Read Iloko Joshua 10 Bible Online

Joshua 10 - Iloko bible

Joshua 10

¹Nadamag ni Adonisedec nga ari ti Jerusalem a pinarmek ken dinadael ni Josue ti Ai sana pinapatay ti ari sadiay, kas iti inaramidna iti Jerico ken iti arina. Nadamagna pay a nakikappia dagiti taga-Gabaon kadagiti Israelita ket makipagnanaedda kadakuada.

²Kasta unay ti buteng dagiti tattao ti Jerusalem gapu iti daytoy ta dakkel ti Gabaon a kas kadagiti siudad nga addaan iti ari, ket dakdakkel pay ngem ti Ai ken natutured dagiti soldadona.

³Iti kasta, nagpaarayat ni Adonisedec kada Oham nga ari ti Hebron, Piram nga ari ti Jarmut, Jafia nga ari ti Lakis ken Debir nga ari ti Eglon.

⁴Daytoy ti pinaibagana: “Umaydak tulongan a mangraut iti Gabaon, gapu ta nakikappia dagiti umili ken ni Josue ken kadagiti Israelita.”

⁵Pinagtitipon dagitoy lima nga ari dagiti Amorreo dagiti soldadoda; linawlawda ti Gabaon sada rinaut.

⁶Pinaibaga dagiti taga-Gabaon ken ni Josue iti kampo idiay Gilgal: “Dinakami baybay-an, apo! Umayka a dagus ket tulongannakami! Isalakannakami! Ta nagtitipon amin nga ari dagiti Amorreo iti katurturodan a pagilian a manggubat kadakami.”

⁷Manipud Gilgal, nagrubbuat ni Josue ken ti armadana agraman dagiti kalaingan a soldadona.

⁸Kinuna ni Yahweh ken ni Josue, “Saanka nga agbuteng kadakuada, ta intedko kenkan ti balligi. Awanto ti uray maysa kadakuada a makabael a sumaranget kenka.”

⁹Nagpatnag a nagdaliasat ni Josue. Idi dumteng idiay Gabaon, kinellaatna a rinaut dagiti Amorreo.

¹⁰Pinaglagaw ida ni Yahweh iti pinnakakitada iti armada ti Israel, ket pinapatay dagiti Israelita ida idiay Gabaon. Dinarundonda ida iti salogan ti Bessang Bet-horon, ket intuloyda ti nagpapatay kadakuada agingga iti abagatan, idiay Azeka ken Makeda.

¹¹Idi itartarayan dagiti Amorreo ti armada ti Israel iti Bessang, pinagtudo ni Yahweh iti yelo agingga idiay Azeka. Adu ti natay nga Amorreo. Ad-adu kadakuada ti natay iti yelo ngem ti pinapatay dagiti Israelita.

¹²Iti dayta nga aldaw, idi pinagballigi ni Yahweh dagiti Israelita iti pannakirangetda kadagiti Amorreo, nakisao ni Josue kenkuana. Kinunana iti sango dagiti Israelita: “Init, dika agkutkuti iti ngatoen ti Gabaon; Bulan, agsardengka iti ngatoen ti tanap ti Aijalon.”

¹³Saan a naggaraw ti init ken ti bulan agingga a naparmek ti Israel ti amin a kabusorna. Nailanad daytoy iti Libro ni Jashar. Nagintek ti init iti tengnga ti tangatang, ket nagmalmalem a saan a limnek.

¹⁴Sakbay daytoy wenno manipud iti daytoy nga aldaw, awan pay ti aldaw a kas itoy nga impangag ni Yahweh ti timek ti maysa a tao. Tinulongan ni Yahweh dagiti Israelita a nakigubat.

¹⁵Nagsubli ni Josue ken ti amin a soldadona iti kampo idiay Gilgal.

¹⁶Ngem nakalibas dagiti lima nga ari dagiti Amorreo ket naglemmengda iti rukib idiay Makeda.

¹⁷Adda nakasarak kadakuada ket naibaga ken ni Josue no sadino ti paglemlemmenganda.

¹⁸“Mangitulidkayo kadagiti dadakkel a bato iti pagserkan ti rukib,” kinuna ni Josue, “ken mangikabilkayo kadagiti agguardia sadiay.

¹⁹Ngem dikay agbayag sadiay; ituloyyo a kamaten dagiti kabusor, sunsonenyo ida iti likud. Diyo ipalubos a sumrekda kadagiti siudadda. Ta pinagballiginakayon ti Apo a Diosyo; pinarmekyo idan.”

²⁰Pinapatay ida ni Josue ken dagiti Israelita, nupay adda sumagmamano a nagkamang iti uneg ti nasarikedkedan a siudadda.

