Read Iloko Joshua 15 Bible Online

Joshua 15 - Iloko bible

Joshua 15

¹Daytoy ti daga a naited kadagiti familia iti tribu ti Juda: Dumanon ti sakupda iti abagatan agingga iti pungto ti let-ang ti Zin, iti beddeng ti Edom.

²Daytoy ti akin-abagatan a beddeng a mangrugi iti pungto ti Natay a Baybay,

³ket agpa-abagatan manipud iti Bessang ti Akrabbim, sa lumasat idiay Zin. Agturong iti abagatan idiay Kades Barnea, agtuloy iti Hezron ket mapan idiay Addar, agpa-Karka,

⁴labsanna ti Azmon, sana suroten ti waig nga adda iti beddeng ti Egipto agingga a rummuar iti Taaw Mediterranean a pagpatinggaan ti beddeng. Daytoy ti akin-abagatan a beddeng ti Juda.

⁵Ti Natay a Baybay ti beddengna iti daya, agingga iti sabangan ti Jordan. Mangrugi met ditoy ti akin-amianan a beddeng,

⁶aglayon nga agturong idiay Bet-hogla ket agpa-amianan agingga iti pantok a pakatannawagan iti tanap ti Jordan. Sumang-at manen iti Bato ni Bohan (anak ni Ruben ni Bohan),

⁷ket manipud iti Tanap ti Acor mapan idiay Debir, sa agpa-amianan nga agsikko idiay Gilgal a sumango iti Bessang ti Adummim iti akin-abagatan a bangir ti tanap. Manipud dita, aglayon nga agturong iti ubbog ti Ensemes, ket rummuar a mapan idiay Enrogel,

⁸sumang-at ti beddeng iti Tanap ti Hinnom iti abagatan a paset ti turod a nakaisaadan ti Jerusalem a siudad dagiti Jebuseo. Sumang-at ti beddeng iti tapaw ti bantay a kasumbangir ti Tanap ti Hinnom iti abagatan, iti akin-amianan a pungto ti Tanap ti Refaim.

⁹Manipud iti bantay, agturong iti ubbog ti Neftoa, ket rummuar kadagiti siudad nga asideg ti Bantay Efron; agsikko nga agturong idiay Baala (wenno Kiriat Jearim).

¹⁰Manglikaw iti laud ti Baala, mapan iti katurturodan ti Edom, agpangato iti amianan a bangir ti Bantay Jearim (wenno Kesalon), bumaba idiay Betsemes, ket aglayon idiay Timnat.

¹¹Rummuar kadagiti bakras iti amianan ti Ekron, agbaw-ing nga agpa-Sikkeron, labsanna ti Bantay Baala, ket aglayon idiay Jabneel. Agpatingga ti beddeng iti Taaw Mediterranean a mangbukel

¹²iti akinlaud a beddeng. Dagitoy dagiti beddeng dagiti tattao iti familia ti Juda.

¹³Kas imbilin ni Yahweh ken ni Josue, adda paset ti daga dagiti tattao iti tribu ti Juda a naited ken ni Caleb nga anak ni Jefone. Isu daytoy ti Hebron a siudad ni Arba nga ama ni Anak.

¹⁴Pinapanaw ni Caleb iti dayta a lugar dagiti kaputotan ni Anak: dagiti familia a Sesai, Ahiman ken Talmai.

¹⁵Manipud sadiay, rinautna dagiti agnaed idiay Debir (Kiryat Sefer idi ti nagan daytoy a siudad).

¹⁶Kinuna ni Caleb, “Yasawak ni Acsa nga anakko iti siasinoman a mangparmek iti Kiryat Sefer.”

¹⁷Ni Otniel nga anak ni Kenaz a kabsat ni Caleb ti nangparmek iti siudad. Inted ni Caleb kenkuana ni Acsa nga asawaenna.

¹⁸Iti aldaw ti kasar, imbaga ni Otniel ken ni Acsa a dumawat iti talon ken ni amana. Dimsaag ni Acsa iti asnona, ket dinamag ni Caleb nga amana no ania ti kayatna.

