Read Iloko 1 Timothy 2 Bible Online

1 Timothy 2 - Iloko bible

1 Timothy 2

¹Umuna unay, yunay-unayko ngarud a maidaton iti Dios dagiti dawat, kararag, panangibabaet ken panagyaman para iti amin a tattao.

²Ikararagam dagiti ar-ari ken amin nga agtuturay tapno agbiagtayo a natalna ken naulimek, nadiosan ken natakneng iti amin a banag.

³Nasayaat daytoy ket makaay-ayo iti Dios a Mangisalakan kadatayo.

⁴Tarigagayanna a maisalakan dagiti amin a tattao ken maammoanda ti pudno.

⁵Ta maymaysa ti Dios, ket maymaysa met ti mamagkappia iti Dios ken iti tao, ni Cristo Jesus a tao a

⁶nangyawat iti biagna tapno mawayawayaan dagiti amin a tattao. Dayta ti pammaneknek nga, iti naituding a tiempo, kayat ti Dios a maisalakan ti tunggal maysa.

⁷Daytoy ti gapuna a naibaonak a kas apostol, tapno ipakaammok ti Naimbag a Damag kadagiti Hentil, ket isurok kadakuada ti pudno a pammati. Saanak nga agul-ulbod. Pudno ti ibagbagak.

⁸Iti amin nga iglesia, tarigagayak nga agkararag dagiti lallaki. Masapul a napudnoda iti Dios ket masapul nga ingatoda ti imada bayat ti panagkararagda, nga awan pungtot wenno tarigagay a makisuppiat.

⁹Kayatko met a naemma ken nanakman koma ti panagkawes dagiti babbai. Saanda koma a maaddaan iti nagarbo a buok wenno agaruat iti alahas a balitok wenno perlas wenno agkawes iti nangingina a pagan-anay.

¹⁰Kas maiparbeng kadagiti babbai a managtulnog iti Dios, masapul a mararaemda gapu kadagiti naimbag nga aramidda.

¹¹Siuulimek ken sipapakumbaba koma nga agsursuro dagiti babbai.

¹²Diak ipalubos a mangisuroda wenno iturayanda dagiti lallaki. Masapul nga agulimekda.

¹³Ta naparsua nga immuna ni Adan sa ni Eva.

¹⁴Saan a ni Adan ti naallilaw no di ket ti babai a nangsalungasing iti linteg ti Dios.

¹⁵Ngem maisalakanto ti babai babaen iti panaganakna, no la ket agtalinaed iti pammati ken ayat ken agbiag a manakem ken nasantoan.