Read Iloko 1 Thessalonians 1 Bible Online

1 Thessalonians 1 - Iloko bible

1 Thessalonians 1

¹Kadagiti kamkameng ti iglesia dita Tesalonica, isuda a tattao ti Dios Ama ken tattao met ni Apo Jesu-Cristo, Sapay koma ta adda kadakayo ti parabur ken talna. Dakami, da Pablo, Silas ken Timoteo, ti naggapuan daytoy a surat.

²Kankanayon nga agyamankami iti Dios maipuon kadakayo amin, ket idawdawatandakayo tunggal agkararagkami.

³Ta tunggal agkararagkami iti Dios ken Amatayo, malagipmi no kasano ti panangipakitayo iti pammatiyo babaen iti panagbiagyo, ti gagetyo nga agtrabaho gapu iti ayat ken no kasano ti kinatibker ti namnamayo ken ni Apotayo a Jesu-Cristo.

⁴Kakabsat, ammomi nga ay-ayatennakayo ti Dios, ket pinilinakayo nga agpaay kenkuana.

⁵Ta inyegmi kadakayo ti Naimbag a Damag, saan laeng a babaen iti panagsaomi no di pay ket iti panangipakitami iti pannakabalin ti Espiritu Santo, ket awan panagduaduami iti kinapudno ti mensahe. Ammoyo ti panagbiagmi idi nakipagtaengkami kadakayo. Nagpaay daytoy a pagsayaatanyo.

⁶Dakami ken ti Apo ti tinuladyo. Nupay kasta unay ti panagsagabayo, inawatyo ti sao a napnoankayo iti rag-o, ti rag-o nga agtaud iti Espiritu Santo.

⁷Iti kasta, nagbalinkayo nga ulidan dagiti amin a mamati idiay Macedonia ken Acaya.

⁸Saanyo laeng nga insaknap idiay Macedonia ken Acaya ti damag maipapan iti Apo. Ngem nagdinamag payen kadagiti amin a disso ti pammatiyo iti Dios, ket awan ti masaomi.

⁹Saritaen amin dagidiay a tattao ti panangawatyo kadakami idi simmarungkarkami kadakayo, ken ti panangtallikudyo kadagiti didiosen tapno agserbikayo iti napaypayso ken sibibiag a Dios.

¹⁰Sarsaritaenda pay ti panagur-urayyo iti yaay ti Anakna nga aggapu sadi langit. Isu daytoy ni Jesus a pinagungarna ken mangisalakanto kadatayo inton ukomen ti Dios dagiti tattao gapu kadagiti basbasolda.