Read Iloko Joshua 3 Bible Online

Joshua 3 - Iloko bible

Joshua 3

¹Kabigatanna, nasapa a bimmangon ni Josue ken dagiti amin nga Israelita. Pimmanawda idiay Settim ket nagturongda idiay Jordan. Nagkampoda iti igid ti karayan sakbay ti ibaballasiwda.

²Kalpasan ti tallo nga aldaw, sinursor dagiti pangulo ti kampo

³ket imbagada kadagiti tattao: “Inton makitayo nga aw-awiten dagiti papadi ti Lakasa ti Tulag ti Apo a Diosyo, agrubbuatkayon ket surotenyo ida.

⁴Ipakaammoda no sadino ti pagnaanyo, ta dikay pay nagnagna ditoy. Ngem dikay umas-asideg iti Lakasa ti Tulag. Paunaenyo iti agarup kagudua a kilometro.”

⁵Imbaga met ni Josue kadagiti tattao, “Pasantoenyo ti bagiyo ta inton bigat, adunto ti makitayo a naindaklan a banag nga aramiden ti Apo.”

⁶Kalpasanna, binilinna dagiti papadi a bagkatenda ti Lakasa ti Tulag ket umun-unada ngem dagiti tattao. Tinungpalda ti imbagana.

⁷Kinuna ni Yahweh ken ni Josue, “Ita nga aldaw, itan-okka iti imatang dagiti Israelita tapno maammoanda nga addaak kenka a kas iti kaaddak idi ken ni Moises.

⁸Bilinem dagiti papadi a mangaw-awit iti Lakasa ti Tulag nga apaman a makagtengda iti igid ti karayan, tumapogda ket agsardengda sadiay.”

⁹Imbaga pay ni Josue kadagiti tattao, “Umayyo denggen ti sao ti Apo a Diosyo.

¹⁰Ita nga aldaw, maammoanyo nga adda kadakayo ti sibibiag a Dios ket iti idadarupyo, paksiatennanto dagiti Cananeo, Heteo, Heveo, Perezeo, Gergeseo, Amorreo ken dagiti Jebuseo.

¹¹Umun-una a bumallasiw ngem dakayo ti Lakasa ti Tulag ti Apo ti amin a daga.

¹²Pumilikayo iti sangapulo ket dua a lallaki, maysa iti tunggal tribu ti Israel.

¹³Inton tumapog dagiti papadi a mangaw-awit iti Lakasa ti Tulag ti Apo, ti Apo ti amin a daga, agsardengto nga agayus ti Jordan, ket agpundonto iti maysa a disso ti danum nga aggapu iti surong.”

¹⁴Panagani idi ket dimmakkel ti karayan. Pimmanaw ngarud dagiti tattao iti nagkampoanda tapno ballasiwenda ti Jordan. Immun-una dagiti papadi a siaawit iti Lakasa ti Tulag. Apaman a timmapog dagiti papadi iti karayan,

¹⁶nagsardeng a nagayus ti karayan ket nagpundo ti danum iti surong iti siudad ti Adam nga asideg iti Zaretan. Simmardeng a namimpinsan ti panagpababa ti danum nga agturong iti Natay a Baybay, ket bimmallasiw dagiti tattao iti batog ti Jerico.

¹⁷Bayat ti pannagnada iti namaga a daga, nagtalinaed a sitatakder dagiti papadi a mangaw-awit iti Lakasa ti Tulag ni Yahweh iti tengnga ti Jordan agingga a nakaballasiwda amin.