Read Iloko Joshua 24 Bible Online

Joshua 24 - Iloko bible

Joshua 24

¹Inummong ni Josue dagiti amin a tribu ti Israel idiay Sikem. Inayabanna dagiti panglakayen, dagiti papangulo, dagiti ukom ken dagiti ofisiales ti Israel, ket dimmatagda iti imatang ti Dios.

²Kinuna ni Josue kadagiti amin a tattao, “Daytoy ti kuna ti Apo a Dios ti Israel: ‘Idi un-unana nga aldaw, nagnaed dagidi kapuonanyo iti ballasiw ti karayan Eufrates ket nagdaydayawda kadagiti didiosen. Maysa kadakuada ni Tera nga ama da Abraham ken Nahor.

³Innalak ni Abraham a kapuonanyo iti ballasiw ti karayan ket impanko iti daga ti Canaan. Inikkak iti adu a kaputotan. Intedko kenkuana ni Isaac.

⁴Intedko met ken ni Isaac da Jacob ken Esau. Intedko ken ni Esau ti katurturodan ti Edom ngem napan ni Jacob ken dagiti annakna idiay Egipto.

⁵Iti di mabayag, imbaonko da Moises ken Aaron ket inyegko ti dakkel a riribuk idiay Egipto. Ngem inruarkayo;

⁶inruarko dagiti kapuonanyo idiay Egipto ket kinamat ida dagiti Egipcio a nakasakay kadagiti luglugan a pakigubat ken dagiti mannakigubat a nakakabalio. Idi dumtengda iti Nalabaga a Baybay,

⁷immasugda kaniak ket nangikabilak iti sipnget iti nagbabaetanda kadagiti Egipcio. Imbuangko ti danum ti baybay a pinanglemmes kadagiti Egipcio. Ammoyo ti inaramidko iti Egipto. “‘Nabayag a nagnaedkay iti let-ang.

⁸Kalpasanna, impankay iti daga dagiti Amorreo a nagnaed iti daya ti Jordan. Ginubatdakayo, ngem pinagballigikayo. Sinakupyo ti dagada, ket dinadaelko ida bayat ti idadarapyo.

⁹Kalpasanna, nagparang ni Balak nga anak ni Sefor nga ari ti Moab, ket ginubatna ti Israel. Pinaibagana ken ni Balaam nga anak ni Beor nga ilunodnakayo.

¹⁰Ngem diak impangag ni Balaam. Binendisionannakayo ketdi ket inispalkayo iti pannakabalin ni Balak.

¹¹Binallasiwyo ti Jordan ket dimtengkayo idiay Jerico. Ginubatdakayo dagiti taga-Jerico kasta met dagiti Amorreo, dagiti Perezeo, dagiti Cananeo, dagiti Heteo, dagiti Gergeseo, dagiti Heveo ken dagiti Jebuseo. Ngem pinagballigikayo.

¹²Sakbay a dimtengkayo, nangibaonak kadagiti alimbubuyog a nangdarup kadagiti dua nga ari nga Amorreo ket pinaksiatko ida. Saan a ti kampilan wenno bai ken panayo ti nangparmek kadakuada.

¹³Inikkankayo iti daga a diyo nagbannogan ken kadagiti siudad a diyo impasdek. Agnanaedkayo sadiay itan; mangmangankay iti ubas ken iti olibo a diyo immula.’

¹⁴“Ita,” intuloy ni Josue, “agbutengkayo ngarud iti Apo ket agserbikayo kenkuana a sipupudno ken iti amin a pusoyo. Iwaksiyo dagiti didiosen a nagdaydayawan dagidi kapuonanyo idiay Mesopotamia ken Egipto. Ti laeng Apo ti pagserbianyo.

¹⁵No diyo kayat ti agserbi kenkuana, ikeddengyo itan no siasino ti pagserbianyo: agserbikayo kadagiti didiosen a nagserbian dagidi kapuonanyo idiay Mesopotamia wenno kadagiti didiosen dagiti Amorreo nga akindaga iti pagnanaedanyo iti agdama. Ngem no maipapan kaniak ken ti familiak, agserbikami iti Apo.”

