Read Iloko Joshua 6 Bible Online

Joshua 6 - Iloko bible

Joshua 6

¹Narikpan ti Jerico ket naguardiaan tapno saan a mastrek dagiti Israelita. Awan ti makastrek wenno makaruar iti siudad.

²Kinuna ni Yahweh ken ni Josue, “Yawatko kenka ti Jerico ken ti arina, agraman dagiti natutured a soldadona.

³Agmartsakayo, sika ken dagiti soldadom, ket lawlawenyo ti siudad, maminsan iti tunggal aldaw. Aramidenyo daytoy iti innem nga aldaw.

⁴Masapul nga adda ti Lakasa ti Tulag iti sango dagiti pito a papadi a saggaysa ti iggemda a trumpeta. Iti maikapito nga aldaw, mamimpitonto a rikosenyo ti siudad idinto a puypuyoten dagiti papadi ti trumpetada.

⁵Kalpasanna, puyotenda ti trumpetada iti napaut. Apaman a mangngeg dagiti tattao, aggigiddandanto nga agriaw ket marbanto ti bakud ti siudad. Sumrekto a dagus ti entero nga armada iti siudad.”

⁶Inayaban ngarud ni Josue dagiti papadi. “Alaenyo ti Lakasa ti Tulag,” kinunana kadakuada. “Pito kadakayo ti magna iti sangoananna a nakaiggem iti trumpeta. Umun-una ngem dakayo dagiti soldado.”

⁷Imbilinna kadagiti tattao a rikosenda ti siudad; umun-una dagiti mannakigubat a magna iti sango ti Lakasa ti Tulag ni Yahweh.

⁸Kas imbilin ni Josue, immun-una a nagrubbuat dagiti guardia a mannakigubat; simmaruno dagiti papadi a mangpuypuyot kadagiti trumpetada. Iti likudanda, adda dagiti papadi a mangaw-awit iti Lakasa ti Tulag a sinaruno dagiti guardia. Saan nga agsardeng ti pannakapuyot dagiti trumpeta.

¹⁰Ngem binilin ni Josue a saan nga agriaw dagiti tattao ken dida agtagtagari malaksid no ibagana kadakuada.

¹¹Imbaonna ngarud dagiti papadi a mangaw-awit iti Lakasa ti Tulag ni Yahweh. Naminsan a rinikosda ti siudad. Nagsublida met laeng iti kampo a nangpalabasanda iti rabii.

¹²Kabigatanna, nasapa a bimmangon ni Josue ket iti maikadua a gundaway, rinikos dagiti papadi ken dagiti mannakigubat ti siudad iti isu met la nga urnosda iti napalabas nga aldaw: Immuna dagiti guardia sa dagiti papadi a mangpuypuyot iti trumpetada; kalpasanna, dagiti papadi a mangaw-awit iti Lakasa ti Tulag ni Yahweh, ket kamaudianna, dagiti guardia iti likud. Kabayatanna, mapuypuyot met dagiti trumpeta.

¹⁴Iti sumaruno nga aldaw, linawlawda manen ti siudad iti naminsan sada nagsubli iti kampo. Innem nga aldaw a kastoy ti inaramidda.

¹⁵Iti maikapito nga aldaw, nasapada a bimmangon ket namimpito a rinikosda ti siudad. Dayta laeng ti aldaw a namimpito a rinikosda ti siudad.

¹⁶Iti maikapito a panangrikosda, sakbay ti panangpuyot dagiti papadi iti trumpetada, imbilin ni Josue kadagiti tattao nga agriawda. Kinunana, “Inteden ti Apo ti siudad kadakayo.

¹⁷Masapul a madadael a mamimpinsan ti siudad ken ti amin a linaonna a kas daton iti Apo. Ni laeng Rahab a balangkantis a babai, ken amin nga adda iti balayna ti maispal gapu ta inlemmengna dagiti imbaontayo nga espia.

¹⁸Ngem diyo alaen ti aniaman a nairanta a madadael. No adda alaenyo kadagitoy, yegyonto ti riribuk ken pannakadadael iti kampo dagiti Israelita.

¹⁹Nailasin nga agpaay iti Apo ti amin a naaramid iti pirak, balitok, bronse wenno landok. Masapul a maipanda iti pagidulinan iti gameng ti Apo.”

²⁰Pinuyot ngarud dagiti papadi ti trumpetada. Apaman a nangngeg dagiti tattao, nagriawda, ket narba a namimpinsan dagiti bakud ti siudad. Nagtartarus a simrek ti entero nga armada iti siudad ket sinakupda.

²¹Inuloyanda babaen iti kampilan dagiti amin nga adda iti siudad, lallaki ken babbai, ubbing ken lallakay. Pinatayda met dagiti baka, karnero ken asno.

²²Imbilin ni Josue kadagiti dua a lallaki a naibaon nga espia, “Inkay iti balay ti balangkantis a babai, ket iruaryo agraman ti amin a familiana, kas inkariyo kenkuana.”

²³Napanda inruar ni Rahab, ni tatangna, ni nanangna, dagiti kakabsatna ken dadduma a kameng ti familiana. Impanda amin ida, agraman dagiti tagabu iti asideg ti kampo dagiti Israelita.

²⁴Kalpasanna, pinuoranda ti siudad ket pinadapuda dagiti amin a linaonna, malaksid dagiti alikamen a naaramid iti balitok, bronse ken landok. Innalada ket inkabilda ida iti pagidulinan iti gameng ni Yahweh.

²⁵Ngem inispal ni Josue ni Rahab a balangkantis a babai ken amin a kakabagianna, gapu ta inlemmengna dagiti dua nga espia nga imbaon ni Josue iti Jerico. Agpapan kadagitoy nga aldaw, agnaed pay laeng ti kaputotan ni Rahab idiay Israel.

²⁶Iti dayta a tiempo, siiinget nga impakdaar daytoy ni Josue, “Siasinoman a mangbangon iti siudad nga Jerico, ilunodto ti Apo. Siasinoman a mangikabil iti fondasion, matayto ti inauna nga anakna a lalaki. Siasinoman a mangikabil kadagiti ruanganna, matayto ti inaudi nga anakna.”

²⁷Iti kasta, kinadkadua ni Yahweh ni Josue, ket nagdindinamag ni Josue iti entero a pagilian.