¹⁹“Ikkannak iti sagut,” kinunana. “Gapu ta impannak iti natikag a pagilian, ikkannak iti ubbog.” Inted ni Caleb dagiti akingngato ken akimbaba nga ubbog.

²⁰Daytoy ti daga nga inawat dagiti familia iti tribu ti Juda a kukuada.

²¹Dagiti kaabagatanan a siudad iti asideg ti beddeng iti Edom: Kabzeel, Eder, Jagur,

²²Kina, Dimona, Adada,

²³Kedes, Hasor, Itnan,

²⁴Zif, Telem, Bealot,

²⁵Hasor Hadatta, Keriot Hezron (wenno Hasor),

²⁶Amam, Sema, Molada,

²⁷Hazargadda, Hesmon, Bet-pelet;

²⁸Hazarsual, Beerseba, Biziotia,

²⁹Baala, Iyim, Ezem,

³⁰Eltolad, Kesil, Horma,

³¹Siklag, Madmanna, Sansanna,

³²Lebaot, Silim, Ain, ken Rimmon: 29 a siudad, agraman dagiti kabangibangda nga ili.

³³Iti tanap, dagitoy dagiti siudad: Estaol, Zora, Asena,

³⁴Zanoa, Engannim, Tappua, Enam,

³⁵Jarmut, Adullam, Soco, Aseka,

³⁶Saaraim, Aditaim, Gedera, Gederotaim: 14 a siudad, agraman dagiti kabangibangda nga ili.

³⁷Adda met ti Senan, Hadasa, Migdalgad,

³⁸Dilean, Mizpa, Jocteel,

³⁹Lakis, Bozkat, Eglon,

⁴⁰Cabon, Lamam, Kitlis,

⁴¹Gederot, Betdagon, Naama, Makeda: 16 a siudad, agraman dagiti kabangibangda nga ili.

⁴²Adda met ti Libna, Eter, Asan,

⁴³Jifta, Asena, Nesib,

⁴⁴Keila, Aksib ken Maresa: siam a siudad, agraman dagiti kabangibangda nga ili.

⁴⁵Adda met ti Ekron ken dagiti ili ken barriona,

⁴⁶ken amin a siudad ken ili nga asideg ti Asdod, manipud Ekron agingga iti Baybay Mediterranean.

⁴⁷Adda met ti Asdod ken ti Gaza, agraman ili ken barrioda, a dumanon iti waig iti beddeng ti Egipto ken iti igid ti Baybay Mediterranean.

⁴⁸Iti katurturodan, adda ti Samir, Jattir, Soco,

⁴⁹Danna, Kiryat Sana (wenno Debir),

⁵⁰Anab, Estemoa, Anim,

⁵¹Gosen, Holon ken Gilo: sangapulo ket maysa a siudad, agraman dagiti kabangibangda nga ili.

⁵²Adda met ti Arab, Duma, Esan,

⁵³Janim, Bet Tappua, Afeca,

⁵⁴Humta, Kiryat Arba (wenno Hebron) ken Zior: siam a siudad, agraman dagiti kabangibangda nga ili.

⁵⁵Adda met ti Maon, Carmel, Zif, Jutta,

⁵⁶Jezreel, Jocdeam, Zanoa,

⁵⁷Canin, Gibea ken Timnat: sangapulo a siudad, agraman dagiti kabangibangda nga ili.

⁵⁸Adda met ti Halhul, Bet-sur, Gedor,

⁵⁹Moara, Bet-anot ken Eltecon: innem a siudad agraman dagiti kabangibang nga ili.

⁶⁰Adda ti Kiryat Baal (wenno Jearim Baal) ken ti Rabba: dua a siudad agraman dagiti kabangibang nga ili.

⁶¹Iti let-ang isuda dagitoy: Bet Araba, Middin, Secaca,

⁶²Nibsan, ti Siudad ti Ain, ken Engedi: innem a siudad, agraman dagiti kabangibangda nga ili.

⁶³Ngem saan a nabalinan dagiti taga-Juda a pinapanaw dagiti Jebuseo nga agnaed idiay Jerusalem. Agpapan ita, adda pay laeng sadiay dagiti Jebuseo a makipagmanaed kadagiti tattao ti Juda.