Read Iloko 1 Thessalonians 4 Bible Online

1 Thessalonians 4 - Iloko bible

1 Thessalonians 4

¹Kamaudiananna, kakabsat, nasursuroyo kadakami no kasano ti pannakilangenyo iti padayo a tao tapno maragsakan ti Dios kadakayo. Kinapudnona, kasta ti an-annurotenyo. Ngem iti nagan ni Apo Jesus, idawat ken igunamgunammi kadakayo a pasayaatenyo pay.

²Ammoyon dagiti al-alagaden nga intedmi kadakayo nga aggapu ken ni Apo Jesus.

³Kayat ti Dios nga agbiagkayo a nasantoan ket adaywanyo ti immoralidad.

⁴Tunggal lalaki ammona koma ti nasantoan ken natakneng a wagas ti panangasawa,

⁵saan a dinederrep a kas ar-aramiden dagiti saan a makaammo iti Dios.

⁶Awan koma ngarud ti siasinoman a mangilupit wenno manggundaway iti kabsatna. Imbagamin daytoy ket nainget ti panangballaagmi kadakayo a dusaento ti Dios dagiti agaramid kadagiti kakastoy a kinadakes.

⁷Saannatayo nga inayaban ti Dios tapno agbiagtayo iti kinaderrep, no di ket iti wagas a nasantoan.

⁸Ngarud, ti sumukir iti daytoy a pannursuro, saan a tao ti sukirenna, no di ket ti Dios a mangted kadakayo iti Espiritu Santona.

⁹Saanen a masapul a mapalagipankayo iti maipapan iti panagayatyo kadagiti kakabsat iti pammati. Insuronakayo a mismo ti Dios nga agiinnayatkayo.

¹⁰Kinapudnona, kastoy ti panagayatyo kadagiti amin a kakabsat nga adda iti entero a Macedonia. Isut' gapuna a dawatenmi kadakayo, kakabsat, a degdeganyo ti kastoy a panagayat.

¹¹Ikagumaanyo koma ti natalna a panagbiag. Bianganyo laeng ti bukodyo nga aramid. Agtrabahokayo a maipaay kadagiti kasapulanyo. Imbagbagamin dagitoy idi

¹²tapno agraemto kadakayo dagiti saan pay a mamati. Ket dikayton agpannuray iti siasinoman a mangted iti uray ania a kasapulanyo.

¹³Kakabsat, kayatmi a maammoanyo ti pudno maipapan kadagiti natayen, tapno dikayto agladingit a kas kadagiti awanan namnama.

¹⁴Mamatitayo a natay ni Jesus ngem nagungar met laeng. Isut' gapuna a patientayo nga alaento ti Dios dagiti natay a nagtalinaed iti pammati tapno makipagyanda ken ni Jesus.

¹⁵Daytoy ti pannursuro ti Apo nga ibagami kadakayo: Inton aldaw nga yaay ti Apo, datayo a sibibiag ditayto un-unaan dagiti natayen.

¹⁶Bumabanto ti Apo manipud langit ket mangngegto dagiti tattao ti maipukkaw a bilin, ti timek ti pangulo dagiti angheles, ken ti trumpeta ti Dios. Umunanto nga agungar dagiti natay a nagtalinaed iti pammati ken ni Cristo.

¹⁷Kalpasanna, datayo a sibibiag iti dayta a tiempo, maurnongtayto a maikuyog kadakuada iti ayan dagiti ul-ulep tapno sabtentayo ti Apo idiay tangatang. Iti kasta, kanayonton nga addatayo iti denna ti Apo.

¹⁸Aglilinniwakayo ngarud babaen kadagitoy a sao.