ngem uray no anianto dayta, agtuloytayo nga agturong iti masangoanan kas mayannurot iti mismo a pagalagadan a tinungtungpaltayo agingga ita.

¹⁷Itultuloyyo, kakabsatko, ti tumulad kaniak. Impakitamin kadakayo ti umno a pagtuladanyo. Siputanyo a naimbag dagiti sumurot iti daytoy a pagtuladan.

¹⁸Namin-adun nga imbagak daytoy kadakayo, ket agsangitak a mangibaga manen nga adu dagiti mangdaddadael iti kaipapanan ti ipapatay ni Cristo iti krus gapu iti kita ti panagbiagda.

¹⁹Agtungpaldanto idiay infierno. Ibilangda ngamin a diosda dagiti paggarteman ti bagida. Pagpalangguadda dagiti rebbengda koma ketdi nga ibain, ket dagiti laeng nailubongan a bambanag ti pampanunotenda.

²⁰Ngem datayo, makipagilitayo sadi langit, ket sigagagartayo nga agur-uray iti yaay ti Mangisalakan kadatayo nga aggapu sadi langit, ni Apo Jesu-Cristo.

²¹Baliwannanto daytoy nakapuy ken matay a bagitayo. Pagbalinennanto a kas iti nagloriaan a bagina babaen iti isu met laeng a pannakabalin a mamagturay kenkuana iti amin a banag.