Read Iloko Philippians 4 Bible Online

Philippians 4 - Iloko bible

Philippians 4

¹Kakabsatko, napategkay unay kaniak, ket mailiwak kadakayo! Dakayo ti ragsak ken balangatko! Isut' gapuna, ay-ayatek a kakabsat, nga agtalinaedkayo a sititibker iti panagbiagyo iti Apo.

²Ipakpakaasik kadakayo, Evodias ken Sintike, nga agtunoskayo koma a kas agkabsat iti Apo.

³Kasta met kenka a mapagtalkan a katulongak, kayatko a tulongam dagitoy dua a babbai. Impasnekda ti timmulong kaniak iti pannakaisaknap ti ebanghelio, agraman ni Clemente ken dagiti amin a katrabahoak a nailanad ti naganda iti libro ti biag.

⁴Kankanayon koma nga agrag-okayo iti Apo. Kunak manen: agrag-okayo!

⁵Ipakitayo ti kinaanusyo kadagiti amin a tattao. Asidegen ti yaay ti Apo.

⁶Awan koma ti pakadanaganyo, ngem tunggal agkararagkayo iti Dios ket agdawatkayo, diyo liplipatan ti agyaman kenkuana.

⁷Aywanannakayto ti talna ti Dios a di matukod a panunoten ti tao tapno natalged dagiti puso ken panunotyo iti pannakikaysayo ken ni Cristo Jesus.

⁸Kamaudiananna, kakabsatko, panunotenyo laeng dagiti bambanag a naimbag ken maikari a raemen: dagiti napudno, natakneng, nalinteg, nadalus, napintas, ken nadayaw.

⁹Ipakatyo dagiti inadal ken inawatyo kaniak—dagiti nangngegyo a sinaok ken nakitayo nga inaramidko—ket addanto kadakayo ti Dios a mangted iti talnayo.

¹⁰Nagdakkelen ti rag-ok iti panagbiagko iti Apo! Kalpasan ti nabayag a tiempo, gundawayyo manen nga ipakita ti panangipategyo kaniak. Diak kayat a sawen a naumakayon. Awan la ti gundawayyo idi a mangipakita iti panangipategyo kaniak.

¹¹Diak met kuna daytoy gapu ta mariknak a nabaybay-anak. Nasursurokon ti mapnek iti aniaman nga adda kaniak.

¹²Ammok ti rikna ti makurkurangan. Ammok met ti rikna ti aglaplapusanan. Nasursurok daytoy a palimed, tapno iti sadinoman, iti amin a tiempo, mabsogak man wenno mabisinak, aglaplapunosanak man wenno agkurkurangak, mariknak latta ti pannakapnek.

¹³Kabaelak a sarangten ti aniaman a banag babaen iti pannakabalin nga ited kaniak ni Cristo.

¹⁴Nupay kasta, naimbagkayo unay ta tinulongandak kadagiti rigatko.

¹⁵Dakayo a taga-Filipos, ammoyo a dakayo laeng ti iglesia a timmulong kaniak idi pimmanawak idiay Macedonia, idi mairugi a maikaskasaba ti Naimbag a Damag. Dakayo laeng ti nakiraman kadagiti gunggona ken pukawko.

¹⁶Saan laeng a namimpinsan nga impaw-itandak iti tulongyo idi masapulko ti tulong idiay Tesalonica.

¹⁷Saan a gapu ta kayatko laeng ti umawat kadagiti sagut; tarigagayak ketdi a makita ti ad-adu pay a naimbag nga aramid a mainayon iti aramidyo.

¹⁸Adtoy ngarud nga awatek dagiti amin nga intedyo kaniak, ket agyamanak unay. Nagsursurok pay ti intedyo. Adda aminen a masapulko, ita ta inyeg ni Epafrodito dagiti amin a sagutyo. Arigda ti daton a nabanglo ti ayamuomna iti Dios, maysa a sakrifisio a maikari ken makaparagsak kenkuana.

¹⁹Ket itedto ti Diosko ti amin a masapulyo babaen iti nawadwad a kinabaknangna ken Cristo Jesus.

²⁰Madaydayaw koma ti Dios ken Amatayo iti agnanayon. Amen.

²¹Kablaawak dagiti amin a tattao ti Dios ken ni Cristo Jesus. Pakomustaandakayo dagiti kakabsat a kaduak ditoy.

²²Pakomustaandakayo met dagiti amin a tattao ti Dios ditoy, nangruna dagiti agserserbi iti palasio ti Emperador.

²³Sapay koma ta adda kadakay amin ti parabur ni Apo Jesu-Cristo.