Read Iloko Colossians 2 Bible Online

Colossians 2 - Iloko bible

Colossians 2

¹Kayatko a maammoanyo ti rigatko a nagtrabaho a tumulong kadakayo kasta met kadagiti taga-Laodicea ken amin a saan pay a nakakita kaniak.

²Aramidek daytoy tapno mapapigsada ken agmaymaysada iti ayat ket mapnoda iti kinabaknang ti namnama nga ited ti napudpudno a pannakaawat. Iti kasta, maammoanda ti palimed ti Dios nga isu met laeng ni Cristo, ket

³isu ti nangiparang iti amin a gameng ti kinasirib ken pannakaammo.

⁴Ibagak ngarud kadakayo a diyo itulok nga adda mangallilaw kadakayo babaen kadagiti makaay-ayo a denggen a sao.

⁵Uray awanak kadakayo a sibabagi, addaak kadakayo iti espiritu. Maragsakanak a makaammo a nairut ken natibker ti panagmaymaysayo nga agtalinaed iti pammatiyo ken Cristo.

⁶Yantangay ta inawatyon ni Cristo Jesus a kas Apo, agbiagkayo koma a mainaig kenkuana.

⁷Mairamut ken maipasdek koma ti biagyo kenkuana, ken pumigsa ti pammatiyo kenkuana kas naisuro kadakayo. Ken kanayonkayo nga agyaman.

⁸Ngarud, agannadkayo tapno dinakay adipenen ti kinasirib nga aggapu kadagiti sursuro nga impatawid dagiti tattao ken dagiti espiritu nga agturay iti lubong. Awan serserbi ken mangallilaw dagitoy a pampanunot ket saanda nga aggapu ken Cristo.

⁹Ngamin, agtaeng ken Cristo a kas tao ti amin a galad ti Dios,

¹⁰ket iti pannakikaysayo kenkuana, inawatyo met ti pudno a biag. Ta nangatngato ni Cristo ngem ti amin turay ken pannakabalin.

¹¹Nakugitkayo iti pannakikaysayo ken Cristo, saan nga iti pannakakugit nga aramid ti tao, no di ket iti pannakakugit nga agtaud ken ni Cristo—ti panangiwaksiyo iti daytoy managbasol a bagi.

¹²Ta idi nabuniagankayo, naitanemkayon a nairaman ken Cristo, ket iti dayta a pannakabuniagyo, napagungarkayo met a kas kenkuana gapu iti panamatiyo iti nabileg a pannakabalin ti Dios a namagungar kenkuana.

¹³Adda idi panawen a naibilangkayo a natay iti espiritu gapu ta managbasolkayo ken gapu ta saankayo a Judio, kayatna a sawen, awan ti linteg ni Moises kadakayo. Ngem ita, pinagungarnakayo ti Dios kas iti pinangpagungarna ken ni Cristo. Pinakawan ti Dios ti amin a basoltayo.

¹⁴Pinunasna ti listaan dagiti basbasoltayo agraman dagiti kakuykuyogna a paglintegan, ket dinadaelna ti kaipapanan daytoy babaen ti panangilansana iti krus.

¹⁵Iti dayta a krus, pinarmek ni Cristo dagiti naespirituan nga agtuturay ken pannakabalin. Impabuyana ida a sipupungo iti parada ti panagballigina.

¹⁶Isut' gapuna a manipud ita, diyo itulok nga adda mangikeddeng iti kanen ken inumenyo, wenno ti aldaw a rambakanyo, wenno ti Fiesta ti Baro a Bulan, wenno ti maipapan iti Aldaw a Panaginana.

¹⁷Amin dagitoy, anniniwan laeng dagiti umayto; ngem ti pudpudno ket isu ni Cristo.

¹⁸Diyo ipalubos nga adda mangsaur kadakayo iti gunggonayo, isu a mangibagbaga nga ad-adda a nangnangruna ngem dagiti dadduma gapu kadagiti parmatana ken mangipapilit iti panagimpapakumbaba ken iti panagdayaw kadagiti angheles. Napalangguad nga awan gapuna ti kasta a tao. Nailubongan ti panagpampanunotna.

¹⁹Insardengnan ti panagtalinaedna ken Cristo nga ulo ti bagi. Ni Cristo ti mangtaraon iti entero a bagi, ken pagkakamangenna dagiti nagsusuopan ken ur-uratna ket padakkelenna segun iti kayat ti Dios a panagdakkelna.

²⁰Iti ipapatay ni Cristo, nataykayo metten ket naisinakayon kadagiti espiritu nga agturay iti lubong. Apay ngarud nga agbibiagkayo pay laeng a kasla taga-lubong? Apay a tungpalenyo dagiti kakastoy a bilin:

²¹“Dimo iggaman daytoy,” “Dimo ramanan dayta,” “Dimo sagiden daydiay”?

²²Mayaplikar amin daytoy kadagiti bambanag nga agbalin nga awan serserbina apaman a mausarda. Pagalagadan ken pannursuro laeng ida ti tao.

²³Agpayso a kasla naibatay iti kinasirib dagitoy nga annuroten: inkapilitan a panagdayaw kadagiti angheles, panagimpapakumbaba, ken nakaro a panangparigat iti bagi. Ngem awan serserbida ta dida kabaelan a tenglen ti panaggartem ti bagi.