Read Iloko Joshua 11 Bible Online

Joshua 11 - Iloko bible

Joshua 11

¹Idi madamag ni Jabin nga ari ti Hasor ti panagballigi dagiti Israelita, pinakaammoanna ni Jobab nga ari ti Madon, dagiti ari ti Simron ken Acsaf,

²dagiti ari ti katurturodan a pagilian iti amianan, iti Tanap ti Jordan nga abagatan ti Dan-aw ti Galilea, dagiti pagilian nga adda iti tanap ken iti igid ti baybay iti asideg ti Dor.

³Pinakaammoanna met dagiti Cananeo iti agsumbangir ti Jordan, dagiti Amorreo, Heteo, Perezeo ken dagiti Jebuseo iti katurturodan a pagilian, ket uray pay dagiti Heveo nga agtaeng iti puon ti Bantay Hermon idiay Mizpa.

⁴Dimtengda agraman dagiti amin a mannakigubatda—maysa nga armada a buklen ti adu a tattao a kas kaadu ti darat iti igid ti baybay. Adu ti kabalio ken luganda a pakigubat.

⁵Pinagtitipon dagiti amin nga ari ti buyotda ket sangsangkamaysada a nagkampo iti Waig ti Merom tapno gubatenda ti Israel.

⁶Kinuna ni Yahweh ken ni Josue, “Saanka nga agbuteng kadakuada. Inton bigat, iti kastoy nga oras, napapataykonton amin ida para iti Israel. Baldadoem dagiti kabalioda ket puoram dagiti luganda.”

⁷Ngarud, kenellaat a rinaut ida ni Josue ken dagiti tattaona iti Waig ti Merom.

⁸Pinagballigi ti Apo dagiti Israelita. Dimmarup dagiti Israelita ket kinamatda ida agingga iti amianan iti Dakkel a Sidon, ken iti Misrefot Mayim, ken agingga iti tanap ti Mizpa nga agpadaya. Saanda nga insardeng ti ranget agingga a nauloyan amin a kabusor.

⁹Kas imbilin ni Yahweh, binaldado ni Josue dagiti kabalioda ken pinuoranna dagiti luganda a pakigubat.

¹⁰Nagsubli ni Josue, ket pinarmekna ti Hasor sana pinatay ti ari sadiay. (Iti dayta a tiempo, ti Hasor ti kabibilgan kadagiti amin a pagarian.)

¹¹Pinatayda amin a tattaona; awan ti nabati a sibibiag. Pinuoranda ti siudad.

¹²Pinarmek ni Josue amin dagitoy nga ari ken dagiti siudadda. Kas imbilin ni Moises nga adipen ni Yahweh, pinapapatayna ti tunggal maysa.

¹³Nupay kasta, saan a pinuoran dagiti Israelita dagiti siudad a nabangon iti turod, malaksid ti Hasor a pinuoran ni Josue.

¹⁴Innala dagiti Israelita dagiti amin a napapateg a banag ken dagiti animal kadagitoy a siudad, ket tinagikuada. Pinatayda amin a tattao—awan imbatida a sibibiag.

¹⁵Inted ni Yahweh dagiti bilinna ken ni Moises nga adipenna. Inted met ni Moises dagitoy a bilin ken ni Josue, ket tinungpal ni Josue dagitoy. Tinungpalna amin nga imbilin ni Yahweh ken ni Moises.

¹⁶Sinakup ni Josue amin dagita a daga—ti katurturodan a pagilian, amin nga adda iti amianan ken abagatan, ti entero a Gosen ken ti natikag a daga iti deppaar ti abagatanna, agraman ti Tanap ti Jordan.

¹⁷Dumanon ti masakupan ti daga manipud Bantay Halac iti abagatan iti asideg ti Edom agingga iti Baal-gad iti amianan, iti tanap ti Libano iti abagatan ti Bantay Hermon. Pinatayna amin nga arida kalpasan ti nabayag a pannakigubgubatna kadakuada.

¹⁹Awan ti siudad a nakikappia kadagiti Israelita, malaksid ti Gibeon a taeng dagiti Heveo. Naparmekda amin iti gubat.

²⁰Ta ni Yahweh ti akinnakem iti panagpingetda a makiranget kadagiti Israelita tapno madadaelda a mamimpinsan ket mapapatayda amin nga awan asi. Daytoy ti imbilin ni Yahweh ken ni Moises.

²¹Iti daytoy a tiempo, napan pinukaw ni Josue ti maysa a puli dagiti higante a maaw-awagan iti Anakim nga agnanaed iti katurturodan idiay Hebron, Debir, Anab ken iti amin a katurturodan ti Juda ken ti Israel. Inkisap ni Josue ida agraman dagiti siudadda.

²²Awan ti natda nga Anakim iti Israel; nupay kasta, adda sumagmamano a nabati idiay Gaza, Gat ken Asdod.

²³Kas imbilin ni Yahweh ken ni Moises, sinakup ni Josue ti entero a daga. Intedna ti daga kadagiti Israelita a kas kukuada, ket biningbingayna, maysa a paset ti kada tribu. Iti kasta, nagbiag dagiti Israelita a sitatalna iti entero a daga.