¹⁶Simmungbat dagiti tattao, “Adayo a mapanunotmi a panawan ti Apo tapno agserbikami kadagiti didiosen!

¹⁷Ti Apo a Diostayo ti nangiruar kadatayo ken kadagidi kapuonantayo a naadipen idiay Egipto, ket nakitatayo dagiti milagro nga inaramidna. Sinalaknibannatay iti sadinoman a napanantayo, kadagiti amin pagilian a nagdaliasatantayo.

¹⁸Idi sumungadtayo iti daytoy a daga, pinaksiat ti Apo dagiti Amorreo ken dagiti amin a tattao a nagnaed iti daga. Ngarud, agserbikami iti Apo, ta isu ti Diostayo.”

¹⁹Kinuna ni Josue kadagiti tattao, “Ngem diyo mabalin ti agserbi iti Apo ta nasantoan a Dios ket dina ipalubos nga adda kasalisalna. Dinanto pakawanen dagiti basol ken salungasingyo.

²⁰No suminakayo kenkuana ket agserbikayo kadagiti ganggannaet a didiosen, busoren ken dusaennakayto. Pukawennakayto uray no naimbag idi kadakayo.”

²¹“Saan! Agserbikami iti Apo,” kinuna dagiti tattao.

²²Imbaga ngarud ni Josue kadakuada: “Dakayo met laeng ti mangsaksi iti bagbagiyo a piniliyo ti agserbi iti Apo.” “Wen, dakami ti saksi,” kinunada.

²³Kinuna ni Josue, “Idianyo ngarud dagiti didiosen nga adda kadakayo, ket isapatayo nga agtalinaedkayo a napudno iti Apo a Dios ti Israel.”

²⁴“Agserbikam iti Apo a Diostayo, ket tungpalenmi dagiti bilinna,” insungbatda.

²⁵Iti kasta, iti dayta nga aldaw idiay Sikem, nangaramid ni Josue iti katulagan nga agpaay kadagiti tattao. Inikkanna ida kadagiti paglintegan ken pagannurotan.

²⁶Insuratna dagitoy a bilin iti libro ti Linteg ti Dios, nangala iti dakkel a bato ket inkabilna sadiay, iti sirok ti kayo a lugo iti asideg ti santuario ni Yahweh.

²⁷Kinunana kadagiti amin a tattao: “Saksitayo daytoy a bato! Nangngeg daytoy a bato ti amin nga imbaga kadatayo ti Apo. Ngarud, daytoyto ti agtestigo kadakayo no agsukirkay iti Diosyo.”

²⁸Pinagawid ni Josue dagiti tattao, ket nagsubli iti tunggal maysa iti daga a naited kenkuana.

²⁹Kalpasan dagitoy, natay ni Josue nga anak ni Nun, ti adipen ni Yahweh idi 110 ti tawenna.

³⁰Intabonda iti dagana idiay Timnatsera, iti katurturodan ti Efraim, iti amianan ti Bantay Gaas.

³¹Nagserbi dagiti Israelita ken ni Yahweh iti unos ti panagbiag ni Josue. Kalpasan ti ipapatayna, intuloyda ti nagserbi ken ni Yahweh iti unos ti panagbiag dagiti panglakayen a nakakita iti amin nga impaay ni Yahweh iti Israel.

³²Naikali met idiay Sikem dagiti tultulang ni Jose nga innala idi dagiti Israelita idiay Egipto. Inkalida iti sakup ti daga a ginatang ni Jacob kadagiti annak ni Hamor, ti tatang ni Sikem, iti sangagasut a bagi ti pirak. Tinawid dagiti kaputotan ni Jose ti daga.

³³Natay met ni Eleazar nga anak ni Aaron, ket naitanem idiay Gibea, maysa nga ili iti katurturodan ti Efraim, a naited idi ken ni Finees nga anakna.