Read Iloko Colossians 3 Bible Online

Colossians 3 - Iloko bible

Colossians 3

¹Idi napagungar ni Cristo, napagungarkayo met. Ngarud, birokenyo dagiti adda idiay langit a yan ni Cristo a situtugaw iti tronona, iti makannawan ti Dios.

²Panunotenyo dagiti adda sadiay, saan a dagiti adda ditoy daga.

³Ta nataykayon. Naidulinen ti biagyo iti Dios iti pannakikaysayo ken ni Cristo.

⁴Ni Cristo ti pudno a biagyo. Inton agparang, addakayto met a kaduana ket mairanudkayto iti gloriana!

⁵Ngarud, masapul nga iwaksiyo dagiti naidagaan a tarigagay a kas iti immoralidad, kinarugit, kinaderrep, kinarugso ken kinaagum (ta ti kinaagum maysa a kita ti panagrukbab iti didiosen).

⁶Gapu kadagitoy, agdissuorto ti pungtot ti Dios kadagiti saan nga agtulnog kenkuana.

⁷Adda idi tiempo a nagbibiagkayo kadagiti kasta a panaggartem, idi iturayannakayo dagita a tarigagay.

⁸Ngem ita, masapul nga idianyo amin dagitoy: pungtot, derrep ken gura. Dikay agsao iti makapabain. Awan koma ti narugit a balikas nga agaon kadagiti bibigyo.

⁹Dikay agiinnulbod, ta inuksobyon ti daan a kinatao agraman dagiti ugalina,

¹⁰ket inkawesyon ti baro a kinatao. Daytoy ti baro a tao a kanayon a mapabpabaro tapno umasping iti Dios a namarsua kenkuana, ket naan-anay ti pannakaammoyo kenkuana.

¹¹Iti kasta, awan Hentil wenno Judio, nakugit wenno saan a nakugit, ganggannaet, narungsot a tao, tagabu ken siwawayawaya, no di ket ni Cristo ti isuamin ken adda iti isuamin.

¹²Tattaonakayo ti Dios. Inayat ken pinilinakayo a kukuana. Ngarud, ipakitayo a naasikayo, naimbag, napakumbaba, nasingpet ken naanus.

¹³No adda pagkunaan ti maysa ken maysa, agiinnanus ken agpipinnakawankayo. Masapul nga agpipinnakawankayo a kas iti panangpakawan ti Apo kadakayo.

¹⁴Ket kadagitoy amin, inayonyo ti ayat a mamagsinggalut a naan-anay iti isuamin.

¹⁵Ti talna nga agtaud ken ni Cristo ti mangiwanwan koma kadagiti panangeddeng nga aramidenyo. Daytoy ti nangawisan ti Dios kadakayo iti maymaysa a bagi ket agyamankayo iti Dios.

¹⁶Agtalinaed koma kadagiti pusoyo ti mensahe ni Cristo iti amin a kinabaknangna. Agsisinnuro ken agbibinnalakadkayo iti amin a kinasirib. Agkantakayo kadagiti salmo, himno ken naespirituan a kankanta, a napno ti pusoyo iti panagyaman iti Dios.

¹⁷Ngarud, amin nga aramiden ken sawenyo, aramidenyo iti nagan ni Apo Jesus. Agyamankayo iti Dios Ama babaen kenkuana.

¹⁸Babbai, agtulnogkayo kadagiti assawayo, ta dayta ti rebbengyo nga aramiden a kas Kristiano.

¹⁹Lallaki, ayatenyo dagiti assawayo, ket diyo rangranggasan ida.

²⁰Annak, agtulnogkayo kadagiti nagannak kadakayo, ta daytoy ti pakaragsakan ti Dios.

²¹Amma, diyo pagsakiten ti nakem dagiti annakyo tapno dida maupay.

²²Dakayo nga adipen, agtulnogkayo iti amin a banag kadagiti appoyo, saan laeng a no kitkitaendakayo tapno maay-ayoda kadakayo, ngem aramidenyo daytoy a sipupudno gapu iti panagraemyo iti Apo.

²³Aniaman nga aramidenyo, ipapusoyo a kasla maipaay iti Apo, a saan a kadagiti tattao.

²⁴Laglagipenyo a gunggonaannakayto ti Apo. Awatenyonto ti tawid nga agpaay kadagiti tattaona. Ta ni Cristo ti napudpudno nga Apo a pagserserbianyo.

²⁵Ti siasinoman nga agaramid iti dakes, madusanto a kas iti kaikarianna, gapu ta awan idumduma ti Dios iti panangukomna.