Read Iloko 1 Thessalonians 2 Bible Online

1 Thessalonians 2 - Iloko bible

1 Thessalonians 2

¹Pagaammoyo, kakabsat, a saan a nasayang ti tiempo nga isasarungkarmi idi kadakayo.

²Ammoyo met ti pannakaparparigat ken pannakaibabainmi idiay Filipos sakbay nga immaykami dita Tesalonica. Nupay kasta, inikkannakami ti Diostayo iti tured a nangipakaammo kadakayo iti Naimbag a Damag nga aggapu kenkuana, uray pay no adu dagiti lapped.

³Ti panangawismi kadakayo saan nga agtaud iti biddut wenno dakes a panggep. Awan met ti panggepmi a mangallilaw iti siasinoman.

⁴Kanayon ketdi nga agsaokami iti mayannatup iti kayat ti Dios a sawenmi, ta intalekna kadakami ti Naimbag a Damag. Saan a dagiti tattao ti paragsakenmi no di ket ti Dios, isu a makaammo kadagiti panggepmi.

⁵Pagaammoyo unay a dikam immay nangpaspasablog kadakayo. Saanmi nga inaramat dagiti balikas a nangilinged iti naagum a panggep. Ammo daytoy ti Dios!

⁶Kasta met a dimi kinalikaguman ti panangdayaw ti siasinoman kadakami, dakayo man wenno dagiti sabsabali,

⁷nupay kas apostol ni Cristo, adda kalinteganmi nga umawat kadagitoy manipud kadakayo. Ngem naayat ken naasikami idi addakami iti dennayo, kas iti ina a mangtaripato kadagiti annakna.

⁸Gapu iti ayatmi kadakayo, sidadaankami a nangipaay kadakayo saan laeng a ti Naimbag a Damag nga aggapu iti Dios no di pay ket ti mismo a biagmi. Ngamin, napategkayo unay kadakami!

⁹Diak agduadua, kakabsat, a malagipyo no kasano ti panagtrabaho ken panagbannogmi. Aldaw-rabii a nagtrabahokami tapno dikam agbalin a pakadagsenanyo bayat ti panangikasabami kadakayo iti Naimbag a Damag nga aggapu iti Dios.

¹⁰Dakayo ken ti Dios ti saksimi, a nasantoan, nalinteg ken awan pakababalawan ti panagbiagmi idi iti imatangyo a mamati.

¹¹Ammoyo a tinulonganmi ti tunggal maysa kadakayo, kas iti panangtulong ti ama kadagiti annakna.

¹²Pinaregta ken liniwliwadakayo. Indagadagmi met nga agbiagkayo a pakaragsakan ti Dios a mangayab kadakayo tapno mairanudkayo iti pagarian ken gloriana.

¹³Adda pay sabali a gapu no apay a kanayon nga agyamankami iti Dios. Idi impakaammomi kadakayo ti mensahe ti Dios, inawatyo, saan a kas mensahe ti tao, no di ket kas pudno a mensahe ti Dios. Ket pudno nga aggapu iti Dios daytoy a mensahe. Ngamin, adda nga agtartrabaho ti Dios kadakayo a mamati.

¹⁴Dagiti mapaspasamak kadakayo, kakabsatko, napasamak met kadagiti tattao ni Cristo Jesus, kadagiti iglesia ti Dios idiay Judea. Pinagsagabadakayo dagiti bukodyo a kailian, kas met ti panamagsagaba dagiti Judio kadagiti taga-Judea.

¹⁵Pinapatayda ni Apo Jesus ken dagiti profeta, ket indadanesdakami met. Saanda a makaay-ayo iti Dios! Busorenda dagiti amin a tattao!

¹⁶Iparitda pay ti panangikasabami kadagiti Hentil iti mensahe a pakaisalakananda koma. Daytoyen ti pagpatinggaan ti kinadakesda, ket agdissuoren kadakuada ti pungtot ti Dios!

¹⁷Iti biangmi, kakabsat, idi nayadayokami kadakayo iti apagbiit, kasta unay ti iliw ken gagarmi a makakita manen kadakayo! Agpayso a nayadayo ti bagimi kadakayo ngem saan ti panunotmi.

¹⁸Tinarigagayanmi ti agsubli koma kadakayo. Uray siak, ni Pablo, namin-adu a pinadasko ti umay, ngem linapdannakami ni Satanas.

¹⁹Awan sabali a namnamami no di dakayo. Dakayo ti ragsakmi. Dakayo ti korona ti balligi a pagpannakkelmi iti sangoanan ni Apotayo a Jesus inton umay manen.

²⁰Wen, dakayo ti gapu no apay nga agpannakkel ken agrag-okami!