Read Iloko Joshua 17 Bible Online

Joshua 17 - Iloko bible

Joshua 17

¹Adda paset ti daga a naited kadagiti familia a nagtaud iti kaputotan ni Manases nga inauna nga anak ni Jose. Bannuar a mannakigubat ni Makir nga ama ni Galaad ken inauna nga anak ni Manases ket naited kenkuana ti Galaad ken Basan.

²Adda met daga iti lauden ti Jordan a naited kadagiti dadduma a familia ni Manases: Abiezer, Helec, Asriel, Siquiem, Hefer ken Semida. Dagitoy dagiti lallaki nga annak ni Manases nga anak ni Jose; pangulo ida dagiti familia.

³Awan lalaki nga anak ni Zelofehad nga anak ni Hefer ken apoko ni Galaad nga anak ni Makir nga anak ni Manases. Pasig a babbai ti annakna: Mala, Noa, Hogla, Milca ken Tirza.

⁴Napanda ken ni Eleazar a padi, ken ni Josue nga anak ni Nun, ken kadagiti panguloen, ket kinunada: “Imbaga ti Apo ken ni Moises nga ikkannakam, agraman dagiti kabagianmi, iti daga a kukuami.” Kas imbilin ni Yahweh, naikkan dagitoy a babbai iti daga, kasta met dagiti lallaki a kabsat ni amada.

⁵Sangapulo a kadisso ti naited ken ni Manases, agraman ti Galaad ken ti Basan iti ballasiw ti Jordan,

⁶ta padapada nga adda bingay dagiti annakna, babai man wenno lalaki. Naited ti daga ti Galaad kadagiti dadduma a kaputotan ni Manases.

⁷Mangrugi ti teritorio ti Manases idiay Aser agingga iti Micmetat iti daya ti Siquiem, ket agpa-abagatan a mangsakup kadagiti agnaed idiay Entappua.

⁸Kukua ti Manases ti daga iti lawlaw ti Tappua, ngem dagiti kaputotan ni Efraim ti akinkukua iti ili ti Tappua nga adda iti beddeng.

⁹Sumalog ti beddeng iti waig ti Cana. Kukua ti Efraim dagiti siudad iti abagatan ti waig uray addada iti sakup dagiti siudad ni Manases. Aglayon ti beddeng ti Manases iti akin-amianan a ballasiw ti waig, ket agpatingga iti Taaw Mediterranean.

¹⁰Agpa-abagatan ti daga ti Efraim idinto nga agpa-amianan ti daga ti Manases, ket ti Taaw Mediterranean ti beddengda iti laud. Dumanon iti Aser iti amianan, ken Issacar iti daya.

¹¹Iti sakup da Issacar ken Aser, tinagikua ti Manases ti Bet Sean ken dagiti kabangibang nga ili, ken ti Dor (ti siudad iti asideg ti baybay), Endor, Taanac, Megiddo ken dagiti kabangibangda nga ili.

¹²Nupay kasta, saan a nabalinan dagiti tattao ti Manases a pinagtalaw dagiti Cananeo no di ket nakipagnaed dagitoy a tattao kadakuada.

¹³Idi pumigsa dagiti Israelita, saanda a pinagtalaw amin a Cananeo, ngem pinilitda ida nga agtrabaho para kadakuada.

¹⁴Kinuna dagiti kaputotan ni Jose ken ni Josue, “Apay a sangsangkadisso la ti intedmo a tagikuaenmi? Adukami gapu ta binendisionannakami ti Apo.”

¹⁵“No adukayo la unay ket saan a makaanay kadakayo ti katurturodan ti Efraim,” insungbat ni Josue, “inkayo kadagiti kabakiran ket mangumakay iti sakupenyo iti daga dagiti Perezeo ken dagiti Refaim.”

¹⁶“Bassit kadakami ti katurturodan,” kinuna dagiti kaputotan ni Jose, “ken adda landok a lugan a pakigubat dagiti Cananeo a taga-tanap, dagiti agnaed idiay Bet Sean ken dagiti kabangibangna nga ili, ken dagiti tattao iti Tanap ti Jezreel.”

¹⁷Kinuna ni Josue kadagiti tribu ti Efraim ken Manases, “Pudno nga adukayo, ket nakabilbilegkayo. Nasursurok ngem maysa a disso ti maited kadakayo.

¹⁸Kukuayo ti katurturodan. Uray no kabakiran, umaenyo ket tagikuaenyo ti amin. No maipapan kadagiti Cananeo, mapaksiatyo ida uray no nabilegda ken addaanda kadagiti landok a lugan a pakigubat.”