Read Iloko Joshua 21 Bible Online

Joshua 21 - Iloko bible

Joshua 21

¹Idi addada idiay Silo, iti daga ti Canaan, napan dagiti pangulo dagiti familia dagiti Levita ken ni Eleazar a padi, ni Josue nga anak ni Nun ken kadagiti pangulo ti tunggal familia ti amin a tribu ti Israel. Kinunada kadakuada, “Imbilin ti Apo ken ni Moises a maikkankami kadagiti siudad a pagnaedanmi agraman dagiti kabangibangda a daga a pagipastoranmi kadagiti animalmi.”

³Ngarud, kas imbilin ti Apo, inted dagiti Israelita kadagiti Levita dagitoy a siudad ken pagpastoran nga adda kadagiti sakupda.

⁴Dagiti familia iti kaputotan ni Coat ti immuna a naikkan kadagiti siudad. Sangapulo ket tallo a siudad ti naited a tagikuaen dagiti Levita a nagtaud iti kaputotan ni Aaron a padi. Naggapu dagiti siudadda kadagiti sakup ti Juda, Simeon ken Benjamin.

⁵Naikkan dagiti dadduma a familia iti kaputotan ni Coat iti sangapulo a siudad manipud kadagiti sakup ti Efraim, Dan ken kagudua ti Manases.

⁶Sangapulo ket tallo a siudad ti naited a tagikuaen dagiti familia iti kaputotan ni Gerson. Nagtaud dagitoy iti sakup ti Issacar, Aser, Neftali ken akindaya a tribu ti Manases.

⁷Sangapulo ket dua a siudad ti naited a tagikuaen dagiti familia iti kaputotan ni Merari. Nagtaud dagitoy a siudad iti sakup ti Ruben, Gad ken Zabulon.

⁸Kas imbilin ni Yahweh ken ni Moises, inted dagiti Israelita kadagiti Levita dagitoy a siudad ken pagpaaraban babaen iti binnunot.

⁹Dagitoy dagiti siudad iti sakup ti Juda ken Simeon a naituding

¹⁰kadagiti kaputotan ni Aaron a nagtaud kadagiti familia iti kaputotan ni Coat a kamkameng dagiti Levita. Isuda ti immuna a naikkan.

¹¹Naited kadakuada ti siudad ti Arba (ni Arba ti ama ni Anak), nga isu itan ti Hebron, iti katurturodan ti Juda agraman dagiti pagpastoran iti lawlawna.

¹²Nupay kasta, naited ken ni Caleb nga anak ni Jefone dagiti taltalon ti siudad agraman dagiti barriona.

¹³Malaksid iti Hebron (maysa kadagiti siudad a pagkamangan), naited kadagiti kaputotan ni Aaron a padi dagiti sumaganad a siudad: Libna,

¹⁴Jattir, Estemoa,

¹⁵Holon, Debir,

¹⁶Ain, Jutta ken Betsemes, agraman dagiti pagpastoranda—siam a siudad iti sakup dagiti dua a tribu.

¹⁷Iti sakup ti Benjamin, naited kadakuada ti Gabaon, Geba,

¹⁸Anatot ken Almon agraman dagiti pagpastoranda—uppat a siudad.

¹⁹Sangapulo ket tallo a siudad amin agraman dagiti pagpastoranda ti naited a tagikuaen dagiti papadi a kaputotan ni Aaron.

²⁰Iti sakup ti Efraim, sumagmamano a siudad ti naited a tagikuaen dagiti dadduma a familia ti kaputotan ni Coat a kamkameng dagiti Levita.

²¹Naited kadakuada ti Sikem agraman ti pagpastoranna iti katurturodan ti Efraim (maysa a siudad a pagkamangan), Gezer,

²²Kibsaim ken Bet-horon agraman ti pagpastoranna—uppat a siudad.

²³Iti sakup ti Dan, naited kadakuada ti Elteke, Gibbeton,

²⁴Aijalon ken Gatrimmon agraman dagiti paspastoranda—uppat a siudad.

²⁵Iti sakup ti Manases, naited kadakuada ti Taanac ken Gatrimmon agraman dagiti pagpastoranda—dua a siudad.

²⁶Sangapulo a siudad amin agraman dagiti pagpastoranda ti inawat dagitoy a familia iti kaputotan ni Coat.

²⁷Naited iti sabali a grupo dagiti Levita, ti familia ni Gerson, ti dua a siudad iti Akindaya a Manases: Golan, idiay Basan (maysa kadagiti siudad a pagkamangan) ken Borsa agraman dagiti pagpastoranda.

²⁸Iti sakup ti Issacar, naited kadakuada ti Kision, Daberat,

²⁹Jaramut ken Engannim agraman dagiti pagpastoranda—uppat a siudad.

³⁰Iti sakup ti Aser, naited kadakuada ti Miseal, Abdon,

³¹Helcat, ken Rehob agraman dagiti pagpastoranda—uppat a siudad.

³²Iti sakup ti Neftali, naited kadakuada ti Kedes idiay Galilea agraman ti pagpastoranda (maysa kadagiti siudad a pagkamangan), Hammotdor ken Cartan agraman dagiti pagpastoranda—tallo a siudad.

³³Sangapulo ket tallo amin a siudad agraman dagiti pagpastoranda ti naited kadagiti nadumaduma a familia ti kaputotan ni Gerson.

³⁴Iti sakup ti Zabulon, inawat dagiti dadduma a Levita, ti kapuonan ni Merari, dagiti siudad ti Jocneam, Carta,

³⁵Dimna ken Naalal agraman dagiti pagpastoranda—uppat a siudad.

³⁶Manipud iti sakup ti Ruben, uppat a siudad ti inawatda: Beser, Jahaz,

³⁷Kedemot, ken Mefaat agraman dagiti pagpastoranda.

³⁸Iti sakup ti Gad, naited kadakuada ti Ramot idiay Galaad agraman dagiti pagpastoranna (maysa kadagiti siudad a pagkamangan), Mahanaim,

³⁹Hesbon ken Jazer agraman dagiti pagpastoranda—uppat a siudad.

⁴⁰Sangapulo ket dua a siudad ti naited kadagiti dadduma a Levita, ti kaputotan ti Merari.

⁴¹Iti daga dagiti Israelita, 48 a siudad amin agraman dagiti pagpastoranda ti naited kadagiti Levita.

⁴²Adda pagpastoran iti aglikmut ti tunggal siudad.

⁴³Iti kasta, inted ni Yahweh kadagiti Israelita ti amin a daga nga insapatana nga ited kadagiti kaputotanda. Kalpasan ti panangsakupda iti daga, impasdekda sadiay ti taengda.

⁴⁴Ket kas inkari ni Yahweh kadagiti kapuonanda, inyegna kadakuada ti kappia iti aglawlaw. Awan ti uray maysa kadagiti kabusorda ti makabael a sumango kadakuada, ta pinagballigi ni Yahweh dagiti Israelita kadagiti amin a kabusorda.

⁴⁵Tinungpal ni Yahweh ti amin nga inkarina kadagiti Israelita.