Read Iloko Joshua 20 Bible Online

Joshua 20 - Iloko bible

Joshua 20

¹Imbilin ni Yahweh ken ni Josue nga

²ibagana daytoy kadagiti Israelita: “Mangpilikayo kadagiti siudad a pagkamangan kas imbagak kadakay idi babaen ken ni Moises.

³Mabalin nga agkamang sadiay ti siasinoman a makapatay a dina inggagara tapno malisianna ti agpanggep nga agibales.

⁴Mabalinna ti agkamang iti maysa kadagitoy a siudad, dumatag iti pangukoman iti sango ti ruangan ti siudad ket ipalawagna kadagiti panglakayen ti napasamak. Pastrekendanto iti siudad, ikkanda iti pagyananna tapno agnaed sadiay.

⁵No suroten sadiay ti tao a mangibales iti inaramidna, saanda nga isuko ta dina met inggagara a pinatay ti padana nga Israelita, ket awan met gurana kenkuana.

⁶Agnaedto iti siudad agingga a mausig ti kasona iti sango dagiti tattao ken agingga a matay ti agdama a kangatoan a padi; kalpasanna, mabalinnanto ti agawid iti siudad a naggapuanna.”

⁷Pinilida ngarud ti Kedes idiay Galilea, iti katurturodan ti Neftali; Sikem iti katurturodan ti Efraim; ken Hebron iti katurturodan ti Juda.

⁸Iti ballasiw ti Jordan, ken iti daya ti Jerico, iti let-ang iti Tanap, pinilida ti Beser iti sakup ni Ruben; Ramot iti Galaad, iti tribu ti Gad, Golan iti Basan, iti sakup ti Manases.

⁹Dagitoy dagiti siudad a pagkamangan dagiti Israelita ken uray siasino a ganggannaet iti dennada. Siasinoman a makapatay, mabalinna ti agkamang kadagitoy a siudad tapno saan a balsen ti kabagian ti napatayna. Agyan sadiay agingga a malpas a mausig ti kasona iti sango dagiti tattao.