Read Iloko Joshua 9 Bible Online

Joshua 9 - Iloko bible

Joshua 9

¹Nagwaras ti damag maipapan kadagiti panagballigi dagiti Israelita. Naammoan daytoy dagiti amin nga ari iti laud ti Jordan, dagiti adda kadagiti katurturodan, kadagiti tanap, ken dagiti amin nga adda iti igid ti Taaw Mediterranean agingga iti Libano iti amianan. Isuda dagiti ari dagiti Heteo, Amorreo, Cananeo, Perezeo, Heveo ken dagiti Jebuseo.

²Nagmaymaysada amin a manggubat ken ni Josue ken kadagiti Israelita.

³Ngem nadamag dagiti Heveo nga agnaed iti Gabaon ti inaramid ni Josue iti Jerico ken iti Ai

⁴ket inkeddengda ti panangsikapda kenkuana. Nagirubbuatda kadagiti abastoda, kinargaanda dagiti asnoda kadagiti daan a sako ken lalat a pigispigis ken takuptakup.

⁵Nagsapatosda iti rutrot ken takuptakup; nagbadoda iti rutayrutay. Nagbalonda iti timmangken ken binuot a tinapay.

⁶Kalpasanna, dimmatagda ken ni Josue iti nagkampoanda idiay Gilgal, ket kinunada kenkuana ken kadagiti Israelita, “Naggapukam iti adayo a pagilian. Kayatmi ti makitulag kadakayo.”

⁷Ngem kinuna dagiti Israelita kadagiti Heveo, “Apay a makitulagkami kadakayo? Amangan no asideg ti pagtaenganyo.”

⁸Kinunada ken ni Josue, “Madadaankami nga agserbi kenka.” “Siasinokayo?” sinaludsod ni Josue. “Sadino ti naggapuanyo?”

⁹Kastoy ti imbagada kenkuana: “Apo, naggapukam iti nakaad-adayo a daga ta nadamagmi ti maipapan iti Apo a Diosyo. Nadamagmi amin nga inaramidna idiay Egipto.

¹⁰Nadamagmi ti inaramidna kadagiti dua nga ari nga Amorreo iti daya ti Jordan: ni Sihon nga ari ti Hesbon, ken ni Og nga ari ti Basan a nagnaed idiay Astarot.

¹¹Imbaga kadakami dagiti pangulomi ken amin a kailianmi a mangisaganakam iti abasto nga agpaay iti biahe tapno sabatendakayo. Imbilinda nga agserbikami kadakayo ken makitulag kadakayo.

¹²Kitaenyo ti balonmi a tinapay. Idi agrubbuatkami nga umay sumabat kadakayo, napudot pay laeng. Ita, timmangken ken binuoten.

¹³Idi kargaanmi dagitoy a lalat iti arak, baroda pay laeng. Ita pigispigisdan. Kitaenyo dagiti pagan-anay ken sapatosmi; dimmaanda gapu iti nawatiwat a pinagnami.”

¹⁴Inawat dagiti Israelita ti taraon nga intedda, ngem dida nakiuman ken ni Yahweh.

¹⁵Nangaramid ni Josue iti katulagan ti pannakikappiana kadakuada ket pinalubosanna ida nga agbiag. Nagsapata dagiti papangulo ti Israel kas pammasingkedda iti katulagan.

¹⁶Tallo nga aldaw kalpasan ti panagtutulagda, naammoan dagiti Israelita nga asideg met la gayam ti pagnanaedan dagitoy a tattao.

¹⁷Gapu itoy, nagrubbuat dagiti Israelita ket kalpasan ti tallo nga aldaw a panagbiaheda, dimtengda kadagiti siudad dagitoy a tattao: Gabaon, Kefira, Beerot ken Kiriat Jearim.

¹⁸Ngem saan a mabalin a patayen dagiti Israelita ida ta sinapataan dagiti pangulo ti Israel ti pannakitulagda kadakuada babaen iti nagan ni Yahweh a Dios ti Israel. Gapu iti daytoy, nagreklamo dagiti amin a tattao kadagiti pangulo.

¹⁹Ngem insungbat dagiti papangulo, “Ditay mabalin a dangran ida gapu ta sinapataanmi iti nagan ti Apo a Dios ti Israel ti pannakitulagmi kadakuada.

²⁰Kastoy ti aramidentayo. Ispalentayo ida tapno awan ti dusa a yeg ti sinapataantayo a tulag.

²¹Palubosantay ida nga agbiag ngem agpaayda kadatayo a para-balsig ken para-sakdo.” Immanamong dagiti tattao iti insingasing dagiti panguloda.

²²Pinaayaban ni Josue dagiti taga-Gabaon ket sinaludsodna, “Apay a sinikapandakami? Apay nga imbagayo a naggapukay iti adayo a lugar idinto a ditoy a mismo ti taengyo?

²³Gapu itoy, inukomnakayo ti Dios. Agnanayonto a tagabu dagiti tattaoyo a para balsig ken para sakdo iti danum a maaramat iti santuario iti Diosko.”

²⁴“Inaramidmi ti kasta, apo,” insungbatda, “agsipud ta naammoanmi nga agpayso a binilin ti Apo a Diosyo ni Moises nga adipenna nga itedna kadakayo ti entero a daga ket pukawenyo amin nga agnanaed ditoy. Inaramidmi daytoy gapu ta napalalo ti butengmi kadakayo; pudno a mabutengkam amangan no patayendakami.

²⁵Ket ita ta addakamin iti turaymo, aramidem kadakami ti namnamaem a nasayaat ken maiparbeng.”

²⁶Iti kasta, sinalakniban ni Josue ida ket dina impalubos a patayen dagiti Israelita ida.

²⁷Ngem pinagbalinna ida a tagabu a para-balsig ken para-sakdo iti danum nga agpaay kadagiti Israelita ken iti altar ni Yahweh. Agpapan kadagitoy nga aldaw, kasta pay laeng ti trabahoda iti sadinoman a lugar a pilien ni Yahweh a pagdaydayawan dagiti tattao kenkuana.