²¹Kalpasanna, nagsubli ti amin a soldado ken ni Josue iti kampoda idiay Makeda nga awan ti naan-ano kadakuada. Awan ti siasinoman a tao iti daga a nakaitured nga agsao iti maibusor kadagiti Israelita.

²²Kinuna ni Josue, “Luktanyo ti rukib. Iruaryo dagiti lima nga ari ket idatagyo ida kaniak.”

²³Inruarda dagiti ari ti Jerusalem, Hebron, Jarmut, Lakis ken Eglon.

²⁴Idi addan dagiti ari iti sango ni Josue, inayabanna amin a mannakigubat, ket binilinna dagiti ofisiales a kaduana a nakigubat. Kinunana, “Umayyo baddekan dagiti tengnged dagitoy nga ari.” Nagtungpalda.

²⁵Kinuna manen ni Josue kadakuada, “Saankayo nga agbuteng wenno maupay. Pumigsa ken tumuredkayo, ta kastoyto ti aramiden ti Apo kadagiti amin a kabusoryo.”

²⁶Pinapatay ni Josue dagiti ari. Saggaysa nga imbitinna ida iti lima a kayo, ket sibibitinda sadiay agingga iti sumipnget.

²⁷Idi lumnek ti init, pinaibabana dagiti bangkay sana pinaipurruak dagitoy iti rukib a naglemmenganda. Iti ruangan ti rukib, naikabil dagiti dadakkel a bato nga adda pay laeng agpapan ita.

²⁸Iti dayta met la nga aldaw, rinaut ken pinarmek da Josue ti Makeda ken ti arina. Pinapatay da Josue dagiti amin a tattao iti siudad; awan ti nabati a sibibiag. Inaramidna iti ari ti Makeda ti kas iti inaramidna iti ari ti Jerico.

²⁹Kalpasan daytoy, napan rinaut da Josue ken dagiti soldadona ti Libna.

³⁰Inyawat ni Yahweh kadagiti Israelita daytoy a siudad ken ti arina. Pinatayda amin nga umili. Inaramid ni Josue iti ari ti Libna ti kas iti inaramidna iti ari ti Jerico.

³¹Manipud Libna, nagturong da Josue ken dagiti soldadona idiay Lakis; linawlawda sada rinaut.

³²Iti maikadua nga aldaw ti gubat, inyawat ni Yahweh ti Lakis kadagiti Israelita. Kas iti inaramidda idiay Libna, awan ti uray maysa nga inispalda—pinatayda amin a tattao iti siudad.

³³Dimteng ni Horam nga ari ti Gezer tapno tulonganna ti Lakis. Pinarmek ni Josue ti ari ken dagiti tattaona. Awan ti inispalna kadakuada.

³⁴Manipud Lakis, napan ni Josue ken ti amin a soldadona idiay Eglon. Linawlawda sada rinaut.

³⁵Iti dayta met la nga aldaw, pinarmekda ti Eglon. Pinapatayda dagiti amin a tattao sadiay, kas iti inaramidda idiay Lakis.

³⁶Manipud Eglon, rinaut da Josue ken dagiti amin nga Israelita ti katurturodan ti Hebron.

³⁷Pinarmekda ti Hebron ket pinatayda ti ari ken ti amin nga agnaed iti siudad ken kadagiti kabangibang nga ili. Kas iti inaramid ni Josue idiay Eglon, dinadaelna a namimpinsan ti Hebron ket awan imbatida a sibibiag.

³⁸Kalpasanna, nagsubli ni Josue ken ti armadana ket dinarupda ti Debir.

³⁹Pinarmekda ti Debir agraman ti ari ken dagiti kabangibang nga ili. Pinatayda amin a tattao sadiay. Inaramid ni Josue iti Debir ken iti arina ti kas iti inaramidna idiay Hebron, Libna ken kadagiti arida.

⁴⁰Sinakup da Josue ti entero a daga. Pinarmekda dagiti ari ti katurturodan a pagilian, ti akindaya a bakras, akinlaud a puon ti bantay, kasta met dagiti natikag a tanap iti abagatan. Awan ti inispalda a biag; pinapatayna amin, ta daytoy ti bilin ni Yahweh a Dios ti Israel.

⁴¹Pinarmekda amin ida manipud Kades Barnea agingga idiay Gaza, manipud iti entero a daga ti Gosen agingga idiay Gabaon.

⁴²Pinarmek ni Josue dagitoy nga ari. Sinakupna ti pagturayanda iti maysa la a rusuat ti gubat, gapu ta kadua ti Israel ni Yahweh a Diosna a nakigubat.

⁴³Kalpasan daytoy, nagsubli da Josue ken ti armadana iti kampo idiay Gilgal.