Read Iloko Joshua 22 Bible Online

Joshua 22 - Iloko bible

Joshua 22

¹Kalpasanna, inummong ni Josue dagiti tattao kadagiti tribu ti Ruben, Gad ken Akindaya a Manases.

²Kinunana kadakuada, “Inaramidyo amin nga imbilin ni Moises nga adipen ti Apo. Tinungpalyo met amin a bilinko.

³Agpapan ita, pulos a diyo binaybay-an dagiti padayo nga Israelita. Sipapasnekkayo a nagtungpal kadagiti bilin ti Apo a Diosyo.

⁴Ita, kas inkarina, inyegna ti kappia kadagiti padayo nga Israelita. Agawidkayo ngarud iti ballasiw ti Jordan, iti daga nga inted kadakayo ni Moises nga adipen ti Apo.

⁵Ikagumaanyo a tungpalen ti bilin ken ti linteg nga inted kadakayo ni Moises nga adipen ti Apo: ayatenyo ti Apo a Diosyo, aramidenyo ti pagayatanna, agtungpalkayo kadagiti bilinna, agtalinaedkayo a napudno kenkuana ken agserbikayo kenkuana iti amin a puso ken kararuayo.”

⁶Pinagawid ni Josue ida kalpasan ti panangbendisionna kadakuada a kunana: “Nabaknangkayo nga agawid. Adu ti animal, pirak, balitok, gambang, landok ken pagan-anayyo. Ibingayanyo dagiti padayo nga Israelita iti sinamsamyo kadagiti kabusoryo.” Ket nagawid dagiti Israelita. Ita, ni Moises ti nangted iti daga iti daya ti Jordan iti kagudua ti tribu ti Manases, ngem ni Josue ti nangted iti daga nga adda iti laud ti Jordan iti sabali a kagudua ti tribu ken kadagiti dadduma pay a tribu.

⁹Nagawid ngarud dagiti tattao kadagiti tribu ti Ruben, Gad ken ti Akindaya a Manases. Pinanawanda dagiti dadduma nga Israelita idiay Silo iti daga ti Canaan ket napanda idiay Galaad, ti bukodda a daga a tinagikuada idi kas imbilin ni Yahweh ken ni Moises.

¹⁰Idi dumtengda idiay Gelilot a masakupan ti Canaan iti ballasiw ti Jordan, nangipatakderda iti dakkel ken nadaeg nga altar iti igid ti karayan.

¹¹Naipadamag kadagiti dadduma nga Israelita a nangipasdek dagiti tattao kadagiti tribu ti Ruben, Gad ken ti Akindaya a Manases, iti altar idiay Gelilot, iti masakupan ti Canaan, iti paset a kukuada idiay Jordan.

¹²Apaman a nadamag dagiti Israelita daytoy, naguummongda amin idiay Silo tapno mapanda gubaten dagiti tribu ti daya.

¹³Naibaon ni Finees nga anak ni Eleazar a padi a mapan kadagiti tattao iti tribu ti Ruben, Gad ken ti Akindaya a Manases idiay Galaad.

¹⁴Sangapulo a tattao ti kimmuyog kenkuana, maysa iti tunggal tribu iti laud, a pangulo iti tunggal familia.

¹⁵Dimtengda idiay Galaad, ket kinunada kadagiti tattao ti Ruben, Gad ken ti Akindaya a Manases:

¹⁶Daytoy ti kuna ti entero a gimong ti Apo: “Apay nga inaramidyo daytoy a kinadakes a maibusor iti Dios ti Israel? Sinukiryo ti Apo iti panangbangonyo iti daytoy nga altar a pagdaydayawanyo! Simminakayon iti Apo!

¹⁷Nalipatanyo kadin ti basoltay idiay Peor idi nangyeg ti Apo iti didigra a pinangdusana kadagiti tattaona? Agsagsagabatayo pay laeng gapu iti daydiay. Saan pay la kadi nga umanay ti nagbasolantayo?

¹⁸Isardengyo kadin ti sumurot iti Apo? No agsukirkayo kenkuana ita nga aldaw, agpungtotto kadagiti amin a tattao ti Israel inton bigat.

