Read Iloko Joshua 18 Bible Online

Joshua 18 - Iloko bible

Joshua 18

¹Kalpasan ti panangparmekda iti daga, naguummong ti entero nga Israel idiay Silo ket impasdekda sadiay ti Tolda ti Dios.

²Adda pito a tribu ti Israel a di pay naibingayan iti daga.

³Kinuna ngarud ni Josue kadagiti Israelita, “Kaanonto a sakupenyo ti daga nga inted kadakayo ti Apo a Dios dagiti kapuonanyo? Apay nga itantantanyo?

⁴Mangdutokkayo iti tallo a lallaki iti tunggal tribu tapno ibaonko ida a mangmapa iti daga a kayatda a tagikuaen. Kalpasanna, agsublidanto kaniak.

⁵Mabingbingayto ti daga iti pito a paset. Agnaedto ti tribu ti Juda iti teritoriona iti abagatan, ket ti tribu ti Jose iti amianan.

⁶Mapaenyonto ti daga iti pito a paset sayonto yeg kaniak. Kalpasanna, iti imatang ti Apo a Diostayo, bunotekto no ania a paset ti maited iti tunggal maysa.

⁷Dinto maibingayan dagiti Levita, ta pannakatagikuada ti panagserbida a kas papadi ti Apo. Inawaten dagiti tribu ti Gad, Ruben ken gudua ti Manases ti dagada iti daya ti Jordan. Inted daytoy kadakuada ni Moises nga adipen ti Apo.”

⁸Imbilin ni Josue kadagiti lallaki: “Inkayo iti entero a daga ket mapaenyo sakayto agsubli kaniak. Ibunotankayto iti imatang ti Apo ditoy Silo.” Ket napan dagiti lallaki tapno mapaenda ti daga.

⁹Sinursorda ti daga ket insuratda no kasano ti panangbingbingayda iti pito a paset; inlistada ti nagan dagiti ili. Kalpasanna, nagsublida ken ni Josue iti kampo idiay Silo.

¹⁰Babaen iti binnunot, nakiuman ni Josue ken ni Yahweh para kadakuada, ket biningbingayna ti daga kadagiti dadduma a tribu ti Israel.

¹¹Immuna a naituding ti daga a tagikuaen dagiti familia iti tribu ti Benjamin. Adda ti daga iti nagbaetan ti sakup ti tribu ti Juda ken ti tribu ti Jose.

¹²Iti amianan, ti Jordan ti pangrugian ti beddeng ket sumang-at iti akin-amianan nga igid ti Jerico, sa agpa-laud a lumasat iti katurturodan agingga iti let-ang ti Bet-aven.

¹³Manipud ditoy, aglayon idiay Luz, iti akin-abagatan a sang-atan ti Luz (managan pay Betel), sumalog idiay Atarot-Addar, iti bantay nga adda iti abagatan ti Akimbaba a Bet-horon.

¹⁴Iti laud, ti beddeng agkurba nga agpa-abagatan manipud iti turod nga adda iti abagatan ti Bet-horon sa agpatingga iti siudad ti Kiriat Baal (wenno Kiriat Jearim) a kukua ti tribu ti Juda.

¹⁵Mangrugi ti akin-abagatan a beddeng iti igid ti Kiriat Jearim, ket agpa-laud nga agturong iti ubbog ti Neftoa.

¹⁶Sumalog agingga iti arisadsad ti bantay a tumannawag iti Tanap ni Ben-Hinnom, iti akin-amianan a pungto ti Tanap ni Refaim. Lumasat iti Tanap ni Hinnom, iti abagatan ti pantok ti Jebus, ket agpababa nga agpa-Enrogel.

¹⁷Agkurba nga agpa-amianan ket aglayon idiay Ensemes, sa idiay Gelilot, iti kasumbangir ti Bessang Adummim. Sumalog manen ket agturong iti Bato ni Bohan (ti anak ni Ruben).

¹⁸Agpa-amianan iti pantok a pakatannawagan iti tanap ti Jordan, ket sumalog nga agturong iti tanap.

¹⁹Lumasat iti amianan ti pagsalogan ti Bet-hogla, ket agpatingga iti akin-amianan a sabangan ti Natay a Baybay a pagpatinggaan ti Karayan Jordan nga akin-abagatan a beddeng.

²⁰Ti Jordan ti akindaya a beddeng. Dagitoy dagiti beddeng ti daga a tagikuaen dagiti familia iti tribu ti Benjamin.

²¹Dagitoy dagiti siudad a sakupen dagiti familia iti tribu ti Benjamin: Jerico, Bet-hogla, Emek Keziz,

²²Bet-araba, Sumaraim, Betel,

²³Avvim, Para, Ofra,

²⁴Kefar-hammomi, Ofni ken Geba—12 a siudad agraman dagiti ilida.

²⁵Maibilang pay ti Gabaon, Rama, Beerot,

²⁶Mizpa, Kefira, Moza,

²⁷Rekem, Irpeel, Tarala,

²⁸Sela, Haclef, Jebus (wenno Jerusalem), Gibea ken Kiriat Jearim—14 a siudad agraman dagiti ilida. Daytoy ti daga a naited a tagikuaen dagiti familia iti tribu ti Benjamin.