Read Iloko 1 Timothy 4 Bible Online

1 Timothy 4 - Iloko bible

1 Timothy 4

¹Nalawag ti kuna ti Espiritu a kadagiti maudi nga al-aldaw, suminanto ti sumagmamano a tattao iti pammati. Ipangagdanto dagiti mangallilaw nga espiritu ket surotenda ti pannursuro dagiti demonio.

²Dagitoy a pannursuro ket iwarwaras dagiti manangallilaw ken ulbod a tattao a natayen ti konsensiada, a kasla nauram iti bumegbeggang a landok.

³Iparitda ti pannakiasawa ken ti pannangan iti dadduma a taraon. Ngem pinarsua ti Dios dagitoy a taraon tapno kanen dagiti mamati ken makaammo iti pudno, kalpasan ti panagkararagda iti panagyaman.

⁴Nasayaat amin a pinarsua ti Dios. Awan ti dakes no la ket no maawat a buyogan ti panagyaman,

⁵agsipud ta agbalin a nasantoan ti taraon babaen iti sao ti Dios ken babaen iti kararag.

⁶No isurom dagitoy a pammagbaga kadagiti kakabsat, agbalinkanto a naimbag nga adipen ni Cristo Jesus, ket pumigsaka a naespirituan babaen kadagiti annuroten ti pammati ken babaen iti panangsalimetmetmo kadagiti pudno a pannursuro a sinurotmo.

⁷Ngem adaywam dagiti saan a nadiosan ken parbo a sarsarita. Agsanayka ketdi para iti nadiosan a biag.

⁸Adda maited ti panangwatwat iti bagi, ngem naserbi iti amin a benneg ti biag ti panagwatwat iti espiritu, agsipud ta yegna dagiti pagimbagan iti agdama ken iti masakbayan.

⁹Pudno daytoy a pagsasao a naan-anay nga awaten ken patien.

¹⁰Daytoy ti gapuna nga agagawatayo ken igaedtayo ti agtrabaho, agsipud ta intalektayo ti namnamatayo iti sibibiag a Dios a Mangisalakan iti amin, nangnangruna kadagiti mamati.

¹¹Ibilin ken isurom kadakuada dagitoy a bambanag.

¹²Dimo ipalubos a laisendaka gapu iti kinaubingmo. Ikagumaam ketdi ti agbalin nga ulidan dagiti mamati: iti sao, iti panagbiag, iti ayat, iti pammati ken iti kinadalus.

¹³Agingga iti yaayko, ipaaymo ti amin nga oras ken pigsam iti pannakaibasa ti Nasantoan a Surat iti publiko, ken iti panangasaba ken panangisuro.

¹⁴Aywanam dagiti naespirituan a sagut a naited kenka idi nagsao dagiti profeta ken idi ipatay dagiti panglakayen ti imada kenka.

¹⁵Itedmo a mamimpinsan ti bagim kadagitoy ket isuda laeng ti asikasoem tapno makita ti amin a tattao ti idurdur-asmo.

¹⁶Annadam ta bagim ken ti isursurom. Ipasnekmo nga aramiden dagitoy tapno maisalakanmonto ti mismo a bagim agraman dagiti dumngeg kenka.