Read Iloko Joshua 1 Bible Online

Joshua 1 - Iloko bible

Joshua 1

¹Kalpasan ti ipapatay ni Moises nga adipen ni Yahweh, nakisao ni Yahweh ken ni Josue a katulongan ni Moises ken anak ni Nun.

²Kinunana, “Natayen ni Moises nga adipenko. Sika ken dagiti amin nga Israelita, agsaganakayon a bumallasiw iti Karayan Jordan ket inkay iti daga nga itedko kadakayo.

³Kas imbagak ken ni Moises, intedkon kadakayo ti amin a daga a mabaddekanyonto.

⁴Mangrugi ti beddengyo iti let-ang iti abagatan agingga kadagiti bantay ti Libano iti amianan, manipud iti dakkel a Karayan Eufrates iti daya, ken amin a sakup dagiti Heteo, sa agpa-laud agingga iti Taaw Mediterranean.

⁵Josue, awanto ti makaparmek kenka iti unos ti panagbiagmo. Addaakto kenka a kas iti kaaddak idi ken ni Moises. Saankanto a panawan wenno baybay-an.

⁶Pakirdem ti pakinakemmo ket dika agbuteng ta ipanguloam dagitoy a tattao a mangsakup iti daytoy a daga nga insapatak nga ited kadagiti kapuonanda.

⁷Masapul ngarud a pakirdem ti pakinakemmo ket tungpalem a siiinget dagiti amin a Linteg nga inted kadakayo ni Moises nga adipenko. Wen, tungpalem tapno agballigika iti sadinoman a papanam.

⁸Laglagipem a basaen ken adalen ti libro ti Linteg iti aldaw ken rabii tapno maannurotmo amin a sagudayenna ket rumang-ay ken agballigikanto.

⁹Laglagipem ti bilinko: ‘Pakirdem ti pakinakemmo. Dika agbuteng wenno maupay, ta siak, ti Apo a Diosmo, addaak latta kenka iti sadinoman a papanam.’”

¹⁰Kalpasanna, imbilin ni Josue kadagiti pangulo

¹¹a sursorenda ti kampo ket ipakaammoda daytoy kadagiti tattao, “Isaganayo dagiti masapsapulyo agsipud ta inton maikatlo nga aldaw, ballasiwenyo ti Karayan Jordan ket sakupenyo ti daga nga ited kadakayo ti Apo a Diosyo.”

¹²Kinuna ni Josue kadagiti tribu ti Ruben ken Gad ken iti kagudua ti tribu ti Manases:

¹³“Laglagipenyo ti imbaga kadakayo ni Moises nga adipen ti Apo. Imbagana nga itedto ti Apo a Diosyo daytoy a daga iti daya ti Jordan a pagnaedanyo.

¹⁴Agbatinto dagiti assawayo, dagiti annakyo ken dagiti animalyo iti daga nga inted ni Moises kadakayo. Ngem bumallasiwto dagiti mannakigubat kadakayo ket umun-unadanto ngem dagiti padayo nga Israelita tapno tulonganda ida

¹⁵agingga a masakupdan ti daga nga inted kadakuada ti Apo a Diosyo. Kalpasanna, mabalinyonton ti agsubli ken agnaed iti bukodyo a daga nga inted ni Moises nga adipen ti Apo ditoy akindaya a bangir ti Jordan.”

¹⁶Insungbatda ken ni Josue, “Aramidenmi amin nga imbagam ket inkam iti sadinoman a pangibaonam kadakami.

¹⁷Agtulnogkami kenka a kas iti kanayon a panagtulnogmi ken ni Moises. Sapay koma ta adda kenka ti Apo a Diosmo, a kas iti kaaddana idi ken ni Moises.

¹⁸Mapapatayto ti siasinoman nga agsukir ken saan nga agtungpal iti aniaman a bilinmo. Ngarud, masapul a pakirdem ti pakinakemmo ket dika agbuteng!”