Read Iloko 1 Timothy 5 Bible Online

1 Timothy 5 - Iloko bible

1 Timothy 5

¹Dimo ungtan ti laklakay ngem sika. Kasaom ketdi a kasla isu ti bukodmo nga ama. Iti amin a kinadalus, ibilangmo a kasmo la kabsat dagiti lallaki nga ub-ubing ngem sika; a kasmo la ina dagiti babbaket; ken kasmo la kabsat dagiti babbai nga ub-ubing ngem sika.

³Tulongam dagiti babbai a balo a pudno a makasapul iti tulong.

⁴Ngem no adda annak wenno appoko ti maysa a balo, masapul a sursuroenda nga umuna dagiti pagrebbenganda iti familia tapno makasubadda kadagiti nagannak kadakuada ken appoda, agsipud ta daytoy ti pakaragsakan ti Dios.

⁵Ti pudno a balo nga agbibiag nga agmaymaysa, intaleknan ti namnamana iti Dios ket aldaw-rabii nga agkararag ken agdawat kenkuana iti tulong.

⁶Ngem ti balo nga agbibiag iti nailubongan a ragsak, maibilang a natayen, uray no sibibiag.

⁷Ibilinmo daytoy kadakuada tapno awan ti pakababalawanda.

⁸Ngem no adda saan a mangasikaso kadagiti kabagianna, nangruna dagiti kameng ti familiana, tinallikudannan ti pammati, ket dakdakes pay ngem ti saan a mamati.

⁹Dagiti laeng 60 wenno nasursurok pay ti tawenna ti mailista a balo. Naminsan la a nakiasawa,

¹⁰agdindinamag pay kadagiti naimbag nga aramidna, kas iti nasayaat a panangpadakkelna kadagiti annakna, nagpadagus kadagiti ganggannaet, binuggoanna dagiti saka dagiti tattao ti Dios, tinulonganna dagiti agsagsagaba ken impamaysana ti nagaramid iti amin a kita ti naimbag nga aramid.

¹¹Ngem dimo ilista dagiti ub-ubing a balo, agsipud ta no dida magawidan ti riknada ket kayatda manen ti makiasawa, tallikudanda ni Cristo

¹²ket makabasolda iti saanda a panangtungpal iti umuna a karida kenkuana.

¹³Daddadaelenda pay ti tiempoda a mamalaybalay. Saan la a dayta, masursuroda pay ti agbalin a manarsarita ken mannakibiang, ket sawenda dagiti banag a di rumbeng a saritaen.

¹⁴Isu a kaykayatko a makiasawada, aganakda, asikasoenda ti balayda tapno awan ti pangbabalawan kadatayo dagiti kabusor.

¹⁵Ta nayaw-awanen ti sumagmamano a balo ket simmurotda ken ni Satanas.

¹⁶Ngem ti siasinoman a mamati a babai nga adda balo a babbai iti familiana, masapul a taripatoenna ida ket dina ipabaklay daytoy iti iglesia tapno maipamaysa ti iglesia a tulongan dagiti pudno a balo.

¹⁷Mamindua koma ti tangdan dagiti panglakayen a nasayaat ti panangtarawidwidda iti iglesia, nangruna dagiti mangipasnek a mangasaba ken mangisuro.

¹⁸Ta kuna ti Nasantoan a Surat: “Dimo busalan ti baka a madama nga agir-irik,” ken “Rebbengna a matangdanan ti agtrabaho.”

¹⁹Dimo denggen ti darum a maibusor iti maysa a panglakayen, malaksid no idatag ti dua wenno tallo a saksi.

²⁰Babalawem iti publiko ti amin nga agbasol tapno mapabutngan dagiti dadduma.

²¹Iti imatang ti Dios ken ni Cristo Jesus ken dagiti nasantoan nga anghelesna, yunay-unayko a tungpalem dagitoy a pammagbaga, nga awan idumdumam iti aniaman nga aramidem.

²²Dika agganat a mangipatay iti imam iti siasinoman para iti panagserbi iti Apo. Dika makiraman iti basol dagiti sabali. Agtalinaedka a nadalus.

²³Saan la a danum ti inumem, ngem gapu iti tianmo ken ti masansan a panagsakitmo, uminumka met iti sangkabassit nga arak.

²⁴Adda dagiti tattao a nalawag a makita dagiti basbasolda sakbay ti pannakaukomda. Adda met dagiti basbasol ti dadduma a makita laeng iti ud-udina.

²⁵Kasta met a nalawag a makita dagiti naimbag nga aramid, ngem uray no saanda a makita ita, saanda a mailemmeng iti agnanayon.