¹⁹Ita, no ibilangyo a saan a maikari a pagdaydayawan ti dagayo, bumallasiwkayo iti daga ti Apo a yan ti toldana a pagdaydayawan. Mangalakayo iti daga a tagikuaenyo iti sakupmi. Ngem dikay agsukir iti Apo wenno kadakami babaen iti panangaramidyo iti sabali nga altar iti laksid ti altar ti Apo a Diostayo.

²⁰Laglagipenyo ni Acan nga anak ni Zera: sinalungasingna ti bilin maipapan kadagiti banag a naikari a madadael, ket nadusa dagiti amin nga Israelita. Saan la a ni Acan ti natay gapu iti basolna.”

²¹Insungbat dagiti tattao kadagiti tribu ti Ruben, Gad ken ti Akindaya a Manases kadagiti pangulo dagiti familia ti Israel:

²²“Ti Dios ti Mannakabalin-amin! Isu ti Apo! Ti Dios ti Mannakabalin-amin! Isu ti Apo! Ammona no apay nga inaramidmi daytoy, ket kayatmi a maammoanyo met! No nagsukirkami, ket tinallikudanmi ti Apo, saankayon nga agtaktak a mangpatay kadakami!

²³No nagsukirkam iti Dios gapu iti panangaramidmi iti altar a pagidatonan iti mapuoran a daton wenno daton a makan wenno daton a pakikappia, bay-anyo a ti Apo ti mangdusa kadakami!

²⁴Inaramidmi ti kastoy amangan no iti masakbayan, kunanto dagiti kaputotanyo kadagiti annakmi, ‘Ania ti bibiangyo iti Apo a Dios ti Israel?

²⁵Inkabil ti Apo a kas beddengtayo ti Jordan, dakayo a tattao ti Ruben ken Gad. Wen, awan ti pakaibianganyo iti Apo.’ Iti kasta, paritanto dagiti kaputotanyo dagiti kaputotanmi nga agdaydayaw kenkuana.

²⁶Nangipatakderkami iti altar, saan a tapno pagpuoran iti daton wenno pagidatonan,

²⁷no di ket agpaay a pammaneknek iti dua a grupotayo ken kadagiti sumarsaruno a kaputotantayo nga agdaydayawkam iti Apo babaen iti panagidatag kadagiti mapuoran a daton, dagiti sakrifisio ken daton iti kappia. Ngarud, dinto makuna dagiti kaputotanyo kadagiti kaputotanmi, ‘Awan ti bibiangyo iti Apo.’

²⁸Napanunotmi a no kastoyto ti mapasamak, ipakitaminto daytoy inaramidmi nga altar a kaasping ti altar ti Apo. Saan a pagpuoran iti daton wenno pagsakrifisioan, no di ket baton-lagip dagiti grupotayo.

²⁹Adayo a panggepmi ti bumusor iti Apo wenno sumiasi kenkuana iti panangbangonmi iti altar a pagidatagan iti mapuoran a daton wenno daton a makan wenno kadagiti sakrifisio. Dimi panggep ti mangipasdek iti sabali nga altar iti laksid ti altar ti Apo a Diostayo nga adda iti sango ti nasagradoan a toldana.”

³⁰Napnek ni Finees a padi ken dagiti pangulo ti entero nga Israel a kimmuyog kenkuana, isuda a pangulo dagiti familia ti Israel, iti palawag dagiti tattao kadagiti tribu ti Ruben, Gad ken Akindaya a Manases.

³¹Kinuna kadakuada ni Finees nga anak ni Eleazar a padi, “Ita makitamin nga adda kadatayo ti Apo agsipud ta dikayo met gayam simmukir kenkuana. Insalakanyo dagiti Israelita iti pannusa ti Apo.”

³²Manipud Galaad, nagsubli da Finees ken dagiti pangulo dagiti tattao idiay Canaan ket impakaammoda kadagiti Israelita ti napasamak.

³³Napnek dagiti Israelita iti naipadamag kadakuada ket nagdaydayawda iti Dios. Saanda nga intuloy ti panggepda a makigubat tapno dadaelenda ti daga a nangipasdekan dagiti tattao iti tribu ti Ruben ken Gad iti taengda.

³⁴Kinuna dagiti tattao ti Ruben ken Gad, “Daytoy nga altar ti mangipaneknek kadatay amin a ti Apo ket Dios.” Pammaneknek ti impanaganda iti altar.