Read Iloko 2 Thessalonians 3 Bible Online

2 Thessalonians 3 - Iloko bible

2 Thessalonians 3

¹Kamaudiananna, kakabsat, ikarkararagandakami tapno agtultuloy nga agsaknap a sipapardas ti mensahe maipapan iti Apo ket maitan-ok a kas met iti panangitan-okyo.

²Idawatyo met nga ispalennakami ti Dios kadagiti nakillo ken dakes a tattao. Ta saan nga amin a tattao ket mamati iti mensahe.

³Ngem mapagtalkan ti Apo. Papigsaen ken salaknibannakayto iti Managdakdakes.

⁴Ti Apo ti mangted iti dakkel a panagtalekmi kadakayo nga aramidenyo ken itultuloyyo nga aramiden dagiti ibagami kadakayo.

⁵Sapay koma ta idalannakayo ti Apo iti naun-uneg a pannakaawat iti panagayat iti Dios ken iti panagibtur nga ipaay ni Cristo.

⁶Kakabsat, iti nagan ni Apo Jesu-Cristo, ibilinmi kadakayo nga adaywanyo dagiti amin a nasadut a kakabsat a di mangtungpal kadagiti imbalbalakadmi kadakuada.

⁷Pagaammoyo unay a rebbengyo a tuladen ti inaramidmi. Saankami a nasadut idi addakami iti dennayo.

⁸Awan ti inawatmi a tulong a dimi binayadan. Ngem nagtrabaho ken nagbannogkami ketdi. Nagtrabahokami iti aldaw ken rabii tapno dikam agbalin a pakadagsenan ti uray siasinoman kadakayo.

⁹Inaramidmi daytoy a pagtuladanyo, saan a gapu ta awan ti kalinteganmi a dumawat iti masapulmi, no di ket pagtuladanyo.

¹⁰Bayat ti kaaddami iti dennayo, imbagbagamin idi kadakayo, “Ti saan nga agtrabaho, saan a pakpakanen.”

¹¹Kunami daytoy ta nadamagmi nga adda kano sumagmamano a nasadut kadakayo. Awan kano ti ar-aramidenda no di la bumibiang iti aramid ti sabali a tao.

¹²Iti nagan ni Apo Jesu-Cristo, ibilinmi kadagitoy a tattao ket ballaaganmi ida nga agbiagda kas maiparbeng ken manggedda iti pagbiagda.

¹³Ngem dakayo, kakabsat, masapul a dikayo mauma nga agaramid iti naimbag.

¹⁴Nalabit nga adda maysa dita a dinto agtungpal iti imbagami iti daytoy a surat. Tandaananyo ti kasta a tao ket diyo ikankano tapno mabainan.

¹⁵Ngem diyo ibilang a kabusor. Bagbagaanyo ketdi a kas maysa a kabsat.

¹⁶Sapay koma ta ti Apo a mismo a paggapuan ti talna, ikkannakay iti talna iti amin a tiempo ken iti amin a kasasaad. Adda koma ti Apo kadakay amin.

¹⁷Siak a mismo ti akinsurat iti daytoy: Pakomusta nga aggapu ken ni Pablo. Kastoy ti panangfirmak iti tunggal suratko. Kastoy ti panagsuratko.

¹⁸Ti parabur ni Apotayo a Jesu-Cristo adda koma kadakay amin.