Read Iloko Joshua 13 Bible Online

Joshua 13 - Iloko bible

Joshua 13

¹Lakay unayen ni Josue. Kinuna ni Yahweh kenkuana, “Lakayka unayen, ngem adu pay laeng ti daga a masapul a sakupen.

²Isuda dagitoy: amin a daga a masakupan ti Filistia ken Gesur,

³kasta met dagiti amin a daga ti Avvim iti abagatan. (Maibilang a kukua dagiti Cananeo ti daga manipud waig Sihor a daya ti Egipto agingga iti beddeng ti Ekron iti amianan. Agnaed dagiti turayen dagiti Filisteo idiay Gaza, Asdod, Askelon, Gat ken Ekron.)

⁴Adda pay la dagiti amin a pagilian a sakup dagiti Cananeo, ken Mehara (a kukua dagiti Sidonio), agingga idiay Afec iti beddeng dagiti Amorreo;

⁵ti daga dagiti Gilbeo, ti entero a Libano nga agturong iti daya, manipud Baal-gad iti puon ti Bantay Hermon, agingga iti serkan ti Bessang Hamat.

⁶Mairaman ditoy dagiti Sidonio nga agnaed iti katurturodan iti nagbaetan dagiti bantay ti Libano ken Misrefot Mayim. Paksiatekto ida iti dalan dagiti Israelita. Kas imbilinko kenka, masapul a bingbingayem dagitoy a daga tapno tagikuaen ti Israel.

⁷Ita, bingbingayemon ti daga ket itedmo kadagiti siam a tribu ken ti sabali a kagudua ti tribu ti Manases a kas kukuada.”

⁸Ti daga nga agpadaya iti ballasiw ti Jordan ti naited kadagiti tribu ni Ruben ken ni Gad ken ti sabali a kagudua ti tribu ni Manases. Daytoy ti inted kadakuada ni Moises nga adipen ni Yahweh.

⁹Dumanon iti Aroer ti sakupda iti arubayan ti Tanap ti Arnon ken ti siudad iti tengnga ti tanap ken amin a nangato a patad ti Medeba agingga idiay Dibon.

¹⁰Aglayon iti beddeng ti Ammon agraman dagiti amin a siudad ni Sihon nga ari dagiti Amorreo a nagturay idiay Hesbon.

¹¹Mairaman pay ti Galaad, ti daga ti Gesur ken Maaca, ti entero a Bantay Hermon ken amin a Basan agingga idiay Saleca.

¹²Mairaman ti pagarian ni Og, ti kakaisuna a nabati kadagiti Refaim, a nagturay idi idiay Astarot ken Edrei. Pinarmek ni Moises dagitoy a tattao ket pinagtalawna ida.

¹³Nupay kasta, saan a pinapanaw dagiti Israelita dagiti agnaed iti Gesur ken Maaca. Adda pay laeng dagitoy a tattao idiay Israel.

¹⁴Awan ti daga nga inted ni Moises iti tribu ti Levi. Kas imbaga ni Yahweh ken ni Moises, awatenda a kukuada ti maysa a paset dagiti daton a mapuoran iti altar a maipaay ken ni Yahweh a Dios ti Israel.

¹⁵Inikkan met ni Moises iti daga ti tunggal familia iti tribu ti Ruben.

¹⁶Sakupenda ti Aroer (iti igid ti Tanap ti Arnon), ti siudad iti tengnga ti tanap, ken ti amin a tanap iti lawlaw ti Medeba,

¹⁷agraman ti Hesbon ken amin a siudad iti tanap: Dibon, Bamot Baal, Beth Baalmeon,

¹⁸Jaaz, Kedemot, Mefaat,

¹⁹Kiriataim, Sibma, Saratasar a nabangon iti bantay iti tanap,

²⁰Bet-peor, dagiti bakras ti Bantay Pisga ken Bet Jesimot.

²¹Mairaman dagiti dadduma a siudad iti tanap, ken ti entero a pagarian ni Sihon nga Amorreo a nagturay idiay Hesbon. Pinarmek ni Moises ni Sihon, agraman dagiti agtuturay ti Midian: da Evi, Rekem, Zur, Hur, ken Reba. Nagturayda amin iti daga iti nagan ni Ari Sihon.

²²Kadagiti pinatay dagiti Israelita, nairaman ni Balaam a mammadles nga anak ni Beor.

²³Agpatingga iti Jordan ti daga a naited iti tribu ti Ruben. Dagitoy dagiti siudad ken il-ili a naited kadagiti familia iti tribu ti Ruben a kas kukuada.

²⁴Adda met inted ni Moises a daga iti kada familia iti tribu ti Gad.

²⁵Sakupda ti Jazer ken ti amin a siudad ti Galaad, ti kagudua ti daga ti Ammon agingga idiay Aroer iti daya ti Raba.

²⁶Aglayon ti dagada manipud Hesbon agingga idiay Ramatmizpe ken Betonim; manipud Mahanaim agingga iti beddeng ti Lodebar.

²⁷Iti tanap ti Jordan, mairaman ti Bet Haram, Bet Nimra, Succot ken Safon, ti dadduma a pagturayan ni Sihon nga ari ti Hesbon. Ti Jordan ti beddengda iti amianan agingga iti Dan-aw ti Galilea sa agpadaya.

²⁸Dagitoy dagiti siudad ken il-ili a naited kadagiti familia iti tribu ni Gad a kas kukuada.

²⁹Inted met ni Moises kadagiti familia iti kagudua ti tribu ti Manases ti paset ti daga a kas kukuada.

³⁰Mangrugi idiay Mahanaim, ket mairaman ti amin a Basan, ti entero a pagturayan ni Og nga ari ti Basan ken dagiti 60 nga il-ili iti Jair idiay Basan.

³¹Mairaman pay ti kagudua ti Galaad, agraman Astarot ken Edrei, dagiti siudad iti pagturayan ni Og idiay Basan. Naited amin dagitoy iti kagudua dagiti familia a nagtaud iti kaputotan ni Makir nga anak ni Manases.

³²Kastoy ti panangbingbingay ni Moises kadagiti daga nga adda iti ballasiw ti Jordan ken kadagiti daga iti Jerico. Adda idi ni Moises iti tanap ti Moab.

³³Ngem awan ti daga nga inted ni Moises iti tribu ni Levi. Imbagana kadakuada a kukuada ti maysa a paset dagiti daton a mapuoran a maipaay ken ni Yahweh a Dios ti Israel.