Read Iloko Colossians 4 Bible Online

Colossians 4 - Iloko bible

Colossians 4

¹Dakayo nga appo, aramidenyo ti nalinteg ken rumbeng kadagiti tagabuyo. Laglagipenyo nga adda met Apoyo sadi langit.

²Diyo sardayan ti agkararag a sisasalukag ket agyamankayo iti Dios.

³Ikarkararagandakami met tapno ikkannakami ti Dios iti nasayaat a gundaway a mangasaba ken mangipakaammo iti palimed maipapan ken ni Cristo. Ta daytoy ti gapuna nga addaak ita iti pagbaludan.

⁴Idawdawatyo a mailawlawagko daytoy kas rebbengko nga aramiden.

⁵Annadanyo ti tignayyo kadagiti saan a mamati ken ni Cristo. Usarenyo a naimbag ti tiempo a kaaddayo kadakuada.

⁶Makaparagsak ken makaay-ayo koma ti pannakisaritayo kadagiti tattao, ammoyo koma ti tumutop nga isungbatyo iti uray siasinoman.

⁷Ipakaammonto kadakayo ni ay-ayatentayo a kabsat a Tikico ti amin a damag maipapan kaniak. Mapagtalkan ni Tikico a kaduami nga agserserbi iti Apo.

⁸Ibaonko tapno ibagana ti kasasaadmi amin, ket iti kasta, mabang-arankayo.

⁹Makikuyog kenkuana ni Onesimo nga ay-ayaten ken mapagtalkan a kabsat a maysa kadakayo. Ipadamagdanto ti amin a mapaspasamak ditoy.

¹⁰Pakomustaannakayo ni Aristarco a kaduak a balud, kasta met ni Marcos a kasinsin ni Bernabe. (Inawatyon ti bilin maipapan ken ni Marcos. Inton umay, awatenyo.)

¹¹Komustakayo met kano, kuna ni Jesus nga aw-awaganda pay iti Justo. Kadagiti Judio a mamati, isuda laeng ti makipagtartrabaho kaniak a maipaay iti Pagarian ti Dios, ket adu ti naitulongda.

¹²Pakomustaannakayo ni Epafras a kameng met iti grupoyo. Adipen ni Cristo Jesus ket kanayon a sipapasnek a mangikarkararag kadakayo. Idawdawatna iti Dios nga agtalinaedkayo a natibker ken awan pagkuranganna nga agtungpal iti pagayatan ti Dios.

¹³Siak ti makasaksi iti anepna nga agtrabaho iti maipaay kadakayo ken kadagiti tattao idiay Laodicea ken Hierapolis.

¹⁴Pakomustaannakayo ni Lucas, ti patpatgenmi a doktor. Pakomustaannakayo met ni Demas.

¹⁵Idanonyo ti pakomustami kadagiti kakabsat idiay Laodicea. Pakomustaanyo met ni Nimfas ken ti iglesia nga aggimgimong iti balayna.

¹⁶Kalpasan ti panangbasayo iti daytoy a surat, kitaenyo ta maibasa met iti iglesia idiay Laodicea. Kasta met a basaenyo ti surat nga aggapu kadagiti kakabsat iti Laodicea.

¹⁷Ibagayo ken ni Arkipo nga ileppasna ti trabaho a naitalek kenkuana iti panagserbi iti Apo.

¹⁸Siak ti akinsurat iti daytoy: Kablaaw ni Pablo. Diyo liplipatan a sikakawarak! Sapay koma ta paraburannakayo ti Dios.