Read Iloko Joshua 8 Bible Online

Joshua 8 - Iloko bible

Joshua 8

¹Kinuna ni Yahweh ken ni Josue, “Alaem ti entero a buyotmo ket rautenyo ti Ai. Dika agbuteng wenno maupay. Yawatko kadagiti imam ti ari, dagiti tattaona, ti siudad ken ti daga.

²Aramidem iti Ai ken iti arina ti kas iti inaramidmo iti Jerico ken iti arina. Ngem ita, mabalinyo a samsamen dagiti sanikua ken animal. Mangibaonka kadagiti soldado iti laud ti Ai tapno kellaatenda a rauten ti siudad iti likudan.”

³Iti kasta, nagsagana ni Josue ken ti amin a mannakigubat a sumang-at idiay Ai. Nangpili iti 30,000 kadagiti kalaingan a mannakigubat, ket imbaonna ida iti rabii.

⁴Imbilinna kadakuada, “Aglemmengkay iti laud ti siudad, ngem saan unay nga adayo ti pagyananyo; agsaganakayo a mangraut.

⁵Umasidegkami kadagiti mannakigubat a kumuyog kaniak agingga iti sungadan ti siudad. Inton rummuarda a sumaranget kadakami, agsanudkaminto a kas iti inaramidmi idi.

⁶Sunsonendakaminto agingga a mayadayoda iti siudad. Ipagarupdanto nga itartarayanmi ida, kas idi damo.

⁷Rummuarkayonto metten iti paglemlemmenganyo sayonto sakupen ti siudad. Yawatto ti Apo a Diosyo ti siudad kadakayo.

⁸Kalpasan ti panangsakupyo iti siudad, puoranyonto kas imbilin ti Apo. Tungpalenyo dagitoy a bilin.”

⁹Imbaon ngarud ida ni Josue ket napanda iti paglemmenganda, iti laud ti Ai, iti nagbaetan ti Ai ken ti Betel. Iti dayta a rabii, immian ni Josue iti kampo.

¹⁰Kabigatanna, nasapa a bimmangon ni Josue ket inummongna dagiti mannakigubat. Kalpasanna, isu ken dagiti pangulo ti Israel, indauloanda dagiti mannakigubat a mapan idiay Ai.

¹¹Nagna dagiti soldado a kimmuyog kenkuana agingga iti disso a pakatannawaganda iti pagserkan ti siudad ket nagkampoda iti amianan. Adda tanap a nagbaetanda iti Ai.

¹²Nangala ni Josue iti aglimaribu a mannakigubat sana pinaglemmeng ida iti laud ti siudad, iti nagbaetan ti Ai ken Betel.

¹³Kastoy ti urnos dagiti mannakigubat: ad-adu ti adda iti amianan ti siudad ket aglemlemmeng dagiti kakaduada iti laud. Iti dayta a rabii, immian ni Josue iti tanap.

¹⁴Naggunay a dagus ti ari ti Ai idi makitana dagiti tattao ni Josue. Rimmuar agraman dagiti tattaona, ket nagturongda iti tanap ti Jordan tapno gubatenda dagiti Israelita iti disso a nagrarangetanda idi. Dina ammo nga adda aggapu iti laud a mangdarup kenkuana.

¹⁵Naginsasanud ni Josue ken dagiti tattaona; nagturongda iti let-ang.

¹⁶Naayaban amin a lallaki iti siudad a mangsunson kada Josue, ket iti panangsunsonda kadakuada, immad-adayoda iti siudad.

¹⁷Kinamat ti amin a taga-Ai dagiti Israelita. Silulukat ti Ai, ket awan nabati a mangguardia iti dayta a siudad.

¹⁸Kinuna ni Yahweh ken ni Josue, “Ipaturongmo ti gayangmo iti Ai; itedko kenkan ti siudad.” Nagtungpal ni Josue.

¹⁹Apaman a naingatona ti imana, dagus a nagtaray dagiti aglemlemmeng a mannakigubat ket sinerrekda ti siudad sada sinakup. Pinuoranda a dagus.

²⁰Idi tumalliaw dagiti taga-Ai, nakitada nga umas-asimbuyok ti siudad. Awanen ti pagtarayanda, ta sunsunsonen idan dagiti Israelita a nagkamang iti let-ang.

²¹Idi makita ni Josue ken dagiti tattaona a nasakupen dagiti kakaduada ti siudad, ket maur-uramen, nagsublida sada nagpapatay kadagiti taga-Ai.

²²Dinarup ida dagiti Israelita a nangpuor iti siudad. Nakita dagiti taga-Ai a linawlaw idan dagiti Israelita, ket napapatayda. Awan ti nakalibas wenno nagbiag malaksid ti ari ti Ai a tiniliwda sada indatag ken ni Josue.

²⁴Pinapatay dagiti Israelita dagiti amin a kabusor iti natikag a tay-ak a nangkamatanda kadakuada. Kalpasanna, nagsublida idiay Ai ket pinapatayda amin a nabati iti siudad.

²⁵Nagtalinaed a situturong ti gayang ni Josue iti Ai agingga a nagudas ti amin nga umili iti siudad. Iti dayta nga aldaw, napapatay ti amin nga agnaed iti Ai—12,000 a lallaki ken babbai.

²⁷Kas imbaga ni Yahweh ken ni Josue, innala dagiti Israelita dagiti animal ken sanikua a nasamsam iti siudad.

²⁸Pinuoran ni Josue ti Ai, ket pinagbalinna a langalang iti agnanayon, kas iti kasasaadna kadagitoy nga aldaw.

²⁹Pinaibitinna ti ari ti Ai iti kayo ket binaybay-anna a sibibitin ti bangkay agingga iti sumipnget. Idi lumnek ti init, pinaibabana ti bangkay ket pinaipurruakna iti serkan ti siudad. Ginaburanda ti bangkay iti adu a bato nga adda pay laeng agpapan kadagitoy nga aldaw.

³⁰Idiay Bantay Ebal, nangbangon ni Josue iti altar a maipaay ken ni Yahweh a Dios ti Israel.

³¹Inaramidna daytoy kas imbilin ni Moises nga adipen ni Yahweh kadagiti Israelita. Binangonna kas mayannurot iti naisurat iti Libro ti Linteg ni Moises—maysa nga altar a naaramid kadagiti bato a saan a natagaan iti landok nga alikamen. Iti rabaw ti altar, nangipaayda ken ni Yahweh kadagiti daton a mapuoran ken kadagiti daton a pakikappia.

³²Sadiay, iti imatang dagiti Israelita, inlanad ni Josue kadagiti bato ti altar ti kopia ti linteg nga insurat ni Moises.

³³Kalpasanna, nagtakder ti amin iti agsumbangir ti Lakasa ti Tulag—dagiti Israelita agraman dagiti papangulo, ofisial, ukom, ken uray pay dagiti ganggannaet nga agtataeng iti dennada; sangsangoenda dagiti papadi a Levita a nangawit idi iti lakasa. Sumangsango ti kagudua a bilang dagiti tattao iti Bantay Gerizim ket ti kagudua, iti Bantay Ebal. Daytoy ti imbilin idi ni Moises nga adipen ni Yahweh nga aramidenda inton awatenda ti bendision.

³⁴Imbasa ni Josue ti Linteg, agraman dagiti bendision ken dagiti lunod, kas nailanad iti libro ti Linteg.

³⁵Sinaggaysa ni Josue a binasa ti amin a bilin ni Moises iti sangoanan ti entero a gimong a nakairamanan dagiti babbai, ubbing ken dagiti ganggannaet a makipagnaed kadakuada.