Read Iloko 1 Thessalonians 5 Bible Online

1 Thessalonians 5 - Iloko bible

1 Thessalonians 5

¹Saanen a masapul, kakabsat, nga agsuratak kadakayo maipapan kadagiti tiempo wenno panawen a mapasamak dagitoy.

²Ammoyo unay a dumtengto ti Aldaw ti Apo, kas iti mannanakaw nga umay iti rabii.

³Inton kuna dagiti tattao, “Nagtalna ken nagtalged ketdin,” isunto metten a kellaat nga agdissuor kadakuada ti pannakadadael. Kellaatto nga umay a kas iti rigat ti maysa a babai nga agpaspasikal. Ket awanto ti makalisi.

⁴Kakabsat, saankayo nga agbibiag a kasla addakayo iti sipnget. Saankayto ngarud a maklaat iti dayta nga Aldaw a kas iti panangkellaat ti maysa a mannanakaw.

⁵Annaknakayo amin ti lawag; wen, annaknakayo ti aldaw. Saantayo a tattao ti rabii wenno ti sipnget.

⁶Ngarud, ditay koma maturog a kas kadagiti dadduma, no di ket siririing ken naalibtakkayo.

⁷Iti rabii ti pannaturog dagiti tattao. Iti rabii met a mabartekda.

⁸Ngem tattaonatayo ti aldaw, ket nateppeltayo koma. Aramatentayo ti pammati ken ayat a pannakakalasag. Aramatentayo met a pannakahelmet ti namnamatayo iti pannakaisalakan.

⁹Saannatay a pinili ti Dios tapno agsagabatayo iti pungtotna, no di ket tapno magun-odtayo ti pannakaisalakan babaen ken ni Apotayo a Jesu-Cristo

¹⁰a natay gapu kadatayo tapno makipagbiagtayo kenkuana, sibibiagtayo man wenno nataytayton inton umay.

¹¹Daytoy ti gapuna nga agpipinnaregta ken agtitinnulongkayo a kas iti ar-aramidenyo.

¹²Kakabsat, dawatenmi kadakayo nga ipaayyo koma ti rumbeng a pammadayaw kadagiti agtartrabaho iti sidongyo. Isuda ti mangidalan ken mangisuro kadakayo iti pannakikadkadua iti Apo.

¹³Ipakitayo ti natan-ok a panagraem ken panagayatyo kadakuada gapu iti trabahoda. Agbiagkayo koma a natalna.

¹⁴Igunamgunammi kadakayo, kakabsat, a ballaaganyo ti nasadut. Paturedenyo ti managbutbuteng. Tulonganyo dagiti nakapuy. Anusanyo amin ida.

¹⁵Diyo supapakan iti dakes dagiti agaramid kadakayo iti dakes. Ikagumaanyo ketdi a kanayon ti agaramid iti naimbag iti tunggal maysa ken kadagiti amin a tattao.

¹⁶Kanayon nga agragsakkayo.

¹⁷Diyo koma liwayan ti agkararag.

¹⁸Agyamankayo iti Dios, dakes man wenno nasayaat ti kasasaad. Daytoy ti kayat ti Dios a panagbiagyo a kas tattao ni Cristo Jesus.

¹⁹Diyo depdepen ti Espiritu Santo.

²⁰Diyo laisen dagiti sao dagiti profeta.

²¹Usigenyo ketdi a nalaing dagiti amin a bambanag. Salimetmetanyo dagiti naimbag

²²ket liklikanyo ti amin a kita ti kinadakes.

²³Sapay koma ta pasantoennakayo a naan-anay ti Dios a mangted iti talna. Aywananna koma ti espiritu, kararua ken bagiyo, ket awan pakapilawanda agingga nga umay ni Apotayo a Jesu-Cristo.

²⁴Mapagtalkan ti mangayab kadakayo ket aramidennanto daytoy.

²⁵Kakabsat, ikarkararagandakami met.

²⁶Kablaawanyo dagiti amin a kakabsat iti nasantoan nga agek.

²⁷Igunamgunamko kadakayo, babaen iti pammalubos ti Apo, nga ibasayo daytoy a surat kadagiti amin a kakabsat.

²⁸Adda koma kadakayo ti parabur ni Apotayo a Jesu-Cristo.